Sukta 56

56.1

6 savya angirasah, indrah, jagati

ए॒ष प्र पू॒र्वीरव॒ तस्य॑ च॒म्रिषो ऽत्यो॒ न योषा॒मुद॑यंस्त भु॒र्वणि॑ः ।
दक्षं॑ म॒हे पा॑ययते हिर॒ण्ययं॒ रथ॑मा॒वृत्या॒ हरि॑योग॒मृभ्व॑सम् ॥१॥

Esha pra purvirava tasya chamrisho tyo na yoshamudayansta bhurvanih
Daksham mahe payayate hiranyayam rathamavritya hariyogamribhvasam

56.2

तं गू॒र्तयो॑ नेम॒न्निष॒ः परी॑णसः समु॒द्रं न सं॒चर॑णे सनि॒ष्यव॑ः ।
पतिं॒ दक्ष॑स्य वि॒दथ॑स्य॒ नू सहो॑ गि॒रिं न वे॒ना अधि॑ रोह॒ तेज॑सा ॥२॥

Tam gurtayo nemannishah parinasah samudram na sancharane sanishyavah
Patim dakshasya vidathasya nu saho girim na vena adhi roha tejasa

56.3

स तु॒र्वणि॑र्म॒हाँ अ॑रे॒णु पौंस्ये॑ गि॒रेर्भृ॒ष्टिर्न भ्रा॑जते तु॒जा शव॑ः ।
येन॒ शुष्णं॑ मा॒यिन॑माय॒सो मदे॑ दु॒ध्र आ॒भूषु॑ रा॒मय॒न्नि दाम॑नि ॥३॥

Sa turvanirmaham arenu paunsye girerbhrishtirna bhrajate tuja shavah
Yena shushnam mayinamayaso made dudhra abhushu ramayanni damani

56.4

दे॒वी यदि॒ तवि॑षी॒ त्वावृ॑धो॒तय॒ इन्द्रं॒ सिष॑क्त्यु॒षसं॒ न सूर्य॑ः ।
यो धृ॒ष्णुना॒ शव॑सा॒ बाध॑ते॒ तम॒ इय॑र्ति रे॒णुं बृ॒हद॑र्हरि॒ष्वणि॑ः ॥४॥

Devi yadi tavishi tvavridhotaya indram sishaktyushasam na suryah
Yo dhrishnuna shavasa badhate tama iyarti renum brihadarharishvanih

56.5

वि यत् ति॒रो ध॒रुण॒मच्यु॑तं॒ रजो ऽति॑ष्ठिपो दि॒व आता॑सु ब॒र्हणा॑ ।
स्व॑र्मीह्ले॒ यन्मद॑ इन्द्र॒ हर्ष्याह॑न् वृ॒त्रं निर॒पामौ॑ब्जो अर्ण॒वम् ॥५॥

Vi yat tiro dharunamachyutam rajo tishthipo diva atasu barhana
Svarmihle yanmada indra harshyahan vritram nirapamaubjo arnavam

56.6

त्वं दि॒वो ध॒रुणं॑ धिष॒ ओज॑सा पृथि॒व्या इ॑न्द्र॒ सद॑नेषु॒ माहि॑नः ।
त्वं सु॒तस्य॒ मदे॑ अरिणा अ॒पो वि वृ॒त्रस्य॑ स॒मया॑ पा॒ष्या॑रुजः ॥६॥

Tvam divo dharunam dhisha ojasa prithivya indra sadaneshu mahinah
Tvam sutasya made arina apo vi vritrasya samaya pashyarujah