সূক্ত 52

52.1

১৫ সব্য আঙ্গিরসঃ। ইন্দ্রঃ। জগতী, ১৩-১৫ ত্রিষ্টুপ্।

ত্যং সু মেষং মহয়া স্বর্বিদং শতং যস্য সুভ্বঃ সাকমীরতে ।
অত্যং ন বাজং হবনস্যদং রথমেন্দ্রং ববৃত্যামবসে সুবৃক্তিভিঃ ॥১॥

52.2

স পর্বতো ন ধরুণেষ্বচ্যুতঃ সহস্রমূতিস্তবিষীষু বাবৃধে ।
ইন্দ্রো যদ্ বৃত্রমবধীন্নদীবৃতমুব্জন্নর্ণাংসি জর্হৃষাণো অন্ধসা ॥২॥

52.3

স হি দ্বরো দ্বরিষু বব্র ঊধনি চন্দ্রবুধ্নো মদবৃদ্ধো মনীষিভিঃ ।
ইন্দ্রং তমহ্বে স্বপস্যয়া ধিয়া মংহিষ্ঠরাতিং স হি পপ্রিরন্ধসঃ ॥৩॥

52.4

আ যং পৃণন্তি দিবি সদ্মবর্হিষঃ সমুদ্রং ন সুভ্ব১ঃ স্বা অভিষ্টয়ঃ ।
তং বৃত্রহত্যে অনু তস্থুরূতয়ঃ শুষ্মা ইন্দ্রমবাতা অহ্রুতপ্সবঃ ॥৪॥

52.5

অভি স্ববৃষ্টিং মদে অস্য যুধ্যতো রঘ্বীরিব প্রবণে সস্রুরূতয়ঃ ।
ইন্দ্রো যদ্ বজ্রী ধৃষমাণো অন্ধসা ভিনদ্ বলস্য পরিধীঁরিব ত্রিতঃ ॥৫॥

52.6

পরীং ঘৃণা চরতি তিত্বিষে শবো ঽপো বৃত্বী রজসো বুধ্নমাশয়ৎ ।
বৃত্রস্য যৎ প্রবণে দুর্গৃভিশ্বনো নিজঘন্থ হন্বোরিন্দ্র তন্যতুম্ ॥৬॥

52.7

হ্রদং ন হি ত্বা ন্যৃষন্ত্যূর্ময়ো ব্রহ্মাণীন্দ্র তব যানি বর্ধনা ।
ত্বষ্টা চিত্তে যুজ্যং বাবৃধে শবস্ততক্ষ বজ্রমভিভূত্যোজসম্ ॥৭॥

52.8

জঘন্বাঁ উ হরিভিঃ সম্ভৃতক্রতবিন্দ্র বৃত্রং মনুষে গাতুয়ন্নপঃ ।
অয়চ্ছথা বাহ্বোর্বজ্রমায়সমধারয়ো দিব্যা সূর্যং দৃশে ॥৮॥

52.9

বৃহৎ স্বশ্চন্দ্রমমবদ্ যদুক্থ্য ১ মকৃণ্বত ভিয়সা রোহণং দিবঃ ।
যন্মানুষপ্রধনা ইন্দ্রমূতয়ঃ স্বর্নৃষাচো মরুতোঽমদন্ননু ॥৯॥

52.10

দ্যৌশ্চিদস্যামবাঁ অহেঃ স্বনাদয়োয়বীদ্ ভিয়সা বজ্র ইন্দ্র তে ।
বৃত্রস্য যদ্ বদ্বধানস্য রোদসী মদে সুতস্য শবসাভিনচ্ছিরঃ ॥১০॥

52.11

যদিন্ন্বিন্দ্র পৃথিবী দশভুজিরহানি বিশ্বা ততনন্ত কৃষ্টয়ঃ ।
অত্রাহ তে মঘবন্ বিশ্রুতং সহো দ্যামনু শবসা বর্হণা ভুবৎ ॥১১॥

52.12

ত্বমস্য পারে রজসো ব্যোমনঃ স্বভূত্যোজা অবসে ধৃষন্মনঃ ।
চকৃষে ভূমিং প্রতিমানমোজসো ঽপঃ স্বঃ পরিভূরেষ্যা দিবম্ ॥১২॥

52.13

ত্বং ভুবঃ প্রতিমানং পৃথিব্যা ঋষ্ববীরস্য বৃহতঃ পতির্ভূঃ ।
বিশ্বমাপ্রা অন্তরিক্ষং মহিত্বা সত্যমদ্ধা নকিরন্যস্ত্বাবান্ ॥১৩॥

52.14

ন যস্য দ্যাবাপৃথিবী অনু ব্যচো ন সিন্ধবো রজসো অন্তমানশুঃ ।
নোত স্ববৃষ্টিং মদে অস্য যুধ্যত একো অন্যচ্চকৃষে বিশ্বমানুষক্ ॥১৪॥

52.15

আর্চন্নত্র মরুতঃ সস্মিন্নাজৌ বিশ্বে দেবাসো অমদন্ননু ত্বা ।
বৃত্রস্য যদ্ ভৃষ্টিমতা বধেন নি ত্বমিন্দ্র প্রত্যানং জঘন্থ ॥১৫॥