Sukta 131

131.1

7 sukirtih kakshivat, indrah, 4-5 ashvinau, trishtup, 4 anushtup

अप॒ प्राच॑ इन्द्र॒ विश्वाँ॑ अ॒मित्रा॒नपापा॑चो अभिभूते नुदस्व ।
अपोदी॑चो॒ अप॑ शूराध॒राच॑ उ॒रौ यथा॒ तव॒ शर्म॒न्मदे॑म ॥१॥

Apa pracha indra vishvam amitranapapacho abhibhute nudasva
Apodicho apa shuradharacha urau yatha tava sharmanmadema

कु॒विद॒ङ्ग यव॑मन्तो॒ यवं॑ चि॒द्यथा॒ दान्त्य॑नुपू॒र्वं वि॒यूय॑ ।
इ॒हेहै॑षां कृणुहि॒ भोज॑नानि॒ ये ब॒र्हिषो॒ नमो॑वृक्तिं॒ न ज॒ग्मुः ॥२॥

Kuvidanga yavamanto yavam chidyatha dantyanupurvam viyuya
Ihehaisham krinuhi bhojanani ye barhisho namovriktim na jagmuh

न॒हि स्थूर्यृ॑तु॒था या॒तमस्ति॒ नोत श्रवो॑ विविदे संग॒मेषु॑ ।
ग॒व्यन्त॒ इन्द्रं॑ स॒ख्याय॒ विप्रा॑ अश्वा॒यन्तो॒ वृष॑णं वा॒जय॑न्तः ॥३॥

Nahi sthuryritutha yatamasti nota shravo vivide sangameshu
Gavyanta indram sakhyaya vipra ashvayanto vrishanam vajayantah

यु॒वं सु॒राम॑मश्विना॒ नमु॑चावासु॒रे सचा॑ । वि॒पि॒पा॒ना शु॑भस्पती॒ इन्द्रं॒ कर्म॑स्वावतम् ॥४॥

Yuvam suramamashvina namuchavasure sacha, vipipana shubhaspati indram karmasvavatam

पु॒त्रमि॑व पि॒तरा॑व॒श्विनो॒भेन्द्रा॒वथु॒ः काव्यै॑र्दं॒सना॑भिः ।
यत्सु॒रामं॒ व्यपि॑ब॒ः शची॑भि॒ः सर॑स्वती त्वा मघवन्नभिष्णक् ॥५॥

Putramiva pitaravashvinobhendravathuh kavyairdansanabhih
Yatsuramam vyapibah shachibhih sarasvati tva maghavannabhishnak

इन्द्र॑ः सु॒त्रामा॒ स्ववाँ॒ अवो॑भिः सुमृळी॒को भ॑वतु वि॒श्ववे॑दाः ।
बाध॑तां॒ द्वेषो॒ अभ॑यं कृणोतु सु॒वीर्य॑स्य॒ पत॑यः स्याम ॥६॥

Indrah sutrama svavam avobhih sumriliko bhavatu vishvavedah
Badhatam dvesho abhayam krinotu suviryasya patayah syama

तस्य॑ व॒यं सु॑म॒तौ य॒ज्ञिय॒स्याऽपि॑ भ॒द्रे सौ॑मन॒से स्या॑म ।
स सु॒त्रामा॒ स्ववाँ॒ इन्द्रो॑ अ॒स्मे आ॒राच्चि॒द्द्वेष॑ः सनु॒तर्यु॑योतु ॥७॥

Tasya vayam sumatau yagyiyasyapi bhadre saumanase syama
Sa sutrama svavam indro asme arachchiddveshah sanutaryuyotu