Sukta 80

80.1

16 gotamo rahuganah, indrah, 16 indrah, (atharva, manuh dadhyang cha), panktih

इ॒त्था हि सोम॒ इन्मदे॑ ब्र॒ह्मा च॒कार॒ वर्ध॑नम् ।
शवि॑ष्ठ वज्रि॒न्नोज॑सा पृथि॒व्या निः श॑शा॒ अहि॒मर्च॒न्ननु॑ स्व॒राज्य॑म् ॥१॥

Ittha hi soma inmade brahma chakara vardhanam
Shavishtha vajrinnojasa prithivya nih shasha ahimarchannanu svarajyam

80.2

स त्वा॑मद॒द् वृषा॒ मद॒ः सोम॑ः श्ये॒नाभृ॑तः सु॒तः ।
येना॑ वृ॒त्रं निर॒द्भ्यो ज॒घन्थ॑ वज्रि॒न्नोज॒सार्च॒न्ननु॑ स्व॒राज्य॑म् ॥२॥

Sa tvamadad vrisha madah somah shyenabhritah sutah
Yena vritram niradbhyo jaghantha vajrinnojasarchannanu svarajyam

80.3

प्रेह्य॒भी॑हि धृष्णु॒हि न ते॒ वज्रो॒ नि यं॑सते ।
इन्द्र॑ नृ॒म्णं हि ते॒ शवो॒ हनो॑ वृ॒त्रं जया॑ अ॒पो ऽर्च॒न्ननु॑ स्व॒राज्य॑म् ॥३॥

Prehyabhihi dhrishnuhi na te vajro ni yansate
Indra nrimnam hi te shavo hano vritram jaya apo rchannanu svarajyam

80.4

निरि॑न्द्र॒ भूम्या॒ अधि॑ वृ॒त्रं ज॑घन्थ॒ निर्दि॒वः ।
सृ॒जा म॒रुत्व॑ती॒रव॑ जी॒वध॑न्या इ॒मा अ॒पो ऽर्च॒न्ननु॑ स्व॒राज्य॑म् ॥४॥

Nirindra bhumya adhi vritram jaghantha nirdivah
Srija marutvatirava jivadhanya ima apo rchannanu svarajyam

80.5

इन्द्रो॑ वृ॒त्रस्य॒ दोध॑त॒ः सानुं॒ वज्रे॑ण हीळि॒तः ।
अ॒भि॒क्रम्याव॑ जिघ्नते॒ ऽपः सर्मा॑य चो॒दय॒न्नर्च॒न्ननु॑ स्व॒राज्य॑म् ॥५॥

Indro vritrasya dodhatah sanum vajrena hilitah
Abhikramyava jighnate pah sarmaya chodayannarchannanu svarajyam

80.6

अधि॒ सानौ॒ नि जि॑घ्नते॒ वज्रे॑ण श॒तप॑र्वणा ।
म॒न्दा॒न इन्द्रो॒ अन्ध॑स॒ः सखि॑भ्यो गा॒तुमि॑च्छ॒त्यर्च॒न्ननु॑ स्व॒राज्य॑म् ॥६॥

Adhi sanau ni jighnate vajrena shataparvana
Mandana indro andhasah sakhibhyo gatumichchhatyarchannanu svarajyam

80.7

इन्द्र॒ तुभ्य॒मिद॑द्रि॒वो ऽनु॑त्तं वज्रिन् वी॒र्य॑म् ।
यद्ध॒ त्यं मा॒यिनं॑ मृ॒गं तमु॒ त्वं मा॒यया॑वधी॒रर्च॒न्ननु॑ स्व॒राज्य॑म् ॥७॥

Indra tubhyamidadrivo nuttam vajrin viryam
Yaddha tyam mayinam mrigam tamu tvam mayayavadhirarchannanu svarajyam

80.8

वि ते॒ वज्रा॑सो अस्थिरन्नव॒तिं ना॒व्या॒ ३ अनु॑ ।
म॒हत् त॑ इन्द्र वी॒र्यं॑ बा॒ह्वोस्ते॒ बलं॑ हि॒तमर्च॒न्ननु॑ स्व॒राज्य॑म् ॥८॥

