সূক্ত 114

114.1

১০ বৈরূপঃ সধ্রিঃ, তাপসো ধর্মো বা। বিশ্বে দেবাঃ।ত্রিষ্টুপ্, ৪ জগতী।

ঘর্মা সমন্তা ত্রিবৃতং ব্যাপতুস্তয়োর্জুষ্টিং মাতরিশ্বা জগাম ।
দিবস্পয়ো দিধিষাণা অবেষন্বিদুর্দেবাঃ সহসামানমর্কম্ ॥১॥

তিস্রো দেষ্ট্রায় নিৠতীরুপাসতে দীর্ঘশ্রুতো বি হি জানন্তি বহ্নয়ঃ ।
তাসাং নি চিক্যুঃ কবয়ো নিদানং পরেষু যা গুহ্যেষু ব্রতেষু ॥২॥

চতুষ্কপর্দা যুবতিঃ সুপেশা ঘৃতপ্রতীকা বয়ুনানি বস্তে ।
তস্যাং সুপর্ণা বৃষণা নি ষেদতুর্যত্র দেবা দধিরে ভাগধেয়ম্ ॥৩॥

একঃ সুপর্ণঃ স সমুদ্রমা বিবেশ স ইদং বিশ্বং ভুবনং বি চষ্টে ।
তং পাকেন মনসাপশ্যমন্তিতস্তং মাতা রেল্হি স উ রেল্হি মাতরম্ ॥৪॥

সুপর্ণং বিপ্রাঃ কবয়ো বচোভিরেকং সন্তং বহুধা কল্পয়ন্তি ।
ছন্দাংসি চ দধতো অধ্বরেষু গ্রহান্ত্সোমস্য মিমতে দ্বাদশ ॥৫॥

ষট্ত্রিংশাঁশ্চ চতুরঃ কল্পয়ন্তশ্ছন্দাংসি চ দধত আদ্বাদশম্ ।
যজ্ঞং বিমায় কবয়ো মনীষ ঋক্সামাভ্যাং প্র রথং বর্তয়ন্তি ॥৬॥

চতুর্দশান্যে মহিমানো অস্য তং ধীরা বাচা প্র ণয়ন্তি সপ্ত ।
আপ্নানং তীর্থং ক ইহ প্র বোচদ্যেন পথা প্রপিবন্তে সুতস্য ॥৭॥

সহস্রধা পঞ্চদশান্যুক্থা যাবদ্দ্যাবাপৃথিবী তাবদিত্তৎ ।
সহস্রধা মহিমানঃ সহস্রং যাবদ্ব্রহ্ম বিষ্ঠিতং তাবতী বাক্ ॥৮॥

কশ্ছন্দসাং যোগমা বেদ ধীরঃ কো ধিষ্ণ্যাং প্রতি বাচং পপাদ ।
কমৃত্বিজামষ্টমং শূরমাহুর্হরী ইন্দ্রস্য নি চিকায় কঃ স্বিৎ ॥৯॥

ভূম্যা অন্তং পর্যেকে চরন্তি রথস্য ধূর্ষু যুক্তাসো অস্থুঃ ।
শ্রমস্য দায়ং বি ভজন্ত্যেভ্যো যদা যমো ভবতি হর্ম্যে হিতঃ ॥১০॥