Sukta 73

73.1

10 parasharah shaktyah, agnih, trishtup

र॒यिर्न यः पि॑तृवि॒त्तो व॑यो॒धाः सु॒प्रणी॑तिश्चिकि॒तुषो॒ न शासु॑ः ।
स्यो॒न॒शीरति॑थि॒र्न प्री॑णा॒नो होते॑व॒ सद्म॑ विध॒तो वि ता॑रीत् ॥१॥

Rayirna yah pitrivitto vayodhah supranitishchikitusho na shasuh
Syonashiratithirna prinano hoteva sadma vidhato vi tarit

दे॒वो न यः स॑वि॒ता स॒त्यम॑न्मा॒ क्रत्वा॑ नि॒पाति॑ वृ॒जना॑नि॒ विश्वा॑ ।
पु॒रु॒प्र॒श॒स्तो अ॒मति॒र्न स॒त्य आ॒त्मेव॒ शेवो॑ दिधि॒षाय्यो॑ भूत् ॥२॥

Devo na yah savita satyamanma kratva nipati vrijanani vishva
Puruprashasto amatirna satya atmeva shevo didhishayyo bhut

दे॒वो न यः पृ॑थि॒वीं वि॒श्वधा॑या उप॒क्षेति॑ हि॒तमि॑त्रो॒ न राजा॑ ।
पु॒र॒ःसद॑ः शर्म॒सदो॒ न वी॒रा अ॑नव॒द्या पति॑जुष्टेव॒ नारी॑ ॥३॥

Devo na yah prithivim vishvadhaya upaksheti hitamitro na raja
Purahsadah sharmasado na vira anavadya patijushteva nari

तं त्वा॒ नरो॒ दम॒ आ नित्य॑मि॒द्धमग्ने॒ सच॑न्त क्षि॒तिषु॑ ध्रु॒वासु॑ ।
अधि॑ द्यु॒म्नं नि द॑धु॒र्भूर्य॑स्मि॒न् भवा॑ वि॒श्वायु॑र्ध॒रुणो॑ रयी॒णाम् ॥४॥

Tam tva naro dama a nityamiddhamagne sachanta kshitishu dhruvasu
Adhi dyumnam ni dadhurbhuryasmin bhava vishvayurdharuno rayinam

वि पृक्षो॑ अग्ने म॒घवा॑नो अश्यु॒र्वि सू॒रयो॒ दद॑तो॒ विश्व॒मायु॑ः ।
स॒नेम॒ वाजं॑ समि॒थेष्व॒र्यो भा॒गं दे॒वेषु॒ श्रव॑से॒ दधा॑नाः ॥५॥

Vi priksho agne maghavano ashyurvi surayo dadato vishvamayuh
Sanema vajam samitheshvaryo bhagam deveshu shravase dadhanah

ऋ॒तस्य॒ हि धे॒नवो॑ वावशा॒नाः स्मदू॑ध्नीः पी॒पय॑न्त॒ द्युभ॑क्ताः ।
प॒रा॒वत॑ः सुम॒तिं भिक्ष॑माणा॒ वि सिन्ध॑वः स॒मया॑ सस्रु॒रद्रि॑म् ॥६॥

Ritasya hi dhenavo vavashanah smadudhnih pipayanta dyubhaktah
Paravatah sumatim bhikshamana vi sindhavah samaya sasruradrim

त्वे अ॑ग्ने सुम॒तिं भिक्ष॑माणा दि॒वि श्रवो॑ दधिरे य॒ज्ञिया॑सः ।
नक्ता॑ च च॒क्रुरु॒षसा॒ विरू॑पे कृ॒ष्णं च॒ वर्ण॑मरु॒णं च॒ सं धु॑ः ॥७॥

Tve agne sumatim bhikshamana divi shravo dadhire yagyiyasah
Nakta cha chakrurushasa virupe krishnam cha varnamarunam cha sam dhuh

यान् रा॒ये मर्ता॒न्त्सुषू॑दो अग्ने॒ ते स्या॑म म॒घवा॑नो व॒यं च॑ ।
छा॒येव॒ विश्वं॒ भुव॑नं सिसक्ष्यापप्रि॒वान् रोद॑सी अ॒न्तरि॑क्षम् ॥८॥

Yan raye martantsushudo agne te syama maghavano vayam cha
Chhayeva vishvam bhuvanam sisakshyapaprivan rodasi antariksham

अर्व॑द्भिरग्ने॒ अर्व॑तो॒ नृभि॒र्नॄन् वी॒रैर्वी॒रान् व॑नुयामा॒ त्वोता॑ः ।
ई॒शा॒नास॑ः पितृवि॒त्तस्य॑ रा॒यो वि सू॒रय॑ः श॒तहि॑मा नो अश्युः ॥९॥

Arvadbhiragne arvato nribhirnrin virairviran vanuyama tvotah
Ishanasah pitrivittasya rayo vi surayah shatahima no ashyuh

ए॒ता ते॑ अग्न उ॒चथा॑नि वेधो॒ जुष्टा॑नि सन्तु॒ मन॑से हृ॒दे च॑ ।
श॒केम॑ रा॒यः सु॒धुरो॒ यमं॒ ते ऽधि॒ श्रवो॑ दे॒वभ॑क्तं॒ दधा॑नाः ॥१०॥

Eta te agna uchathani vedho jushtani santu manase hride cha
Shakema rayah sudhuro yamam te dhi shravo devabhaktam dadhanah