Sukta 74

74.1

9 gotamo rahuganah, agnih, gayatri

उ॒प॒प्र॒यन्तो॑ अध्व॒रं मन्त्रं॑ वोचेमा॒ग्नये॑ । आ॒रे अ॒स्मे च॑ शृण्व॒ते ॥१॥

Upaprayanto adhvaram mantram vochemagnaye, are asme cha shrinvate

यः स्नीहि॑तीषु पू॒र्व्यः सं॑जग्मा॒नासु॑ कृ॒ष्टिषु॑ । अर॑क्षद् दा॒शुषे॒ गय॑म् ॥२॥

Yah snihitishu purvyah sanjagmanasu krishtishu, arakshad dashushe gayam

उ॒त ब्रु॑वन्तु ज॒न्तव॒ उद॒ग्निर्वृ॑त्र॒हाज॑नि । ध॒नं॒ज॒यो रणे॑रणे ॥३॥

Uta bruvantu jantava udagnirvritrahajani, dhananjayo ranerane

यस्य॑ दू॒तो असि॒ क्षये॒ वेषि॑ ह॒व्यानि॑ वी॒तये॑ । द॒स्मत् कृ॒णोष्य॑ध्व॒रम् ॥४॥

Yasya duto asi kshaye veshi havyani vitaye, dasmat krinoshyadhvaram

तमित् सु॑ह॒व्यम॑ङ्गिरः सुदे॒वं स॑हसो यहो । जना॑ आहुः सुब॒र्हिष॑म् ॥५॥

Tamit suhavyamangirah sudevam sahaso yaho, jana ahuh subarhisham

आ च॒ वहा॑सि॒ ताँ इ॒ह दे॒वाँ उप॒ प्रश॑स्तये । ह॒व्या सु॑श्चन्द्र वी॒तये॑ ॥६॥

A cha vahasi tam iha devam upa prashastaye, havya sushchandra vitaye

न योरु॑प॒ब्दिरश्व्य॑ः शृ॒ण्वे रथ॑स्य॒ कच्च॒न । यद॑ग्ने॒ यासि॑ दू॒त्य॑म् ॥७॥

Na yorupabdirashvyah shrinve rathasya kachchana, yadagne yasi dutyam

त्वोतो॑ वा॒ज्यह्र॑यो॒ ऽभि पूर्व॑स्मा॒दप॑रः । प्र दा॒श्वाँ अ॑ग्ने अस्थात् ॥८॥

Tvoto vajyahrayo bhi purvasmadaparah, pra dashvam agne asthat

उ॒त द्यु॒मत् सु॒वीर्यं॑ बृ॒हद॑ग्ने विवाससि । दे॒वेभ्यो॑ देव दा॒शुषे॑ ॥९॥

Uta dyumat suviryam brihadagne vivasasi, devebhyo deva dashushe