সূক্ত 117

117.1

৯ ভিক্ষুরাংগিরসঃ। ধনান্নদানং। ত্রিষ্টুপ্ , ১-২ জগতী।

ন বা উ দেবাঃ ক্ষুধমিদ্বধং দদুরুতাশিতমুপ গচ্ছন্তি মৃত্যবঃ ।
উতো রয়িঃ পৃণতো নোপ দস্যত্যুতাপৃণন্মর্ডিতারং ন বিন্দতে ॥১॥

য আধ্রায় চকমানায় পিত্বোঽন্নবান্ত্সন্রফিতায়োপজগ্মুষে ।
স্থিরং মনঃ কৃণুতে সেবতে পুরোতো চিত্স মর্ডিতারং ন বিন্দতে ॥২॥

স ইদ্ভোজো যো গৃহবে দদাত্যন্নকামায় চরতে কৃশায় ।
অরমস্মৈ ভবতি যামহূতা উতাপরীষু কৃণুতে সখায়ম্ ॥৩॥

ন স সখা যো ন দদাতি সখ্যে সচাভুবে সচমানায় পিত্বঃ ।
অপাস্মাত্প্রেয়ান্ন তদোকো অস্তি পৃণন্তমন্যমরণং চিদিচ্ছেৎ ॥৪॥

পৃণীয়াদিন্নাধমানায় তব্যান্দ্রাঘীয়াংসমনু পশ্যেত পন্থাম্ ।
ও হি বর্তন্তে রথ্যেব চক্রাঽন্যমন্যমুপ তিষ্ঠন্ত রায়ঃ ॥৫॥

মোঘমন্নং বিন্দতে অপ্রচেতাঃ সত্যং ব্রবীমি বধ ইত্স তস্য ।
নার্যমণং পুষ্যতি নো সখায়ং কেবলাঘো ভবতি কেবলাদী ॥৬॥

কৃষন্নিত্ফাল আশিতং কৃণোতি যন্নধ্বানমপ বৃঙ্ক্তে চরিত্রৈঃ ।
বদন্ব্রহ্মাবদতো বনীয়ান্পৃণন্নাপিরপৃণন্তমভি ষ্যাৎ ॥৭॥

একপাদ্ভূয়ো দ্বিপদো বি চক্রমে দ্বিপাত্ত্রিপাদমভ্যেতি পশ্চাৎ ।
চতুষ্পাদেতি দ্বিপদামভিস্বরে সম্পশ্যন্পঙ্ক্তীরুপতিষ্ঠমানঃ ॥৮॥

সমৌ চিদ্ধস্তৌ ন সমং বিবিষ্টঃ সম্মাতরা চিন্ন সমং দুহাতে ।
যময়োশ্চিন্ন সমা বীর্যাণি জ্ঞাতী চিত্সন্তৌ ন সমং পৃণীতঃ ॥৯॥