সূক্ত 131

131.1

৭ সুকীর্তিঃ কাক্ষীবৎ। ইন্দ্রঃ,৪-৫ অশ্বিনৌ। ত্রিষ্টুপ্ , ৪ অনুষ্টুপ্।

অপ প্রাচ ইন্দ্র বিশ্বাঁ অমিত্রানপাপাচো অভিভূতে নুদস্ব ।
অপোদীচো অপ শূরাধরাচ উরৌ যথা তব শর্মন্মদেম ॥১॥

131.2

কুবিদঙ্গ যবমন্তো যবং চিদ্যথা দান্ত্যনুপূর্বং বিয়ূয় ।
ইহেহৈষাং কৃণুহি ভোজনানি যে বর্হিষো নমোবৃক্তিং ন জগ্মুঃ ॥২॥

131.3

নহি স্থূর্যৃতুথা যাতমস্তি নোত শ্রবো বিবিদে সংগমেষু ।
গব্যন্ত ইন্দ্রং সখ্যায় বিপ্রা অশ্বায়ন্তো বৃষণং বাজয়ন্তঃ ॥৩॥

131.4

যুবং সুরামমশ্বিনা নমুচাবাসুরে সচা । বিপিপানা শুভস্পতী ইন্দ্রং কর্মস্বাবতম্ ॥৪॥

131.5

পুত্রমিব পিতরাবশ্বিনোভেন্দ্রাবথুঃ কাব্যৈর্দংসনাভিঃ ।
যত্সুরামং ব্যপিবঃ শচীভিঃ সরস্বতী ত্বা মঘবন্নভিষ্ণক্ ॥৫॥

131.6

ইন্দ্রঃ সুত্রামা স্ববাঁ অবোভিঃ সুমৃলীকো ভবতু বিশ্ববেদাঃ ।
বাধতাং দ্বেষো অভয়ং কৃণোতু সুবীর্যস্য পতয়ঃ স্যাম ॥৬॥

131.7

তস্য বয়ং সুমতৌ যজ্ঞিয়স্যাঽপি ভদ্রে সৌমনসে স্যাম ।
স সুত্রামা স্ববাঁ ইন্দ্রো অস্মে আরাচ্চিদ্দ্বেষঃ সনুতর্যুয়োতু ॥৭॥