Sukta 81

81.1

9 gotamo rahuganah, indrah, panktih

इन्द्रो॒ मदा॑य वावृधे॒ शव॑से वृत्र॒हा नृभि॑ः ।
तमिन्म॒हत्स्वा॒जिषू॒तेमर्भे॑ हवामहे॒ स वाजे॑षु॒ प्र नो॑ऽविषत् ॥१॥

Indro madaya vavridhe shavase vritraha nribhih
Taminmahatsvajishutemarbhe havamahe sa vajeshu pra novishat

असि॒ हि वी॑र॒ सेन्यो ऽसि॒ भूरि॑ पराद॒दिः ।
असि॑ द॒भ्रस्य॑ चिद् वृ॒धो यज॑मानाय शिक्षसि सुन्व॒ते भूरि॑ ते॒ वसु॑ ॥२॥

Asi hi vira senyo si bhuri paradadih
Asi dabhrasya chid vridho yajamanaya shikshasi sunvate bhuri te vasu

यदु॒दीर॑त आ॒जयो॑ धृ॒ष्णवे॑ धीयते॒ धना॑ ।
यु॒क्ष्वा म॑द॒च्युता॒ हरी॒ कं हन॒ः कं वसौ॑ दधो॒ ऽस्माँ इ॑न्द्र॒ वसौ॑ दधः ॥३॥

Yadudirata ajayo dhrishnave dhiyate dhana
Yukshva madachyuta hari kam hanah kam vasau dadho smam indra vasau dadhah

क्रत्वा॑ म॒हाँ अ॑नुष्व॒धं भी॒म आ वा॑वृधे॒ शव॑ः ।
श्रि॒य ऋ॒ष्व उ॑पा॒कयो॒र्नि शि॒प्री हरि॑वान् दधे॒ हस्त॑यो॒र्वज्र॑माय॒सम् ॥४॥

Kratva maham anushvadham bhima a vavridhe shavah
Shriya rishva upakayorni shipri harivan dadhe hastayorvajramayasam

आ प॑प्रौ॒ पार्थि॑वं॒ रजो॑ बद्ब॒धे रो॑च॒ना दि॒वि ।
न त्वावाँ॑ इन्द्र॒ कश्च॒न न जा॒तो न ज॑निष्य॒ते ऽति॒ विश्वं॑ ववक्षिथ ॥५॥

A paprau parthivam rajo badbadhe rochana divi
Na tvavam indra kashchana na jato na janishyate ti vishvam vavakshitha

यो अ॒र्यो म॑र्त॒भोज॑नं परा॒ददा॑ति दा॒शुषे॑ ।
इन्द्रो॑ अ॒स्मभ्यं॑ शिक्षतु॒ वि भ॑जा॒ भूरि॑ ते॒ वसु॑ भक्षी॒य तव॒ राध॑सः ॥६॥

Yo aryo martabhojanam paradadati dashushe
Indro asmabhyam shikshatu vi bhaja bhuri te vasu bhakshiya tava radhasah

मदे॑मदे॒ हि नो॑ द॒दिर्यू॒था गवा॑मृजु॒क्रतु॑ः ।
सं गृ॑भाय पु॒रू श॒तोभ॑याह॒स्त्या वसु॑ शिशी॒हि रा॒य आ भ॑र ॥७॥

Mademade hi no dadiryutha gavamrijukratuh
Sam gribhaya puru shatobhayahastya vasu shishihi raya a bhara

मा॒दय॑स्व सु॒ते सचा॒ शव॑से शूर॒ राध॑से ।
वि॒द्मा हि त्वा॑ पुरू॒वसु॒मुप॒ कामा॑न्त्ससृ॒ज्महे ऽथा॑ नोऽवि॒ता भ॑व ॥८॥

Madayasva sute sacha shavase shura radhase
Vidma hi tva puruvasumupa kamantsasrijmahe tha novita bhava

ए॒ते त॑ इन्द्र ज॒न्तवो॒ विश्वं॑ पुष्यन्ति॒ वार्य॑म् ।
अ॒न्तर्हि ख्यो जना॑नाम॒र्यो वेदो॒ अदा॑शुषां॒ तेषां॑ नो॒ वेद॒ आ भ॑र ॥९॥

Ete ta indra jantavo vishvam pushyanti varyam
Antarhi khyo jananamaryo vedo adashusham tesham no veda a bhara