সূক্ত 115

115.1

৯ বার্ষ্টিহব্য উপস্তুতঃ। অগ্নিঃ।জগতী, ৮ ত্রিষ্টুপ্, ৯ শক্করী।

চিত্র ইচ্ছিশোস্তরুণস্য বক্ষথো ন যো মাতরাবপ্যেতি ধাতবে ।
অনূধা যদি জীজনদধা চ নু ববক্ষ সদ্যো মহি দূত্যং১ চরন্ ॥১॥

অগ্নির্হ নাম ধায়ি দন্নপস্তমঃ সং যো বনা যুবতে ভস্মনা দতা ।
অভিপ্রমুরা জুহ্বা স্বধ্বর ইনো ন প্রোথমানো যবসে বৃষা ॥২॥

তং বো বিং ন দ্রুষদং দেবমন্ধস ইন্দুং প্রোথন্তং প্রবপন্তমর্ণবম্ ।
আসা বহ্নিং ন শোচিষা বিরপ্শিনং মহিব্রতং ন সরজন্তমধ্বনঃ ॥৩॥

বি যস্য তে জ্রয়সানস্যাজর ধক্ষোর্ন বাতাঃ পরি সন্ত্যচ্যুতাঃ ।
আ রণ্বাসো যুয়ুধয়ো ন সত্বনং ত্রিতং নশন্ত প্র শিষন্ত ইষ্টয়ে ॥৪॥

স ইদগ্নিঃ কণ্বতমঃ কণ্বসখাঽর্যঃ পরস্যান্তরস্য তরুষঃ ।
অগ্নিঃ পাতু গৃণতো অগ্নিঃ সূরীনগ্নির্দদাতু তেষামবো নঃ ॥৫॥

বাজিন্তমায় সহ্যসে সুপিত্র্য তৃষু চ্যবানো অনু জাতবেদসে ।
অনুদ্রে চিদ্যো ধৃষতা বরং সতে মহিন্তমায় ধন্বনেদবিষ্যতে ॥৬॥

এবাগ্নির্মর্তৈঃ সহ সূরিভির্বসুঃ ষ্টবে সহসঃ সূনরো নৃভিঃ ।
মিত্রাসো ন যে সুধিতা ঋতায়বো দ্যাবো ন দ্যুম্নৈরভি সন্তি মানুষান্ ॥৭॥

ঊর্জো নপাত্সহসাবন্নিতি ত্বোপস্তুতস্য বন্দতে বৃষা বাক্ ।
ত্বাং স্তোষাম ত্বয়া সুবীরা দ্রাঘীয় আয়ুঃ প্রতরং দধানাঃ ॥৮॥

ইতি ত্বাগ্নে বৃষ্টিহব্যস্য পুত্রা উপস্তুতাস ঋষয়োঽবোচন্ ।
তাঁশ্চ পাহি গৃণতশ্চ সূরীন্বষড্বষলিত্যূর্ধ্বাসো অনক্ষন্নমো নম ইত্যূর্ধ্বাসো অনক্ষন্ ॥৯॥