সূক্ত 50

50.1

১৩ প্রস্কণ্বঃ কাণ্বঃ। সূর্যঃ (১১-১৩ রোগঘ্ন্য উপনিষদঃ, ১৩ অন্ত্যোঽর্ধর্চঃ দ্বিষদ্ ঘ্নশ্চ)। গায়ত্রী, ১০-১৩ অনুষ্টুপ্।

উদু ত্যং জাতবেদসং দেবং বহন্তি কেতবঃ । দৃশে বিশ্বায় সূর্যম্ ॥১॥

অপ ত্যে তায়বো যথা নক্ষত্রা যন্ত্যক্তুভিঃ । সূরায় বিশ্বচক্ষসে ॥২॥

অদৃশ্রমস্য কেতবো বি রশ্ময়ো জনাঁ অনু । ভ্রাজন্তো অগ্নয়ো যথা ॥৩॥

তরণির্বিশ্বদর্শতো জ্যোতিষ্কৃদসি সূর্য । বিশ্বমা ভাসি রোচনম্ ॥৪॥

প্রত্যঙ্ দেবানাং বিশঃ প্রত্যঙ্ঙুদেষি মানুষান্ । প্রত্যঙ্ বিশ্বং স্বর্দৃশে ॥৫॥

যেনা পাবক চক্ষসা ভুরণ্যন্তং জনাঁ অনু । ত্বং বরুণ পশ্যসি ॥৬॥

বি দ্যামেষি রজস্পৃথ্বহা মিমানো অক্তুভিঃ । পশ্যঞ্জন্মানি সূর্য ॥৭॥

সপ্ত ত্বা হরিতো রথে বহন্তি দেব সূর্য । শোচিষ্কেশং বিচক্ষণ ॥৮॥

অয়ুক্ত সপ্ত শুন্ধ্যুবঃ সূরো রথস্য নপ্ত্যঃ । তাভির্যাতি স্বয়ুক্তিভিঃ ॥৯॥

উদ্বয়ং তমসস্পরি জ্যোতিষ্পশ্যন্ত উত্তরম্ । দেবং দেবত্রা সূর্যমগন্ম জ্যোতিরুত্তমম্ ॥১০॥

উদ্যন্নদ্য মিত্রমহ আরোহন্নুত্তরাং দিবম্ । হৃদ্রোগং মম সূর্য হরিমাণং চ নাশয় ॥১১॥

শুকেষু মে হরিমাণং রোপণাকাসু দধ্মসি । অথো হারিদ্রবেষু মে হরিমাণং নি দধ্মসি ॥১২॥

উদগাদয়মাদিত্যো বিশ্বেন সহসা সহ । দ্বিষন্তং মহ্যং রন্ধয়ন্ মো অহং দ্বিষতে রধম্ ॥১৩॥