সূক্ত 73

73.1

১০ পরাশরঃ শাক্ত্যঃ। অগ্নিঃ। ত্রিষ্টুপ্।

রয়ির্ন যঃ পিতৃবিত্তো বয়োধাঃ সুপ্রণীতিশ্চিকিতুষো ন শাসুঃ ।
স্যোনশীরতিথির্ন প্রীণানো হোতেব সদ্ম বিধতো বি তারীৎ ॥১॥

73.2

দেবো ন যঃ সবিতা সত্যমন্মা ক্রত্বা নিপাতি বৃজনানি বিশ্বা ।
পুরুপ্রশস্তো অমতির্ন সত্য আত্মেব শেবো দিধিষায্যো ভূৎ ॥২॥

73.3

দেবো ন যঃ পৃথিবীং বিশ্বধায়া উপক্ষেতি হিতমিত্রো ন রাজা ।
পুরঃসদঃ শর্মসদো ন বীরা অনবদ্যা পতিজুষ্টেব নারী ॥৩॥

73.4

তং ত্বা নরো দম আ নিত্যমিদ্ধমগ্নে সচন্ত ক্ষিতিষু ধ্রুবাসু ।
অধি দ্যুম্নং নি দধুর্ভূর্যস্মিন্ ভবা বিশ্বায়ুর্ধরুণো রয়ীণাম্ ॥৪॥

73.5

বি পৃক্ষো অগ্নে মঘবানো অশ্যুর্বি সূরয়ো দদতো বিশ্বমায়ুঃ ।
সনেম বাজং সমিথেষ্বর্যো ভাগং দেবেষু শ্রবসে দধানাঃ ॥৫॥

73.6

ঋতস্য হি ধেনবো বাবশানাঃ স্মদূধ্নীঃ পীপয়ন্ত দ্যুভক্তাঃ ।
পরাবতঃ সুমতিং ভিক্ষমাণা বি সিন্ধবঃ সময়া সস্রুরদ্রিম্ ॥৬॥

73.7

ত্বে অগ্নে সুমতিং ভিক্ষমাণা দিবি শ্রবো দধিরে যজ্ঞিয়াসঃ ।
নক্তা চ চক্রুরুষসা বিরূপে কৃষ্ণং চ বর্ণমরুণং চ সং ধুঃ ॥৭॥

73.8

যান্ রায়ে মর্তান্ত্সুষূদো অগ্নে তে স্যাম মঘবানো বয়ং চ ।
ছায়েব বিশ্বং ভুবনং সিসক্ষ্যাপপ্রিবান্ রোদসী অন্তরিক্ষম্ ॥৮॥

73.9

অর্বদ্ভিরগ্নে অর্বতো নৃভির্নৄন্ বীরৈর্বীরান্ বনুয়ামা ত্বোতাঃ ।
ঈশানাসঃ পিতৃবিত্তস্য রায়ো বি সূরয়ঃ শতহিমা নো অশ্যুঃ ॥৯॥

73.10

এতা তে অগ্ন উচথানি বেধো জুষ্টানি সন্তু মনসে হৃদে চ ।
শকেম রায়ঃ সুধুরো যমং তে ঽধি শ্রবো দেবভক্তং দধানাঃ ॥১০॥