Sukta 17

17.1

14 devashrava yamayanah, 1-2 saranyuh, 3-6 pusha, 7-9 sarasvati, 10-14 apah, 11-13 somo va, trishtup, 13-14 anushtup, 13 purastadbrihati va

त्वष्टा॑ दुहि॒त्रे व॑ह॒तुं कृ॑णो॒तीती॒दं विश्वं॒ भुव॑नं॒ समे॑ति ।
य॒मस्य॑ मा॒ता प॑र्यु॒ह्यमा॑ना म॒हो जा॒या विव॑स्वतो ननाश ॥१॥

Tvashta duhitre vahatum krinotitidam vishvam bhuvanam sameti
Yamasya mata paryuhyamana maho jaya vivasvato nanasha

17.2

अपा॑गूहन्न॒मृतां॒ मर्त्ये॑भ्यः कृ॒त्वी सव॑र्णामददु॒र्विव॑स्वते ।
उ॒ताश्विना॑वभर॒द्यत्तदासी॒दज॑हादु॒ द्वा मि॑थु॒ना स॑र॒ण्यूः ॥२॥

Apaguhannamritam martyebhyah kritvi savarnamadadurvivasvate
Utashvinavabharadyattadasidajahadu dva mithuna saranyuh

17.3

पू॒षा त्वे॒तश्च्या॑वयतु॒ प्र वि॒द्वानन॑ष्टपशु॒र्भुव॑नस्य गो॒पाः ।
स त्वै॒तेभ्य॒ः परि॑ ददत्पि॒तृभ्यो॒ऽग्निर्दे॒वेभ्य॑ः सुविद॒त्रिये॑भ्यः ॥३॥

Pusha tvetashchyavayatu pra vidvananashtapashurbhuvanasya gopah
Sa tvaitebhyah pari dadatpitribhyognirdevebhyah suvidatriyebhyah

17.4

आयु॑र्वि॒श्वायु॒ः परि॑ पासति त्वा पू॒षा त्वा॑ पातु॒ प्रप॑थे पु॒रस्ता॑त् ।
यत्रास॑ते सु॒कृतो॒ यत्र॒ ते य॒युस्तत्र॑ त्वा दे॒वः स॑वि॒ता द॑धातु ॥४॥

Ayurvishvayuh pari pasati tva pusha tva patu prapathe purastat
Yatrasate sukrito yatra te yayustatra tva devah savita dadhatu

17.5

पू॒षेमा आशा॒ अनु॑ वेद॒ सर्वा॒ः सो अ॒स्माँ अभ॑यतमेन नेषत् ।
स्व॒स्ति॒दा आघृ॑णि॒ः सर्व॑वी॒रोऽप्र॑युच्छन्पु॒र ए॑तु प्रजा॒नन् ॥५॥

Pushema asha anu veda sarvah so asmam abhayatamena neshat
Svastida aghrinih sarvaviroprayuchchhanpura etu prajanan

17.6

प्रप॑थे प॒थाम॑जनिष्ट पू॒षा प्रप॑थे दि॒वः प्रप॑थे पृथि॒व्याः ।
उ॒भे अ॒भि प्रि॒यत॑मे स॒धस्थे॒ आ च॒ परा॑ च चरति प्रजा॒नन् ॥६॥

Prapathe pathamajanishta pusha prapathe divah prapathe prithivyah
Ubhe abhi priyatame sadhasthe a cha para cha charati prajanan

17.7

सर॑स्वतीं देव॒यन्तो॑ हवन्ते॒ सर॑स्वतीमध्व॒रे ता॒यमा॑ने ।
सर॑स्वतीं सु॒कृतो॑ अह्वयन्त॒ सर॑स्वती दा॒शुषे॒ वार्यं॑ दात् ॥७॥

Sarasvatim devayanto havante sarasvatimadhvare tayamane
Sarasvatim sukrito ahvayanta sarasvati dashushe varyam dat

17.8

सर॑स्वति॒ या स॒रथं॑ य॒याथ॑ स्व॒धाभि॑र्देवि पि॒तृभि॒र्मद॑न्ती ।
आ॒सद्या॒स्मिन्ब॒र्हिषि॑ मादयस्वाऽनमी॒वा इष॒ आ धे॑ह्य॒स्मे ॥८॥

Sarasvati ya saratham yayatha svadhabhirdevi pitribhirmadanti
Asadyasminbarhishi madayasvanamiva isha a dhehyasme

17.9

सर॑स्वतीं॒ यां पि॒तरो॒ हव॑न्ते दक्षि॒णा य॒ज्ञम॑भि॒नक्ष॑माणाः ।
स॒ह॒स्रा॒र्घमि॒ळो अत्र॑ भा॒गं रा॒यस्पोषं॒ यज॑मानेषु धेहि ॥९॥

Sarasvatim yam pitaro havante dakshina yagyamabhinakshamanah
Sahasrarghamilo atra bhagam rayasposham yajamaneshu dhehi

17.10

आपो॑ अ॒स्मान्मा॒तर॑ः शुन्धयन्तु घृ॒तेन॑ नो घृत॒प्व॑ः पुनन्तु ।
विश्वं॒ हि रि॒प्रं प्र॒वह॑न्ति दे॒वीरुदिदा॑भ्य॒ः शुचि॒रा पू॒त ए॑मि ॥१०॥

Apo asmanmatarah shundhayantu ghritena no ghritapvah punantu
Vishvam hi ripram pravahanti devirudidabhyah shuchira puta emi

17.11

द्र॒प्सश्च॑स्कन्द प्रथ॒माँ अनु॒ द्यूनि॒मं च॒ योनि॒मनु॒ यश्च॒ पूर्व॑ः ।
स॒मा॒नं योनि॒मनु॑ सं॒चर॑न्तं द्र॒प्सं जु॑हो॒म्यनु॑ स॒प्त होत्रा॑ः ॥११॥

Drapsashchaskanda prathamam anu dyunimam cha yonimanu yashcha purvah
Samanam yonimanu sancharantam drapsam juhomyanu sapta hotrah

17.12

यस्ते॑ द्र॒प्सः स्कन्द॑ति॒ यस्ते॑ अं॒शुर्बा॒हुच्यु॑तो धि॒षणा॑या उ॒पस्था॑त् ।
अ॒ध्व॒र्योर्वा॒ परि॑ वा॒ यः प॒वित्रा॒त्तं ते॑ जुहोमि॒ मन॑सा॒ वष॑ट्कृतम् ॥१२॥

Yaste drapsah skandati yaste anshurbahuchyuto dhishanaya upasthat
Adhvaryorva pari va yah pavitrattam te juhomi manasa vashatkritam

17.13

यस्ते॑ द्र॒प्सः स्क॒न्नो यस्ते॑ अं॒शुर॒वश्च॒ यः प॒रः स्रु॒चा । अ॒यं दे॒वो बृह॒स्पति॒ः सं तं सि॑ञ्चतु॒ राध॑से ॥१३॥

Yaste drapsah skanno yaste anshuravashcha yah parah srucha, ayam devo brihaspatih sam tam sinchatu radhase

17.14

पय॑स्वती॒रोष॑धय॒ः पय॑स्वन्माम॒कं वच॑ः । अ॒पां पय॑स्व॒दित्पय॒स्तेन॑ मा स॒ह शु॑न्धत ॥१४॥

Payasvatiroshadhayah payasvanmamakam vachah, apam payasvaditpayastena ma saha shundhata