Sukta 77

77.1

5 gotamo rahuganah, agnih, trishtup

क॒था दा॑शेमा॒ग्नये॒ कास्मै॑ दे॒वजु॑ष्टोच्यते भा॒मिने॒ गीः ।
यो मर्त्ये॑ष्व॒मृत॑ ऋ॒तावा॒ होता॒ यजि॑ष्ठ॒ इत् कृ॒णोति॑ दे॒वान् ॥१॥

Katha dashemagnaye kasmai devajushtochyate bhamine gih
Yo martyeshvamrita ritava hota yajishtha it krinoti devan

यो अ॑ध्व॒रेषु॒ शंत॑म ऋ॒तावा॒ होता॒ तमू॒ नमो॑भि॒रा कृ॑णुध्वम् ।
अ॒ग्निर्यद् वेर्मर्ता॑य दे॒वान्त्स चा॒ बोधा॑ति॒ मन॑सा यजाति ॥२॥

Yo adhvareshu shantama ritava hota tamu namobhira krinudhvam
Agniryad vermartaya devantsa cha bodhati manasa yajati

स हि क्रतु॒ः स मर्य॒ः स सा॒धुर्मि॒त्रो न भू॒दद्भु॑तस्य र॒थीः ।
तं मेधे॑षु प्रथ॒मं दे॑व॒यन्ती॒र्विश॒ उप॑ ब्रुवते द॒स्ममारी॑ः ॥३॥

Sa hi kratuh sa maryah sa sadhurmitro na bhudadbhutasya rathih
Tam medheshu prathamam devayantirvisha upa bruvate dasmamarih

स नो॑ नृ॒णां नृत॑मो रि॒शादा॑ अ॒ग्निर्गिरोऽव॑सा वेतु धी॒तिम् ।
तना॑ च॒ ये म॒घवा॑न॒ः शवि॑ष्ठा॒ वाज॑प्रसूता इ॒षय॑न्त॒ मन्म॑ ॥४॥

Sa no nrinam nritamo rishada agnirgirovasa vetu dhitim
Tana cha ye maghavanah shavishtha vajaprasuta ishayanta manma

ए॒वाग्निर्गोत॑मेभिर्ऋ॒तावा॒ विप्रे॑भिरस्तोष्ट जा॒तवे॑दाः ।
स ए॑षु द्यु॒म्नं पी॑पय॒त् स वाजं॒ स पु॒ष्टिं या॑ति॒ जोष॒मा चि॑कि॒त्वान् ॥५॥

Evagnirgotamebhirritava viprebhirastoshta jatavedah
Sa eshu dyumnam pipayat sa vajam sa pushtim yati joshama chikitvan