Sukta 115

115.1

9 varshtihavya upastutah, agnih, jagati, 8 trishtup, 9 shakkari

चि॒त्र इच्छिशो॒स्तरु॑णस्य व॒क्षथो॒ न यो मा॒तरा॑व॒प्येति॒ धात॑वे ।
अ॒नू॒धा यदि॒ जीज॑न॒दधा॑ च॒ नु व॒वक्ष॑ स॒द्यो महि॑ दू॒त्यं१ चर॑न् ॥१॥

Chitra ichchhishostarunasya vakshatho na yo mataravapyeti dhatave
Anudha yadi jijanadadha cha nu vavaksha sadyo mahi dutyan1 charan

115.2

अ॒ग्निर्ह॒ नाम॑ धायि॒ दन्न॒पस्त॑म॒ः सं यो वना॑ यु॒वते॒ भस्म॑ना द॒ता ।
अ॒भि॒प्र॒मुरा॑ जु॒ह्वा॑ स्वध्व॒र इ॒नो न प्रोथ॑मानो॒ यव॑से॒ वृषा॑ ॥२॥

Agnirha nama dhayi dannapastamah sam yo vana yuvate bhasmana data
Abhipramura juhva svadhvara ino na prothamano yavase vrisha

115.3

तं वो॒ विं न द्रु॒षदं॑ दे॒वमन्ध॑स॒ इन्दुं॒ प्रोथ॑न्तं प्र॒वप॑न्तमर्ण॒वम् ।
आ॒सा वह्निं॒ न शो॒चिषा॑ विर॒प्शिनं॒ महि॑व्रतं॒ न स॒रज॑न्त॒मध्व॑नः ॥३॥

Tam vo vim na drushadam devamandhasa indum prothantam pravapantamarnavam
Asa vahnim na shochisha virapshinam mahivratam na sarajantamadhvanah

115.4

वि यस्य॑ ते ज्रयसा॒नस्या॑जर॒ धक्षो॒र्न वाता॒ः परि॒ सन्त्यच्यु॑ताः ।
आ र॒ण्वासो॒ युयु॑धयो॒ न स॑त्व॒नं त्रि॒तं न॑शन्त॒ प्र शि॒षन्त॑ इ॒ष्टये॑ ॥४॥

Vi yasya te jrayasanasyajara dhakshorna vatah pari santyachyutah
A ranvaso yuyudhayo na satvanam tritam nashanta pra shishanta ishtaye

115.5

स इद॒ग्निः कण्व॑तम॒ः कण्व॑सखा॒ऽर्यः पर॒स्यान्त॑रस्य॒ तरु॑षः ।
अ॒ग्निः पा॑तु गृण॒तो अ॒ग्निः सू॒रीन॒ग्निर्द॑दातु॒ तेषा॒मवो॑ नः ॥५॥

Sa idagnih kanvatamah kanvasakharyah parasyantarasya tarushah
Agnih patu grinato agnih surinagnirdadatu teshamavo nah

115.6

वा॒जिन्त॑माय॒ सह्य॑से सुपित्र्य तृ॒षु च्यवा॑नो॒ अनु॑ जा॒तवे॑दसे ।
अ॒नु॒द्रे चि॒द्यो धृ॑ष॒ता वरं॑ स॒ते म॒हिन्त॑माय॒ धन्व॒नेद॑विष्य॒ते ॥६॥

Vajintamaya sahyase supitrya trishu chyavano anu jatavedase
Anudre chidyo dhrishata varam sate mahintamaya dhanvanedavishyate

115.7

ए॒वाग्निर्मर्तै॑ः स॒ह सू॒रिभि॒र्वसु॑ः ष्टवे॒ सह॑सः सू॒नरो॒ नृभि॑ः ।
मि॒त्रासो॒ न ये सुधि॑ता ऋता॒यवो॒ द्यावो॒ न द्यु॒म्नैर॒भि सन्ति॒ मानु॑षान् ॥७॥

Evagnirmartaih saha suribhirvasuh shtave sahasah sunaro nribhih
Mitraso na ye sudhita ritayavo dyavo na dyumnairabhi santi manushan

115.8

ऊर्जो॑ नपात्सहसाव॒न्निति॑ त्वोपस्तु॒तस्य॑ वन्दते॒ वृषा॒ वाक् ।
त्वां स्तो॑षाम॒ त्वया॑ सु॒वीरा॒ द्राघी॑य॒ आयु॑ः प्रत॒रं दधा॑नाः ॥८॥

Urjo napatsahasavanniti tvopastutasya vandate vrisha vak
Tvam stoshama tvaya suvira draghiya ayuh prataram dadhanah

115.9

इति॑ त्वाग्ने वृष्टि॒हव्य॑स्य पु॒त्रा उ॑पस्तु॒तास॒ ऋष॑योऽवोचन् ।
ताँश्च॑ पा॒हि गृ॑ण॒तश्च॑ सू॒रीन्वष॒ड्वष॒ळित्यू॒र्ध्वासो॑ अनक्ष॒न्नमो॒ नम॒ इत्यू॒र्ध्वासो॑ अनक्षन् ॥९॥

Iti tvagne vrishtihavyasya putra upastutasa rishayovochan
Tanshcha pahi grinatashcha surinvashadvashalityurdhvaso anakshannamo nama ityurdhvaso anakshan