সূক্ত 81

81.1

৯ গোতমো রাহূগণঃ। ইন্দ্রঃ। পংক্তিঃ।

ইন্দ্রো মদায় বাবৃধে শবসে বৃত্রহা নৃভিঃ ।
তমিন্মহত্স্বাজিষূতেমর্ভে হবামহে স বাজেষু প্র নোঽবিষৎ ॥১॥

81.2

অসি হি বীর সেন্যো ঽসি ভূরি পরাদদিঃ ।
অসি দভ্রস্য চিদ্ বৃধো যজমানায় শিক্ষসি সুন্বতে ভূরি তে বসু ॥২॥

81.3

যদুদীরত আজয়ো ধৃষ্ণবে ধীয়তে ধনা ।
যুক্ষ্বা মদচ্যুতা হরী কং হনঃ কং বসৌ দধো ঽস্মাঁ ইন্দ্র বসৌ দধঃ ॥৩॥

81.4

ক্রত্বা মহাঁ অনুষ্বধং ভীম আ বাবৃধে শবঃ ।
শ্রিয় ঋষ্ব উপাকয়োর্নি শিপ্রী হরিবান্ দধে হস্তয়োর্বজ্রমায়সম্ ॥৪॥

81.5

আ পপ্রৌ পার্থিবং রজো বদ্বধে রোচনা দিবি ।
ন ত্বাবাঁ ইন্দ্র কশ্চন ন জাতো ন জনিষ্যতে ঽতি বিশ্বং ববক্ষিথ ॥৫॥

81.6

যো অর্যো মর্তভোজনং পরাদদাতি দাশুষে ।
ইন্দ্রো অস্মভ্যং শিক্ষতু বি ভজা ভূরি তে বসু ভক্ষীয় তব রাধসঃ ॥৬॥

81.7

মদেমদে হি নো দদির্যূথা গবামৃজুক্রতুঃ ।
সং গৃভায় পুরূ শতোভয়াহস্ত্যা বসু শিশীহি রায় আ ভর ॥৭॥

81.8

মাদয়স্ব সুতে সচা শবসে শূর রাধসে ।
বিদ্মা হি ত্বা পুরূবসুমুপ কামান্ত্সসৃজ্মহে ঽথা নোঽবিতা ভব ॥৮॥

81.9

এতে ত ইন্দ্র জন্তবো বিশ্বং পুষ্যন্তি বার্যম্ ।
অন্তর্হি খ্যো জনানামর্যো বেদো অদাশুষাং তেষাং নো বেদ আ ভর ॥৯॥