সূক্ত 132

132.1

৭ শকপূতো নার্মেধঃ। মিত্রাবরুণৌ, ১ দ্যুভূম্যশ্বিনঃ। বিরাড্রূপা, ১ ন্যঙ্কুসারিণী, ২,৬ প্রস্তারপংক্তিঃ, ৭ মহাসতোবৃহতী।

ঈজানমিদ্দ্যৌর্গূর্তাবসুরীজানং ভূমিরভি প্রভূষণি ।
ঈজানং দেবাবশ্বিনাবভি সুম্নৈরবর্ধতাম্ ॥১॥

132.2

তা বাং মিত্রাবরুণা ধারয়ত্ক্ষিতী সুষুম্নেষিতত্বতা যজামসি ।
যুবোঃ ক্রাণায় সখ্যৈরভি ষ্যাম রক্ষসঃ ॥২॥

132.3

অধা চিন্নু যদ্দিধিষামহে বামভি প্রিয়ং রেক্ণঃ পত্যমানাঃ ।
দদ্বাঁ বা যত্পুষ্যতি রেক্ণঃ সম্বারন্নকিরস্য মঘানি ॥৩॥

132.4

অসাবন্যো অসুর সূয়ত দ্যৌস্ত্বং বিশ্বেষাং বরুণাসি রাজা ।
মূর্ধা রথস্য চাকন্নৈতাবতৈনসান্তকধ্রুক্ ॥৪॥

132.5

অস্মিন্ত্স্বে৩তচ্ছকপূত এনো হিতে মিত্রে নিগতান্হন্তি বীরান্ ।
অবোর্বা যদ্ধাত্তনূষ্ববঃ প্রিয়াসু যজ্ঞিয়াস্বর্বা ॥৫॥

132.6

যুবোর্হি মাতাদিতির্বিচেতসা দ্যৌর্ন ভূমিঃ পয়সা পুপূতনি ।
অব প্রিয়া দিদিষ্টন সূরো নিনিক্ত রশ্মিভিঃ ॥৬॥

132.7

যুবং হ্যপ্নরাজাবসীদতং তিষ্ঠদ্রথং ন ধূর্ষদং বনর্ষদম্ ।
তা নঃ কণূকয়ন্তীর্নৃমেধস্তত্রে অংহসঃ সুমেধস্তত্রে অংহসঃ ॥৭॥