সূক্ত 113

113.1

১০ বৈরূপঃ শতপ্রভেদনঃ। ইন্দ্রঃ। জগতী, ১০ ত্রিষ্টুপ্।

তমস্য দ্যাবাপৃথিবী সচেতসা বিশ্বেভির্দেবৈরনু শুষ্মমাবতাম্ ।
যদৈত্কৃণ্বানো মহিমানমিন্দ্রিয়ং পীত্বী সোমস্য ক্রতুমাঁ অবর্ধত ॥১॥

113.2

তমস্য বিষ্ণুর্মহিমানমোজসাংঽশুং দধন্বান্মধুনো বি রপ্শতে ।
দেবেভিরিন্দ্রো মঘবা সয়াবভির্বৃত্রং জঘন্বাঁ অভবদ্বরেণ্যঃ ॥২॥

113.3

বৃত্রেণ যদহিনা বিভ্রদায়ুধা সমস্থিথা যুধয়ে শংসমাবিদে ।
বিশ্বে তে অত্র মরুতঃ সহ ত্মনাঽবর্ধন্নুগ্র মহিমানমিন্দ্রিয়ম্ ॥৩॥

113.4

জজ্ঞান এব ব্যবাধত স্পৃধঃ প্রাপশ্যদ্বীরো অভি পৌংস্যং রণম্ ।
অবৃশ্চদদ্রিমব সস্যদঃ সৃজদস্তভ্নান্নাকং স্বপস্যয়া পৃথুম্ ॥৪॥

113.5

আদিন্দ্রঃ সত্রা তবিষীরপত্যত বরীয়ো দ্যাবাপৃথিবী অবাধত ।
অবাভরদ্ধৃষিতো বজ্রমায়সং শেবং মিত্রায় বরুণায় দাশুষে ॥৫॥

113.6

ইন্দ্রস্যাত্র তবিষীভ্যো বিরপ্শিন ঋঘায়তো অরংহয়ন্ত মন্যবে ।
বৃত্রং যদুগ্রো ব্যবৃশ্চদোজসাঽপো বিভ্রতং তমসা পরীবৃতম্ ॥৬॥

113.7

যা বীর্যাণি প্রথমানি কর্ত্বা মহিত্বেভির্যতমানৌ সমীয়তুঃ ।
ধ্বান্তং তমোঽব দধ্বসে হত ইন্দ্রো মহ্না পূর্বহূতাবপত্যত ॥৭॥

113.8

বিশ্বে দেবাসো অধ বৃষ্ণ্যানি তেঽবর্ধয়ন্ত্সোমবত্যা বচস্যয়া ।
রদ্ধং বৃত্রমহিমিন্দ্রস্য হন্মনাঽগ্নির্ন জম্ভৈস্তৃষ্বন্নমাবয়ৎ ॥৮॥

113.9

ভূরি দক্ষেভির্বচনেভিৠক্বভিঃ সখ্যেভিঃ সখ্যানি প্র বোচত ।
ইন্দ্রো ধুনিং চ চুমুরিং চ দম্ভয়ঞ্ছ্রদ্ধামনস্যা শৃণুতে দভীতয়ে ॥৯॥

113.10

ত্বং পুরূণ্যা ভরা স্বশ্ব্যা যেভির্মংসৈ নিবচনানি শংসন্ ।
সুগেভির্বিশ্বা দুরিতা তরেম বিদো ষু ণ উর্বিয়া গাধমদ্য ॥১০॥