সূক্ত 17

17.1

১৪ দেবশ্রবা যামায়নঃ। ১-২ সরণ্যূঃ,৩-৬ পূষা, ৭-৯ সরস্বতী,১০-১৪ আপঃ, ১১-১৩ সোমো বা। ত্রিষ্টুপ্ ,১৩-১৪ অনুষ্টুপ্, ১৩ পুরস্তাদ্বৃহতী বা।

ত্বষ্টা দুহিত্রে বহতুং কৃণোতীতীদং বিশ্বং ভুবনং সমেতি ।
যমস্য মাতা পর্যুহ্যমানা মহো জায়া বিবস্বতো ননাশ ॥১॥

অপাগূহন্নমৃতাং মর্ত্যেভ্যঃ কৃত্বী সবর্ণামদদুর্বিবস্বতে ।
উতাশ্বিনাবভরদ্যত্তদাসীদজহাদু দ্বা মিথুনা সরণ্যূঃ ॥২॥

পূষা ত্বেতশ্চ্যাবয়তু প্র বিদ্বাননষ্টপশুর্ভুবনস্য গোপাঃ ।
স ত্বৈতেভ্যঃ পরি দদত্পিতৃভ্যোঽগ্নির্দেবেভ্যঃ সুবিদত্রিয়েভ্যঃ ॥৩॥

আয়ুর্বিশ্বায়ুঃ পরি পাসতি ত্বা পূষা ত্বা পাতু প্রপথে পুরস্তাৎ ।
যত্রাসতে সুকৃতো যত্র তে যয়ুস্তত্র ত্বা দেবঃ সবিতা দধাতু ॥৪॥

পূষেমা আশা অনু বেদ সর্বাঃ সো অস্মাঁ অভয়তমেন নেষৎ ।
স্বস্তিদা আঘৃণিঃ সর্ববীরোঽপ্রয়ুচ্ছন্পুর এতু প্রজানন্ ॥৫॥

প্রপথে পথামজনিষ্ট পূষা প্রপথে দিবঃ প্রপথে পৃথিব্যাঃ ।
উভে অভি প্রিয়তমে সধস্থে আ চ পরা চ চরতি প্রজানন্ ॥৬॥

সরস্বতীং দেবয়ন্তো হবন্তে সরস্বতীমধ্বরে তায়মানে ।
সরস্বতীং সুকৃতো অহ্বয়ন্ত সরস্বতী দাশুষে বার্যং দাৎ ॥৭॥

সরস্বতি যা সরথং যয়াথ স্বধাভির্দেবি পিতৃভির্মদন্তী ।
আসদ্যাস্মিন্বর্হিষি মাদয়স্বাঽনমীবা ইষ আ ধেহ্যস্মে ॥৮॥

সরস্বতীং যাং পিতরো হবন্তে দক্ষিণা যজ্ঞমভিনক্ষমাণাঃ ।
সহস্রার্ঘমিলো অত্র ভাগং রায়স্পোষং যজমানেষু ধেহি ॥৯॥

আপো অস্মান্মাতরঃ শুন্ধয়ন্তু ঘৃতেন নো ঘৃতপ্বঃ পুনন্তু ।
বিশ্বং হি রিপ্রং প্রবহন্তি দেবীরুদিদাভ্যঃ শুচিরা পূত এমি ॥১০॥

দ্রপ্সশ্চস্কন্দ প্রথমাঁ অনু দ্যূনিমং চ যোনিমনু যশ্চ পূর্বঃ ।
সমানং যোনিমনু সংচরন্তং দ্রপ্সং জুহোম্যনু সপ্ত হোত্রাঃ ॥১১॥

যস্তে দ্রপ্সঃ স্কন্দতি যস্তে অংশুর্বাহুচ্যুতো ধিষণায়া উপস্থাৎ ।
অধ্বর্যোর্বা পরি বা যঃ পবিত্রাত্তং তে জুহোমি মনসা বষট্কৃতম্ ॥১২॥

যস্তে দ্রপ্সঃ স্কন্নো যস্তে অংশুরবশ্চ যঃ পরঃ স্রুচা । অয়ং দেবো বৃহস্পতিঃ সং তং সিঞ্চতু রাধসে ॥১৩॥

পয়স্বতীরোষধয়ঃ পয়স্বন্মামকং বচঃ । অপাং পয়স্বদিত্পয়স্তেন মা সহ শুন্ধত ॥১৪॥