Sukta 117

117.1

9 bhikshurangirasah, dhanannadanam, trishtup, 1-2 jagati

न वा उ॑ दे॒वाः क्षुध॒मिद्व॒धं द॑दुरु॒ताशि॑त॒मुप॑ गच्छन्ति मृ॒त्यव॑ः ।
उ॒तो र॒यिः पृ॑ण॒तो नोप॑ दस्यत्यु॒तापृ॑णन्मर्डि॒तारं॒ न वि॑न्दते ॥१॥

Na va u devah kshudhamidvadham dadurutashitamupa gachchhanti mrityavah
Uto rayih prinato nopa dasyatyutaprinanmarditaram na vindate

117.2

य आ॒ध्राय॑ चकमा॒नाय॑ पि॒त्वोऽन्न॑वा॒न्त्सन्र॑फि॒तायो॑पज॒ग्मुषे॑ ।
स्थि॒रं मन॑ः कृणु॒ते सेव॑ते पु॒रोतो चि॒त्स म॑र्डि॒तारं॒ न वि॑न्दते ॥२॥

Ya adhraya chakamanaya pitvonnavantsanraphitayopajagmushe
Sthiram manah krinute sevate puroto chitsa marditaram na vindate

117.3

स इद्भो॒जो यो गृ॒हवे॒ ददा॒त्यन्न॑कामाय॒ चर॑ते कृ॒शाय॑ ।
अर॑मस्मै भवति॒ याम॑हूता उ॒ताप॒रीषु॑ कृणुते॒ सखा॑यम् ॥३॥

Sa idbhojo yo grihave dadatyannakamaya charate krishaya
Aramasmai bhavati yamahuta utaparishu krinute sakhayam

117.4

न स सखा॒ यो न ददा॑ति॒ सख्ये॑ सचा॒भुवे॒ सच॑मानाय पि॒त्वः ।
अपा॑स्मा॒त्प्रेया॒न्न तदोको॑ अस्ति पृ॒णन्त॑म॒न्यमर॑णं चिदिच्छेत् ॥४॥

Na sa sakha yo na dadati sakhye sachabhuve sachamanaya pitvah
Apasmatpreyanna tadoko asti prinantamanyamaranam chidichchhet

117.5

पृ॒णी॒यादिन्नाध॑मानाय॒ तव्या॒न्द्राघी॑यांस॒मनु॑ पश्येत॒ पन्था॑म् ।
ओ हि वर्त॑न्ते॒ रथ्ये॑व च॒क्राऽन्यम॑न्य॒मुप॑ तिष्ठन्त॒ राय॑ः ॥५॥

Priniyadinnadhamanaya tavyandraghiyansamanu pashyeta pantham
O hi vartante rathyeva chakranyamanyamupa tishthanta rayah

117.6

मोघ॒मन्नं॑ विन्दते॒ अप्र॑चेताः स॒त्यं ब्र॑वीमि व॒ध इत्स तस्य॑ ।
नार्य॒मणं॒ पुष्य॑ति॒ नो सखा॑यं॒ केव॑लाघो भवति केवला॒दी ॥६॥

Moghamannam vindate aprachetah satyam bravimi vadha itsa tasya
Naryamanam pushyati no sakhayam kevalagho bhavati kevaladi

117.7

कृ॒षन्नित्फाल॒ आशि॑तं कृणोति॒ यन्नध्वा॑न॒मप॑ वृङ्क्ते च॒रित्रै॑ः ।
वद॑न्ब्र॒ह्माव॑दतो॒ वनी॑यान्पृ॒णन्ना॒पिरपृ॑णन्तम॒भि ष्या॑त् ॥७॥

Krishannitphala ashitam krinoti yannadhvanamapa vrinkte charitraih
Vadanbrahmavadato vaniyanprinannapiraprinantamabhi shyat

117.8

एक॑पा॒द्भूयो॑ द्वि॒पदो॒ वि च॑क्रमे द्वि॒पात्त्रि॒पाद॑म॒भ्ये॑ति प॒श्चात् ।
चतु॑ष्पादेति द्वि॒पदा॑मभिस्व॒रे स॒म्पश्य॑न्प॒ङ्क्तीरु॑प॒तिष्ठ॑मानः ॥८॥

Ekapadbhuyo dvipado vi chakrame dvipattripadamabhyeti pashchat
Chatushpadeti dvipadamabhisvare sampashyanpanktirupatishthamanah

117.9

स॒मौ चि॒द्धस्तौ॒ न स॒मं वि॑विष्टः सम्मा॒तरा॑ चि॒न्न स॒मं दु॑हाते ।
य॒मयो॑श्चि॒न्न स॒मा वी॒र्या॑णि ज्ञा॒ती चि॒त्सन्तौ॒ न स॒मं पृ॑णीतः ॥९॥

Samau chiddhastau na samam vivishtah sammatara chinna samam duhate
Yamayoshchinna sama viryani gyati chitsantau na samam prinitah