Sukta 75

75.1

5 gotamo rahuganah, agnih, gayatri

जु॒षस्व॑ स॒प्रथ॑स्तमं॒ वचो॑ दे॒वप्स॑रस्तमम् ।
ह॒व्या जुह्वा॑न आ॒सनि॑ ॥१॥

Jushasva saprathastamam vacho devapsarastamam
Havya juhvana asani

75.2

अथा॑ ते अङ्गिरस्त॒माग्ने॑ वेधस्तम प्रि॒यम् ।
वो॒चेम॒ ब्रह्म॑ सान॒सि ॥२॥

Atha te angirastamagne vedhastama priyam
Vochema brahma sanasi

75.3

कस्ते॑ जा॒मिर्जना॑ना॒मग्ने॒ को दा॒श्व॑ध्वरः ।
को ह॒ कस्मि॑न्नसि श्रि॒तः ॥३॥

Kaste jamirjananamagne ko dashvadhvarah
Ko ha kasminnasi shritah

75.4

त्वं जा॒मिर्जना॑ना॒मग्ने॑ मि॒त्रो अ॑सि प्रि॒यः ।
सखा॒ सखि॑भ्य॒ ईड्य॑ः ॥४॥

Tvam jamirjananamagne mitro asi priyah
Sakha sakhibhya idyah

75.5

यजा॑ नो मि॒त्रावरु॑णा॒ यजा॑ दे॒वाँ ऋ॒तं बृ॒हत् ।
अग्ने॒ यक्षि॒ स्वं दम॑म् ॥५॥

Yaja no mitravaruna yaja devam ritam brihat
Agne yakshi svam damam