Sukta 76

76.1

5 gotamo rahuganah, agnih, trishtup

का त॒ उपे॑ति॒र्मन॑सो॒ वरा॑य॒ भुव॑दग्ने॒ शंत॑मा॒ का म॑नी॒षा ।
को वा॑ य॒ज्ञैः परि॒ दक्षं॑ त आप॒ केन॑ वा ते॒ मन॑सा दाशेम ॥१॥

Ka ta upetirmanaso varaya bhuvadagne shantama ka manisha
Ko va yagyaih pari daksham ta apa kena va te manasa dashema

एह्य॑ग्न इ॒ह होता॒ नि षी॒दाद॑ब्ध॒ः सु पु॑रए॒ता भ॑वा नः ।
अव॑तां त्वा॒ रोद॑सी विश्वमि॒न्वे यजा॑ म॒हे सौ॑मन॒साय॑ दे॒वान् ॥२॥

Ehyagna iha hota ni shidadabdhah su puraeta bhava nah
Avatam tva rodasi vishvaminve yaja mahe saumanasaya devan

प्र सु विश्वा॑न् र॒क्षसो॒ धक्ष्य॑ग्ने॒ भवा॑ य॒ज्ञाना॑मभिशस्ति॒पावा॑ ।
अथा व॑ह॒ सोम॑पतिं॒ हरि॑भ्यामाति॒थ्यम॑स्मै चकृमा सु॒दाव्ने॑ ॥३॥

Pra su vishvan rakshaso dhakshyagne bhava yagyanamabhishastipava
Atha vaha somapatim haribhyamatithyamasmai chakrima sudavne

प्र॒जाव॑ता॒ वच॑सा॒ वह्नि॑रा॒सा ऽऽ च॑ हु॒वे नि च॑ सत्सी॒ह दे॒वैः ।
वेषि॑ हो॒त्रमु॒त पो॒त्रं य॑जत्र बो॒धि प्र॑यन्तर्जनित॒र्वसू॑नाम् ॥४॥

Prajavata vachasa vahnirasa cha huve ni cha satsiha devaih
Veshi hotramuta potram yajatra bodhi prayantarjanitarvasunam

यथा॒ विप्र॑स्य॒ मनु॑षो ह॒विर्भि॑र्दे॒वाँ अय॑जः क॒विभि॑ः क॒विः सन् ।
ए॒वा हो॑तः सत्यतर॒ त्वम॒द्याग्ने॑ म॒न्द्रया॑ जु॒ह्वा॑ यजस्व ॥५॥

Yatha viprasya manusho havirbhirdevam ayajah kavibhih kavih san
Eva hotah satyatara tvamadyagne mandraya juhva yajasva