সূক্ত 55

55.1

৮ সব্য আঙ্গিরসঃ। ইন্দ্রঃ। জগতী।

দিবশ্চিদস্য বরিমা বি পপ্রথ ইন্দ্রং ন মহ্না পৃথিবী চন প্রতি ।
ভীমস্তুবিষ্মাঞ্চর্ষণিভ্য আতপঃ শিশীতে বজ্রং তেজসে ন বংসগঃ ॥১॥

55.2

সো অর্ণবো ন নদ্যঃ সমুদ্রিয়ঃ প্রতি গৃভ্ণাতি বিশ্রিতা বরীমভিঃ ।
ইন্দ্রঃ সোমস্য পীতয়ে বৃষায়তে সনাৎ স যুধ্ম ওজসা পনস্যতে ॥২॥

55.3

ত্বং তমিন্দ্র পর্বতং ন ভোজসে মহো নৃম্ণস্য ধর্মণামিরজ্যসি ।
প্র বীর্যেণ দেবতাতি চেকিতে বিশ্বস্মা উগ্রঃ কর্মণে পুরোহিতঃ ॥৩॥

55.4

স ইদ্ বনে নমস্যুভির্বচস্যতে চারু জনেষু প্রব্রুবাণ ইন্দ্রিয়ম্ ।
বৃষা ছন্দুর্ভবতি হর্যতো বৃষা ক্ষেমেণ ধেনাং মঘবা যদিন্বতি ॥৪॥

55.5

স ইন্মহানি সমিথানি মজ্মনা কৃণোতি যুধ্ম ওজসা জনেভ্যঃ ।
অধা চন শ্রদ্ দধতি ত্বিষীমত ইন্দ্রায় বজ্রং নিঘনিঘ্নতে বধম্ ॥৫॥

55.6

স হি শ্রবস্যুঃ সদনানি কৃত্রিমা ক্ষ্ময়া বৃধান ওজসা বিনাশয়ন্ ।
জ্যোতীংষি কৃণ্বন্নবৃকাণি যজ্যবে ঽব সুক্রতুঃ সর্তবা অপঃ সৃজৎ ॥৬॥

55.7

দানায় মনঃ সোমপাবন্নস্তু তে ঽর্বাঞ্চা হরী বন্দনশ্রুদা কৃধি ।
যমিষ্ঠাসঃ সারথয়ো য ইন্দ্র তে ন ত্বা কেতা আ দভ্নুবন্তি ভূর্ণয়ঃ ॥৭॥

55.8

অপ্রক্ষিতং বসু বিভর্ষি হস্তয়োরষাহ্লং সহস্তন্বি শ্রুতো দধে ।
আবৃতাসোঽবতাসো ন কর্তৃভিস্তনূষু তে ক্রতব ইন্দ্র ভূরয়ঃ ॥৮॥