সূক্ত 51

51.1

১৫ সব্য আঙ্গিরসঃ। ইন্দ্রঃ। জগতী, ১৪-১৫ ত্রিষ্টুপ্।

অভি ত্যং মেষং পুরুহূতমৃগ্মিয়মিন্দ্রং গীর্ভির্মদতা বস্বো অর্ণবম্ ।
যস্য দ্যাবো ন বিচরন্তি মানুষা ভুজে মংহিষ্ঠমভি বিপ্রমর্চত ॥১॥

অভীমবন্বন্ত্স্বভিষ্টিমূতয়ো ঽন্তরিক্ষপ্রাং তবিষীভিরাবৃতম্ ।
ইন্দ্রং দক্ষাস ঋভবো মদচ্যুতং শতক্রতুং জবনী সূনৃতারুহৎ ॥২॥

ত্বং গোত্রমঙ্গিরোভ্যোঽবৃণোরপোতাত্রয়ে শতদুরেষু গাতুবিৎ ।
সসেন চিদ্ বিমদায়াবহো বস্বাজাবদ্রিং বাবসানস্য নর্তয়ন্ ॥৩॥

ত্বমপামপিধানাবৃণোরপাধারয়ঃ পর্বতে দানুমদ্বসু ।
বৃত্রং যদিন্দ্র শবসাবধীরহিমাদিৎ সূর্যং দিব্যারোহয়ো দৃশে ॥৪॥

ত্বং মায়াভিরপ মায়িনোঽধমঃ স্বধাভির্যে অধি শুপ্তাবজুহ্বত ।
ত্বং পিপ্রোর্নৃমণঃ প্রারুজঃ পুরঃ প্র ঋজিশ্বানং দস্যুহত্যেষ্বাবিথ ॥৫॥

ত্বং কুত্সং শুষ্ণহত্যেষ্বাবিথারন্ধয়োঽতিথিগ্বায় শম্বরম্ ।
মহান্তং চিদর্বুদং নি ক্রমীঃ পদা সনাদেব দস্যুহত্যায় জজ্ঞিষে ॥৬॥

ত্বে বিশ্বা তবিষী সধ্র্যগ্ঘিতা তব রাধঃ সোমপীথায় হর্ষতে ।
তব বজ্রশ্চিকিতে বাহ্বোর্হিতো বৃশ্চা শত্রোরব বিশ্বানি বৃষ্ণ্যা ॥৭॥

বি জানীহ্যার্যান্যে চ দস্যবো বর্হিষ্মতে রন্ধয়া শাসদব্রতান্ ।
শাকী ভব যজমানস্য চোদিতা বিশ্বেৎ তা তে সধমাদেষু চাকন ॥৮॥

অনুব্রতায় রন্ধয়ন্নপব্রতানাভূভিরিন্দ্রঃ শ্নথয়ন্ননাভুবঃ ।
বৃদ্ধস্য চিদ্ বর্ধতো দ্যামিনক্ষতঃ স্তবানো বম্রো বি জঘান সংদিহঃ ॥৯॥

তক্ষদ্ যত্ত উশনা সহসা সহো বি রোদসী মজ্মনা বাধতে শবঃ ।
আ ত্বা বাতস্য নৃমণো মনোয়ুজ আ পূর্যমাণমবহন্নভি শ্রবঃ ॥১০॥

মন্দিষ্ট যদুশনে কাব্যে সচাঁ ইন্দ্রো বঙ্কূ বঙ্কুতরাধি তিষ্ঠতি ।
উগ্রো যয়িং নিরপঃ স্রোতসাসৃজদ্বি শুষ্ণস্য দৃংহিতা ঐরয়ত্পুরঃ ॥১১॥

আ স্মা রথং বৃষপাণেষু তিষ্ঠসি শার্যাতস্য প্রভৃতা যেষু মন্দসে ।
ইন্দ্র যথা সুতসোমেষু চাকনোঽনর্বাণং শ্লোকমা রোহসে দিবি ॥১২॥

অদদা অর্ভাং মহতে বচস্যবে কক্ষীবতে বৃচয়ামিন্দ্র সুন্বতে ।
মেনাভবো বৃষণশ্বস্য সুক্রতো বিশ্বেৎ তা তে সবনেষু প্রবাচ্যা ॥১৩॥

ইন্দ্রো অশ্রায়ি সুধ্যো নিরেকে পজ্রেষু স্তোমো দুর্যো ন যূপঃ ।
অশ্বয়ুর্গব্যূ রথয়ুর্বসূয়ুরিন্দ্র ইদ্রায়ঃ ক্ষয়তি প্রয়ন্তা ॥১৪॥

ইদং নমো বৃষভায় স্বরাজে সত্যশুষ্মায় তবসেঽবাচি ।
অস্মিন্নিন্দ্র বৃজনে সর্ববীরাঃ স্মত্সূরিভিস্তব শর্মন্ত্স্যাম ॥১৫॥