Sukta 113

113.1

10 vairupah shataprabhedanah, indrah, jagati, 10 trishtup

तम॑स्य॒ द्यावा॑पृथि॒वी सचे॑तसा॒ विश्वे॑भिर्दे॒वैरनु॒ शुष्म॑मावताम् ।
यदैत्कृ॑ण्वा॒नो म॑हि॒मान॑मिन्द्रि॒यं पी॒त्वी सोम॑स्य॒ क्रतु॑माँ अवर्धत ॥१॥

Tamasya dyavaprithivi sachetasa vishvebhirdevairanu shushmamavatam
Yadaitkrinvano mahimanamindriyam pitvi somasya kratumam avardhata

113.2

तम॑स्य॒ विष्णु॑र्महि॒मान॒मोज॑सां॒ऽशुं द॑ध॒न्वान्मधु॑नो॒ वि र॑प्शते ।
दे॒वेभि॒रिन्द्रो॑ म॒घवा॑ स॒याव॑भिर्वृ॒त्रं ज॑घ॒न्वाँ अ॑भव॒द्वरे॑ण्यः ॥२॥

Tamasya vishnurmahimanamojasanshum dadhanvanmadhuno vi rapshate
Devebhirindro maghava sayavabhirvritram jaghanvam abhavadvarenyah

113.3

वृ॒त्रेण॒ यदहि॑ना॒ बिभ्र॒दायु॑धा स॒मस्थि॑था यु॒धये॒ शंस॑मा॒विदे॑ ।
विश्वे॑ ते॒ अत्र॑ म॒रुत॑ः स॒ह त्मनाऽव॑र्धन्नुग्र महि॒मान॑मिन्द्रि॒यम् ॥३॥

Vritrena yadahina bibhradayudha samasthitha yudhaye shansamavide
Vishve te atra marutah saha tmanavardhannugra mahimanamindriyam

113.4

ज॒ज्ञा॒न ए॒व व्य॑बाधत॒ स्पृध॒ः प्राप॑श्यद्वी॒रो अ॒भि पौंस्यं॒ रण॑म् ।
अवृ॑श्च॒दद्रि॒मव॑ स॒स्यद॑ः सृज॒दस्त॑भ्ना॒न्नाकं॑ स्वप॒स्यया॑ पृ॒थुम् ॥४॥

Jagyana eva vyabadhata spridhah prapashyadviro abhi paunsyam ranam
Avrishchadadrimava sasyadah srijadastabhnannakam svapasyaya prithum

113.5

आदिन्द्र॑ः स॒त्रा तवि॑षीरपत्यत॒ वरी॑यो॒ द्यावा॑पृथि॒वी अ॑बाधत ।
अवा॑भरद्धृषि॒तो वज्र॑माय॒सं शेवं॑ मि॒त्राय॒ वरु॑णाय दा॒शुषे॑ ॥५॥

Adindrah satra tavishirapatyata variyo dyavaprithivi abadhata
Avabharaddhrishito vajramayasam shevam mitraya varunaya dashushe

113.6

इन्द्र॒स्यात्र॒ तवि॑षीभ्यो विर॒प्शिन॑ ऋघाय॒तो अ॑रंहयन्त म॒न्यवे॑ ।
वृ॒त्रं यदु॒ग्रो व्यवृ॑श्च॒दोज॑सा॒ऽपो बिभ्र॑तं॒ तम॑सा॒ परी॑वृतम् ॥६॥

Indrasyatra tavishibhyo virapshina righayato aranhayanta manyave
Vritram yadugro vyavrishchadojasapo bibhratam tamasa parivritam

113.7

या वी॒र्या॑णि प्रथ॒मानि॒ कर्त्वा॑ महि॒त्वेभि॒र्यत॑मानौ समी॒यतु॑ः ।
ध्वा॒न्तं तमोऽव॑ दध्वसे ह॒त इन्द्रो॑ म॒ह्ना पू॒र्वहू॑तावपत्यत ॥७॥

Ya viryani prathamani kartva mahitvebhiryatamanau samiyatuh
Dhvantam tamova dadhvase hata indro mahna purvahutavapatyata

113.8

विश्वे॑ दे॒वासो॒ अध॒ वृष्ण्या॑नि॒ तेऽव॑र्धय॒न्त्सोम॑वत्या वच॒स्यया॑ ।
र॒द्धं वृ॒त्रमहि॒मिन्द्र॑स्य॒ हन्म॑ना॒ऽग्निर्न जम्भै॑स्तृ॒ष्वन्न॑मावयत् ॥८॥

Vishve devaso adha vrishnyani tevardhayantsomavatya vachasyaya
Raddham vritramahimindrasya hanmanagnirna jambhaistrishvannamavayat

113.9

भूरि॒ दक्षे॑भिर्वच॒नेभि॒ॠक्व॑भिः स॒ख्येभि॑ः स॒ख्यानि॒ प्र वो॑चत ।
इन्द्रो॒ धुनिं॑ च॒ चुमु॑रिं च द॒म्भय॑ञ्छ्रद्धामन॒स्या शृ॑णुते द॒भीत॑ये ॥९॥

Bhuri dakshebhirvachanebhirikvabhih sakhyebhih sakhyani pra vochata
Indro dhunim cha chumurim cha dambhayanchhraddhamanasya shrinute dabhitaye

113.10

त्वं पु॒रूण्या भ॑रा॒ स्वश्व्या॒ येभि॒र्मंसै॑ नि॒वच॑नानि॒ शंस॑न् ।
सु॒गेभि॒र्विश्वा॑ दुरि॒ता त॑रेम वि॒दो षु ण॑ उर्वि॒या गा॒धम॒द्य ॥१०॥

Tvam purunya bhara svashvya yebhirmansai nivachanani shansan
Sugebhirvishva durita tarema vido shu na urviya gadhamadya