সূক্ত 54

54.1

১১ সব্য আঙ্গিরসঃ। ইন্দ্রঃ। জগতী, ৬, ৮-৯, ১১ ত্রিষ্টুপ্।

মা নো অস্মিন্ মঘবন্ পৃত্স্বংহসি নহি তে অন্তঃ শবসঃ পরীণশে ।
অক্রন্দয়ো নদ্যো ৩ রোরুবদ্ বনা কথা ন ক্ষোণীর্ভিয়সা সমারত ॥১॥

54.2

অর্চা শক্রায় শাকিনে শচীবতে শৃণ্বন্তমিন্দ্রং মহয়ন্নভি ষ্টুহি ।
যো ধৃষ্ণুনা শবসা রোদসী উভে বৃষা বৃষত্বা বৃষভো ন্যৃঞ্জতে ॥২॥

54.3

অর্চা দিবে বৃহতে শূষ্যং ১ বচঃ স্বক্ষত্রং যস্য ধৃষতো ধৃষন্মনঃ ।
বৃহচ্ছ্রবা অসুরো বর্হণা কৃতঃ পুরো হরিভ্যাং বৃষভো রথো হি ষঃ ॥৩॥

54.4

ত্বং দিবো বৃহতঃ সানু কোপয়ো ঽব ত্মনা ধৃষতা শম্বরং ভিনৎ ।
যন্মায়িনো ব্রন্দিনো মন্দিনা ধৃষচ্ছিতাং গভস্তিমশনিং পৃতন্যসি ॥৪॥

54.5

নি যদ্ বৃণক্ষি শ্বসনস্য মূর্ধনি শুষ্ণস্য চিদ্ ব্রন্দিনো রোরুবদ্ বনা ।
প্রাচীনেন মনসা বর্হণাবতা যদদ্যা চিত্কৃণবঃ কস্ত্বা পরি ॥৫॥

54.6

ত্বমাবিথ নর্যং তুর্বশং যদুং ত্বং তুর্বীতিং বয্যং শতক্রতো ।
ত্বং রথমেতশং কৃত্ব্যে ধনে ত্বং পুরো নবতিং দম্ভয়ো নব ॥৬॥

54.7

স ঘা রাজা সত্পতিঃ শূশুবজ্জনো রাতহব্যঃ প্রতি যঃ শাসমিন্বতি ।
উক্থা বা যো অভিগৃণাতি রাধসা দানুরস্মা উপরা পিন্বতে দিবঃ ॥৭॥

54.8

অসমং ক্ষত্রমসমা মনীষা প্র সোমপা অপসা সন্তু নেমে ।
যে ত ইন্দ্র দদুষো বর্ধয়ন্তি মহি ক্ষত্রং স্থবিরং বৃষ্ণ্যং চ ॥৮॥

54.9

তুভ্যেদেতে বহুলা অদ্রিদুগ্ধাশ্চমূষদশ্চমসা ইন্দ্রপানাঃ ।
ব্যশ্নুহি তর্পয়া কামমেষামথা মনো বসুদেয়ায় কৃষ্ব ॥৯॥

54.10

অপামতিষ্ঠদ্ধরুণহ্বরং তমো ঽন্তর্বৃত্রস্য জঠরেষু পর্বতঃ ।
অভীমিন্দ্রো নদ্যো বব্রিণা হিতা বিশ্বা অনুষ্ঠাঃ প্রবণেষু জিঘ্নতে ॥১০॥

54.11

স শেবৃধমধি ধা দ্যুম্নমস্মে মহি ক্ষত্রং জনাষালিন্দ্র তব্যম্ ।
রক্ষা চ নো মঘোনঃ পাহি সূরীন্ রায়ে চ নঃ স্বপত্যা ইষে ধাঃ ॥১১॥