Sukta 18

18.1

14 sankusuko yamayanah, 1-4 mrityuh, 5 dhata, 6 tvashta, 7-14 pitrimedhah, 14 prajapatirva, trishtup, 11 prastarapanktih, 13 jagati 14 anushtup

परं॑ मृत्यो॒ अनु॒ परे॑हि॒ पन्थां॒ यस्ते॒ स्व इत॑रो देव॒याना॑त् ।
चक्षु॑ष्मते शृण्व॒ते ते॑ ब्रवीमि॒ मा न॑ः प्र॒जां री॑रिषो॒ मोत वी॒रान् ॥१॥

Param mrityo anu parehi pantham yaste sva itaro devayanat
Chakshushmate shrinvate te bravimi ma nah prajam ririsho mota viran

18.2

मृ॒त्योः प॒दं यो॒पय॑न्तो॒ यदैत॒ द्राघी॑य॒ आयु॑ः प्रत॒रं दधा॑नाः ।
आ॒प्याय॑मानाः प्र॒जया॒ धने॑न शु॒द्धाः पू॒ता भ॑वत यज्ञियासः ॥२॥

Mrityoh padam yopayanto yadaita draghiya ayuh prataram dadhanah
Apyayamanah prajaya dhanena shuddhah puta bhavata yagyiyasah

18.3

इ॒मे जी॒वा वि मृ॒तैराव॑वृत्र॒न्नभू॑द्भ॒द्रा दे॒वहू॑तिर्नो अ॒द्य ।
प्राञ्चो॑ अगाम नृ॒तये॒ हसा॑य॒ द्राघी॑य॒ आयु॑ः प्रत॒रं दधा॑नाः ॥३॥

Ime jiva vi mritairavavritrannabhudbhadra devahutirno adya
Prancho agama nritaye hasaya draghiya ayuh prataram dadhanah

18.4

इ॒मं जी॒वेभ्य॑ः परि॒धिं द॑धामि॒ मैषां॒ नु गा॒दप॑रो॒ अर्थ॑मे॒तम् ।
श॒तं जी॑वन्तु श॒रद॑ः पुरू॒चीर॒न्तर्मृ॒त्युं द॑धतां॒ पर्व॑तेन ॥४॥

Imam jivebhyah paridhim dadhami maisham nu gadaparo arthametam
Shatam jivantu sharadah puruchirantarmrityum dadhatam parvatena

18.5

यथाहा॑न्यनुपू॒र्वं भव॑न्ति॒ यथ॑ ऋ॒तव॑ ऋ॒तुभि॒र्यन्ति॑ सा॒धु ।
यथा॒ न पूर्व॒मप॑रो॒ जहा॑त्ये॒वा धा॑त॒रायूं॑षि कल्पयैषाम् ॥५॥

Yathahanyanupurvam bhavanti yatha ritava ritubhiryanti sadhu
Yatha na purvamaparo jahatyeva dhatarayunshi kalpayaisham

18.6

आ रो॑ह॒तायु॑र्ज॒रसं॑ वृणा॒ना अ॑नुपू॒र्वं यत॑माना॒ यति॒ ष्ठ ।
इ॒ह त्वष्टा॑ सु॒जनि॑मा स॒जोषा॑ दी॒र्घमायु॑ः करति जी॒वसे॑ वः ॥६॥

A rohatayurjarasam vrinana anupurvam yatamana yati shtha
Iha tvashta sujanima sajosha dirghamayuh karati jivase vah

18.7

इ॒मा नारी॑रविध॒वाः सु॒पत्नी॒राञ्ज॑नेन स॒र्पिषा॒ सं वि॑शन्तु ।
अ॒न॒श्रवो॑ऽनमी॒वाः सु॒रत्ना॒ आ रो॑हन्तु॒ जन॑यो॒ योनि॒मग्रे॑ ॥७॥

Ima nariravidhavah supatniranjanena sarpisha sam vishantu
Anashravonamivah suratna a rohantu janayo yonimagre

18.8

उदी॑र्ष्व नार्य॒भि जी॑वलो॒कं ग॒तासु॑मे॒तमुप॑ शेष॒ एहि॑ ।
ह॒स्त॒ग्रा॒भस्य॑ दिधि॒षोस्तवे॒दं पत्यु॑र्जनि॒त्वम॒भि सं ब॑भूथ ॥८॥

Udirshva naryabhi jivalokam gatasumetamupa shesha ehi
Hastagrabhasya didhishostavedam patyurjanitvamabhi sam babhutha

18.9

धनु॒र्हस्ता॑दा॒ददा॑नो मृ॒तस्या॒ऽस्मे क्ष॒त्राय॒ वर्च॑से॒ बला॑य ।
अत्रै॒व त्वमि॒ह व॒यं सु॒वीरा॒ विश्वा॒ः स्पृधो॑ अ॒भिमा॑तीर्जयेम ॥९॥

Dhanurhastadadadano mritasyasme kshatraya varchase balaya
Atraiva tvamiha vayam suvira vishvah spridho abhimatirjayema

18.10

उप॑ सर्प मा॒तरं॒ भूमि॑मे॒तामु॑रु॒व्यच॑सं पृथि॒वीं सु॒शेवा॑म् ।
ऊर्ण॑म्रदा युव॒तिर्दक्षि॑णावत ए॒षा त्वा॑ पातु॒ निॠ॑तेरु॒पस्था॑त् ॥१०॥

Upa sarpa mataram bhumimetamuruvyachasam prithivim sushevam
Urnamrada yuvatirdakshinavata esha tva patu niriterupasthat

18.11

उच्छ्व॑ञ्चस्व पृथिवि॒ मा नि बा॑धथाः सूपाय॒नास्मै॑ भव सूपवञ्च॒ना ।
मा॒ता पु॒त्रं यथा॑ सि॒चाऽभ्ये॑नं भूम ऊर्णुहि ॥११॥

Uchchhvanchasva prithivi ma ni badhathah supayanasmai bhava supavanchana
Mata putram yatha sichabhyenam bhuma urnuhi

18.12

उ॒च्छ्वञ्च॑माना पृथि॒वी सु ति॑ष्ठतु स॒हस्रं॒ मित॒ उप॒ हि श्रय॑न्ताम् ।
ते गृ॒हासो॑ घृत॒श्चुतो॑ भवन्तु वि॒श्वाहा॑स्मै शर॒णाः स॒न्त्वत्र॑ ॥१२॥

Uchchhvanchamana prithivi su tishthatu sahasram mita upa hi shrayantam
Te grihaso ghritashchuto bhavantu vishvahasmai sharanah santvatra

18.13

उत्ते॑ स्तभ्नामि पृथि॒वीं त्वत्परी॒मं लो॒गं नि॒दध॒न्मो अ॒हं रि॑षम् ।
ए॒तां स्थूणां॑ पि॒तरो॑ धारयन्तु॒ तेऽत्रा॑ य॒मः साद॑ना ते मिनोतु ॥१३॥

Utte stabhnami prithivim tvatparimam logam nidadhanmo aham risham
Etam sthunam pitaro dharayantu tetra yamah sadana te minotu

18.14

प्र॒ती॒चीने॒ मामह॒नीष्वा॑ः प॒र्णमि॒वा द॑धुः । प्र॒तीचीं॑ जग्रभा॒ वाच॒मश्वं॑ रश॒नया॑ यथा ॥१४॥

Pratichine mamahanishvah parnamiva dadhuh, pratichim jagrabha vachamashvam rashanaya yatha