Sukta 57

57.1

6 savya angirasah, indrah, jagati

प्र मंहि॑ष्ठाय बृह॒ते बृ॒हद्र॑ये स॒त्यशु॑ष्माय त॒वसे॑ म॒तिं भ॑रे ।
अ॒पामि॑व प्रव॒णे यस्य॑ दु॒र्धरं॒ राधो॑ वि॒श्वायु॒ शव॑से॒ अपा॑वृतम् ॥१॥

Pra manhishthaya brihate brihadraye satyashushmaya tavase matim bhare
Apamiva pravane yasya durdharam radho vishvayu shavase apavritam

57.2

अध॑ ते॒ विश्व॒मनु॑ हासदि॒ष्टय॒ आपो॑ नि॒म्नेव॒ सव॑ना ह॒विष्म॑तः ।
यत् पर्व॑ते॒ न स॒मशी॑त हर्य॒त इन्द्र॑स्य॒ वज्र॒ः श्नथि॑ता हिर॒ण्यय॑ः ॥२॥

Adha te vishvamanu hasadishtaya apo nimneva savana havishmatah
Yat parvate na samashita haryata indrasya vajrah shnathita hiranyayah

57.3

अ॒स्मै भी॒माय॒ नम॑सा॒ सम॑ध्व॒र उषो॒ न शु॑भ्र॒ आ भ॑रा॒ पनी॑यसे ।
यस्य॒ धाम॒ श्रव॑से॒ नामे॑न्द्रि॒यं ज्योति॒रका॑रि ह॒रितो॒ नाय॑से ॥३॥

Asmai bhimaya namasa samadhvara usho na shubhra a bhara paniyase
Yasya dhama shravase namendriyam jyotirakari harito nayase

57.4

इ॒मे त॑ इन्द्र॒ ते व॒यं पु॑रुष्टुत॒ ये त्वा॒रभ्य॒ चरा॑मसि प्रभूवसो ।
न॒हि त्वद॒न्यो गि॑र्वणो॒ गिर॒ः सघ॑त् क्षो॒णीरि॑व॒ प्रति॑ नो हर्य॒ तद् वच॑ः ॥४॥

Ime ta indra te vayam purushtuta ye tvarabhya charamasi prabhuvaso
Nahi tvadanyo girvano girah saghat kshoniriva prati no harya tad vachah

57.5

भूरि॑ त इन्द्र वी॒र्यं १ तव॑ स्मस्य॒स्य स्तो॒तुर्म॑घव॒न् काम॒मा पृ॑ण ।
अनु॑ ते॒ द्यौर्बृ॑ह॒ती वी॒र्यं॑ मम इ॒यं च॑ ते पृथि॒वी ने॑म॒ ओज॑से ॥५॥

Bhuri ta indra viryam 1 tava smasyasya stoturmaghavan kamama prina
Anu te dyaurbrihati viryam mama iyam cha te prithivi nema ojase

57.6

त्वं तमि॑न्द्र॒ पर्व॑तं म॒हामु॒रुं वज्रे॑ण वज्रिन् पर्व॒शश्च॑कर्तिथ ।
अवा॑सृजो॒ निवृ॑ता॒ः सर्त॒वा अ॒पः स॒त्रा विश्वं॑ दधिषे॒ केव॑लं॒ सह॑ः ॥६॥

Tvam tamindra parvatam mahamurum vajrena vajrin parvashashchakartitha
Avasrijo nivritah sartava apah satra vishvam dadhishe kevalam sahah