Sukta 82

82.1

6 gotamo rahuganah, indrah, panktih, 6 jagati

उपो॒ षु शृ॑णु॒ही गिरो॒ मघ॑व॒न् मात॑था इव ।
य॒दा न॑ः सू॒नृता॑वत॒ः कर॒ आद॒र्थया॑स॒ इद् योजा॒ न्वि॑न्द्र ते॒ हरी॑ ॥१॥

Upo shu shrinuhi giro maghavan matatha iva
Yada nah sunritavatah kara adarthayasa id yoja nvindra te hari

82.2

अक्ष॒न्नमी॑मदन्त॒ ह्यव॑ प्रि॒या अ॑धूषत ।
अस्तो॑षत॒ स्वभा॑नवो॒ विप्रा॒ नवि॑ष्ठया म॒ती योजा॒ न्वि॑न्द्र ते॒ हरी॑ ॥२॥

Akshannamimadanta hyava priya adhushata
Astoshata svabhanavo vipra navishthaya mati yoja nvindra te hari

82.3

सु॒सं॒दृशं॑ त्वा व॒यं मघ॑वन् वन्दिषी॒महि॑ ।
प्र नू॒नं पू॒र्णव॑न्धुरः स्तु॒तो या॑हि॒ वशाँ॒ अनु॒ योजा॒ न्वि॑न्द्र ते॒ हरी॑ ॥३॥

Susandrisham tva vayam maghavan vandishimahi
Pra nunam purnavandhurah stuto yahi vasham anu yoja nvindra te hari

82.4

स घा॒ तं वृष॑णं॒ रथ॒मधि॑ तिष्ठाति गो॒विद॑म् ।
यः पात्रं॑ हारियोज॒नं पू॒र्णमि॑न्द्र॒ चिके॑तति॒ योजा॒ न्वि॑न्द्र ते॒ हरी॑ ॥४॥

Sa gha tam vrishanam rathamadhi tishthati govidam
Yah patram hariyojanam purnamindra chiketati yoja nvindra te hari

82.5

यु॒क्तस्ते॑ अस्तु॒ दक्षि॑ण उ॒त स॒व्यः श॑तक्रतो ।
तेन॑ जा॒यामुप॑ प्रि॒यां म॑न्दा॒नो या॒ह्यन्ध॑सो॒ योजा॒ न्वि॑न्द्र ते॒ हरी॑ ॥५॥

Yuktaste astu dakshina uta savyah shatakrato
Tena jayamupa priyam mandano yahyandhaso yoja nvindra te hari

82.6

यु॒नज्मि॑ ते॒ ब्रह्म॑णा के॒शिना॒ हरी॒ उप॒ प्र या॑हि दधि॒षे गभ॑स्त्योः ।
उत् त्वा॑ सु॒तासो॑ रभ॒सा अ॑मन्दिषुः पूष॒ण्वान् व॑ज्रि॒न्त्समु॒ पत्न्या॑मदः ॥६॥

Yunajmi te brahmana keshina hari upa pra yahi dadhishe gabhastyoh
Ut tva sutaso rabhasa amandishuh pushanvan vajrintsamu patnyamadah