সূক্ত 80

80.1

১৬ গোতমো রাহূগণঃ। ইন্দ্রঃ, ১৬ ইন্দ্রঃ, (অথর্বা, মনুঃ দধ্যঙ্ চ)। পংক্তিঃ।

ইত্থা হি সোম ইন্মদে ব্রহ্মা চকার বর্ধনম্ ।
শবিষ্ঠ বজ্রিন্নোজসা পৃথিব্যা নিঃ শশা অহিমর্চন্ননু স্বরাজ্যম্ ॥১॥

80.2

স ত্বামদদ্ বৃষা মদঃ সোমঃ শ্যেনাভৃতঃ সুতঃ ।
যেনা বৃত্রং নিরদ্ভ্যো জঘন্থ বজ্রিন্নোজসার্চন্ননু স্বরাজ্যম্ ॥২॥

80.3

প্রেহ্যভীহি ধৃষ্ণুহি ন তে বজ্রো নি যংসতে ।
ইন্দ্র নৃম্ণং হি তে শবো হনো বৃত্রং জয়া অপো ঽর্চন্ননু স্বরাজ্যম্ ॥৩॥

80.4

নিরিন্দ্র ভূম্যা অধি বৃত্রং জঘন্থ নির্দিবঃ ।
সৃজা মরুত্বতীরব জীবধন্যা ইমা অপো ঽর্চন্ননু স্বরাজ্যম্ ॥৪॥

80.5

ইন্দ্রো বৃত্রস্য দোধতঃ সানুং বজ্রেণ হীলিতঃ ।
অভিক্রম্যাব জিঘ্নতে ঽপঃ সর্মায় চোদয়ন্নর্চন্ননু স্বরাজ্যম্ ॥৫॥

80.6

অধি সানৌ নি জিঘ্নতে বজ্রেণ শতপর্বণা ।
মন্দান ইন্দ্রো অন্ধসঃ সখিভ্যো গাতুমিচ্ছত্যর্চন্ননু স্বরাজ্যম্ ॥৬॥

80.7

ইন্দ্র তুভ্যমিদদ্রিবো ঽনুত্তং বজ্রিন্ বীর্যম্ ।
যদ্ধ ত্যং মায়িনং মৃগং তমু ত্বং মায়য়াবধীরর্চন্ননু স্বরাজ্যম্ ॥৭॥

80.8

বি তে বজ্রাসো অস্থিরন্নবতিং নাব্যা ৩ অনু ।
মহৎ ত ইন্দ্র বীর্যং বাহ্বোস্তে বলং হিতমর্চন্ননু স্বরাজ্যম্ ॥৮॥

80.9

সহস্রং সাকমর্চত পরি ষ্টোভত বিংশতিঃ ।
শতৈনমন্বনোনবুরিন্দ্রায় ব্রহ্মোদ্যতমর্চন্ননু স্বরাজ্যম্ ॥৯॥

80.10

ইন্দ্রো বৃত্রস্য তবিষীং নিরহন্ত্সহসা সহঃ ।
মহৎ তদস্য পৌংস্যং বৃত্রং জঘন্বাঁ অসৃজদর্চন্ননু স্বরাজ্যম্ ॥১০॥

80.11

ইমে চিৎ তব মন্যবে বেপেতে ভিয়সা মহী ।
যদিন্দ্র বজ্রিন্নোজসা বৃত্রং মরুত্বাঁ অবধীরর্চন্ননু স্বরাজ্যম্ ॥১১॥

80.12

ন বেপসা ন তন্যতেন্দ্রং বৃত্রো বি বীভয়ৎ ।
অভ্যেনং বজ্র আয়সঃ সহস্রভৃষ্টিরায়তার্চন্ননু স্বরাজ্যম্ ॥১২॥

80.13

যদ্ বৃত্রং তব চাশনিং বজ্রেণ সময়োধয়ঃ ।
অহিমিন্দ্র জিঘাংসতো দিবি তে বদ্বধে শবো ঽর্চন্ননু স্বরাজ্যম্ ॥১৩॥

80.14

অভিষ্টনে তে অদ্রিবো যৎ স্থা জগচ্চ রেজতে ।
ত্বষ্টা চিৎ তব মন্যব ইন্দ্র বেবিজ্যতে ভিয়ার্চন্ননু স্বরাজ্যম্ ॥১৪॥

80.15

নহি নু যাদধীমসীন্দ্রং কো বীর্যা পরঃ ।
তস্মিন্নৃম্ণমুত ক্রতুং দেবা ওজাংসি সং দধুরর্চন্ননু স্বরাজ্যম্ ॥১৫॥

80.16

যামথর্বা মনুষ্পিতা দধ্যঙ্ ধিয়মত্নত ।
তস্মিন্ ব্রহ্মাণি পূর্বথেন্দ্র উক্থা সমগ্মতার্চন্ননু স্বরাজ্যম্ ॥১৬॥