Vi te vajraso asthirannavatim navya 3 anu
Mahat ta indra viryam bahvoste balam hitamarchannanu svarajyam

80.9

स॒हस्रं॑ सा॒कम॑र्चत॒ परि॑ ष्टोभत विंश॒तिः ।
श॒तैन॒मन्व॑नोनवु॒रिन्द्रा॑य॒ ब्रह्मोद्य॑त॒मर्च॒न्ननु॑ स्व॒राज्य॑म् ॥९॥

Sahasram sakamarchata pari shtobhata vinshatih
Shatainamanvanonavurindraya brahmodyatamarchannanu svarajyam

80.10

इन्द्रो॑ वृ॒त्रस्य॒ तवि॑षीं॒ निर॑ह॒न्त्सह॑सा॒ सह॑ः ।
म॒हत् तद॑स्य॒ पौंस्यं॑ वृ॒त्रं ज॑घ॒न्वाँ अ॑सृज॒दर्च॒न्ननु॑ स्व॒राज्य॑म् ॥१०॥

Indro vritrasya tavishim nirahantsahasa sahah
Mahat tadasya paunsyam vritram jaghanvam asrijadarchannanu svarajyam

80.11

इ॒मे चि॒त् तव॑ म॒न्यवे॒ वेपे॑ते भि॒यसा॑ म॒ही ।
यदि॑न्द्र वज्रि॒न्नोज॑सा वृ॒त्रं म॒रुत्वाँ॒ अव॑धी॒रर्च॒न्ननु॑ स्व॒राज्य॑म् ॥११॥

Ime chit tava manyave vepete bhiyasa mahi
Yadindra vajrinnojasa vritram marutvam avadhirarchannanu svarajyam

80.12

न वेप॑सा॒ न त॑न्य॒तेन्द्रं॑ वृ॒त्रो वि बी॑भयत् ।
अ॒भ्ये॑नं॒ वज्र॑ आय॒सः स॒हस्र॑भृष्टिराय॒तार्च॒न्ननु॑ स्व॒राज्य॑म् ॥१२॥

Na vepasa na tanyatendram vritro vi bibhayat
Abhyenam vajra ayasah sahasrabhrishtirayatarchannanu svarajyam

80.13

यद् वृ॒त्रं तव॑ चा॒शनिं॒ वज्रे॑ण स॒मयो॑धयः ।
अहि॑मिन्द्र॒ जिघां॑सतो दि॒वि ते॑ बद्बधे॒ शवो ऽर्च॒न्ननु॑ स्व॒राज्य॑म् ॥१३॥

Yad vritram tava chashanim vajrena samayodhayah
Ahimindra jighansato divi te badbadhe shavo rchannanu svarajyam

80.14

अ॒भि॒ष्ट॒ने ते॑ अद्रिवो॒ यत् स्था जग॑च्च रेजते ।
त्वष्टा॑ चि॒त् तव॑ म॒न्यव॒ इन्द्र॑ वेवि॒ज्यते॑ भि॒यार्च॒न्ननु॑ स्व॒राज्य॑म् ॥१४॥

Abhishtane te adrivo yat stha jagachcha rejate
Tvashta chit tava manyava indra vevijyate bhiyarchannanu svarajyam

80.15

न॒हि नु याद॑धी॒मसीन्द्रं॒ को वी॒र्या॑ प॒रः ।
तस्मि॑न्नृ॒म्णमु॒त क्रतुं॑ दे॒वा ओजां॑सि॒ सं द॑धु॒रर्च॒न्ननु॑ स्व॒राज्य॑म् ॥१५॥

Nahi nu yadadhimasindram ko virya parah
Tasminnrimnamuta kratum deva ojansi sam dadhurarchannanu svarajyam

80.16

यामथ॑र्वा॒ मनु॑ष्पि॒ता द॒ध्यङ् धिय॒मत्न॑त ।
तस्मि॒न् ब्रह्मा॑णि पू॒र्वथेन्द्र॑ उ॒क्था सम॑ग्म॒तार्च॒न्ननु॑ स्व॒राज्य॑म् ॥१६॥

Yamatharva manushpita dadhyang dhiyamatnata
Tasmin brahmani purvathendra uktha samagmatarchannanu svarajyam