Sukta 55

55.1

8 savya angirasah, indrah, jagati

दि॒वश्चि॑दस्य वरि॒मा वि प॑प्रथ॒ इन्द्रं॒ न म॒ह्ना पृ॑थि॒वी च॒न प्रति॑ ।
भी॒मस्तुवि॑ष्माञ्चर्ष॒णिभ्य॑ आत॒पः शिशी॑ते॒ वज्रं॒ तेज॑से॒ न वंस॑गः ॥१॥

Divashchidasya varima vi papratha indram na mahna prithivi chana prati
Bhimastuvishmancharshanibhya atapah shishite vajram tejase na vansagah

55.2

सो अ॑र्ण॒वो न न॒द्य॑ः समु॒द्रिय॒ः प्रति॑ गृभ्णाति॒ विश्रि॑ता॒ वरी॑मभिः ।
इन्द्र॒ः सोम॑स्य पी॒तये॑ वृषायते स॒नात् स यु॒ध्म ओज॑सा पनस्यते ॥२॥

So arnavo na nadyah samudriyah prati gribhnati vishrita varimabhih
Indrah somasya pitaye vrishayate sanat sa yudhma ojasa panasyate

55.3

त्वं तमि॑न्द्र॒ पर्व॑तं॒ न भोज॑से म॒हो नृ॒म्णस्य॒ धर्म॑णामिरज्यसि ।
प्र वी॒र्ये॑ण दे॒वताति॑ चेकिते॒ विश्व॑स्मा उ॒ग्रः कर्म॑णे पु॒रोहि॑तः ॥३॥

Tvam tamindra parvatam na bhojase maho nrimnasya dharmanamirajyasi
Pra viryena devatati chekite vishvasma ugrah karmane purohitah

55.4

स इद् वने॑ नम॒स्युभि॑र्वचस्यते॒ चारु॒ जने॑षु प्रब्रुवा॒ण इ॑न्द्रि॒यम् ।
वृषा॒ छन्दु॑र्भवति हर्य॒तो वृषा॒ क्षेमे॑ण॒ धेनां॑ म॒घवा॒ यदिन्व॑ति ॥४॥

Sa id vane namasyubhirvachasyate charu janeshu prabruvana indriyam
Vrisha chhandurbhavati haryato vrisha kshemena dhenam maghava yadinvati

55.5

स इन्म॒हानि॑ समि॒थानि॑ म॒ज्मना॑ कृ॒णोति॑ यु॒ध्म ओज॑सा॒ जने॑भ्यः ।
अधा॑ च॒न श्रद् द॑धति॒ त्विषी॑मत॒ इन्द्रा॑य॒ वज्रं॑ नि॒घनि॑घ्नते व॒धम् ॥५॥

Sa inmahani samithani majmana krinoti yudhma ojasa janebhyah
Adha chana shrad dadhati tvishimata indraya vajram nighanighnate vadham

55.6

स हि श्र॑व॒स्युः सद॑नानि कृ॒त्रिमा॑ क्ष्म॒या वृ॑धा॒न ओज॑सा विना॒शय॑न् ।
ज्योतीं॑षि कृ॒ण्वन्न॑वृ॒काणि॒ यज्य॒वे ऽव॑ सु॒क्रतु॒ः सर्त॒वा अ॒पः सृ॑जत् ॥६॥

Sa hi shravasyuh sadanani kritrima kshmaya vridhana ojasa vinashayan
Jyotinshi krinvannavrikani yajyave va sukratuh sartava apah srijat

55.7

दा॒नाय॒ मन॑ः सोमपावन्नस्तु ते॒ ऽर्वाञ्चा॒ हरी॑ वन्दनश्रु॒दा कृ॑धि ।
यमि॑ष्ठास॒ः सार॑थयो॒ य इ॑न्द्र ते॒ न त्वा॒ केता॒ आ द॑भ्नुवन्ति॒ भूर्ण॑यः ॥७॥

Danaya manah somapavannastu te rvancha hari vandanashruda kridhi
Yamishthasah sarathayo ya indra te na tva keta a dabhnuvanti bhurnayah

55.8

अप्र॑क्षितं॒ वसु॑ बिभर्षि॒ हस्त॑यो॒रषा॑ह्ळं॒ सह॑स्त॒न्वि॑ श्रु॒तो द॑धे ।
आवृ॑तासोऽव॒तासो॒ न क॒र्तृभि॑स्त॒नूषु॑ ते॒ क्रत॑व इन्द्र॒ भूर॑यः ॥८॥

Aprakshitam vasu bibharshi hastayorashahlam sahastanvi shruto dadhe
Avritasovataso na kartribhistanushu te kratava indra bhurayah