Sukta 52

52.1

15 savya angirasah, indrah, jagati, 13-15 trishtup

त्यं सु मे॒षं म॑हया स्व॒र्विदं॑ श॒तं यस्य॑ सु॒भ्व॑ः सा॒कमीर॑ते ।
अत्यं॒ न वाजं॑ हवन॒स्यदं॒ रथ॒मेन्द्रं॑ ववृत्या॒मव॑से सुवृ॒क्तिभि॑ः ॥१॥

Tyam su mesham mahaya svarvidam shatam yasya subhvah sakamirate
Atyam na vajam havanasyadam rathamendram vavrityamavase suvriktibhih

52.2

स पर्व॑तो॒ न ध॒रुणे॒ष्वच्यु॑तः स॒हस्र॑मूति॒स्तवि॑षीषु वावृधे ।
इन्द्रो॒ यद् वृत्रमव॑धीन्नदी॒वृत॑मु॒ब्जन्नर्णां॑सि॒ जर्हृ॑षाणो॒ अन्ध॑सा ॥२॥

Sa parvato na dharuneshvachyutah sahasramutistavishishu vavridhe
Indro yad vritramavadhinnadivritamubjannarnansi jarhrishano andhasa

52.3

स हि द्व॒रो द्व॒रिषु॑ व॒व्र ऊध॑नि च॒न्द्रबु॑ध्नो॒ मद॑वृद्धो मनी॒षिभि॑ः ।
इन्द्रं॒ तम॑ह्वे स्वप॒स्यया॑ धि॒या मंहि॑ष्ठरातिं॒ स हि पप्रि॒रन्ध॑सः ॥३॥

Sa hi dvaro dvarishu vavra udhani chandrabudhno madavriddho manishibhih
Indram tamahve svapasyaya dhiya manhishtharatim sa hi paprirandhasah

52.4

आ यं पृ॒णन्ति॑ दि॒वि सद्म॑बर्हिषः समु॒द्रं न सु॒भ्व१ः स्वा अ॒भिष्ट॑यः ।
तं वृ॑त्र॒हत्ये॒ अनु॑ तस्थुरू॒तय॒ः शुष्मा॒ इन्द्र॑मवा॒ता अह्रु॑तप्सवः ॥४॥

A yam prinanti divi sadmabarhishah samudram na subhva1h sva abhishtayah
Tam vritrahatye anu tasthurutayah shushma indramavata ahrutapsavah

52.5

अ॒भि स्ववृ॑ष्टिं॒ मदे॑ अस्य॒ युध्य॑तो र॒घ्वीरि॑व प्रव॒णे स॑स्रुरू॒तय॑ः ।
इन्द्रो॒ यद् व॒ज्री धृ॒षमा॑णो॒ अन्ध॑सा भि॒नद् व॒लस्य॑ परि॒धीँरि॑व त्रि॒तः ॥५॥

Abhi svavrishtim made asya yudhyato raghviriva pravane sasrurutayah
Indro yad vajri dhrishamano andhasa bhinad valasya paridhinriva tritah

52.6

परीं॑ घृ॒णा च॑रति तित्वि॒षे शवो॒ ऽपो वृ॒त्वी रज॑सो बु॒ध्नमाश॑यत् ।
वृ॒त्रस्य॒ यत् प्र॑व॒णे दु॒र्गृभि॑श्वनो निज॒घन्थ॒ हन्वो॑रिन्द्र तन्य॒तुम् ॥६॥

Parim ghrina charati titvishe shavo po vritvi rajaso budhnamashayat
Vritrasya yat pravane durgribhishvano nijaghantha hanvorindra tanyatum

52.7

ह्र॒दं न हि त्वा॑ न्यृ॒षन्त्यू॒र्मयो॒ ब्रह्मा॑णीन्द्र॒ तव॒ यानि॒ वर्ध॑ना ।
त्वष्टा॑ चित्ते॒ युज्यं॑ वावृधे॒ शव॑स्त॒तक्ष॒ वज्र॑म॒भिभू॑त्योजसम् ॥७॥

Hradam na hi tva nyrishantyurmayo brahmanindra tava yani vardhana
Tvashta chitte yujyam vavridhe shavastataksha vajramabhibhutyojasam

52.8

ज॒घ॒न्वाँ उ॒ हरि॑भिः सम्भृतक्रत॒विन्द्र॑ वृ॒त्रं मनु॑षे गातु॒यन्न॒पः ।
अय॑च्छथा बा॒ह्वोर्वज्र॑माय॒समधा॑रयो दि॒व्या सूर्यं॑ दृ॒शे ॥८॥

Jaghanvam u haribhih sambhritakratavindra vritram manushe gatuyannapah
Ayachchhatha bahvorvajramayasamadharayo divya suryam drishe

52.9

बृ॒हत् स्वश्च॑न्द्र॒मम॑व॒द् यदु॒क्थ्य १ मकृ॑ण्वत भि॒यसा॒ रोह॑णं दि॒वः ।
यन्मानु॑षप्रधना॒ इन्द्र॑मू॒तय॒ः स्व॑र्नृ॒षाचो॑ म॒रुतोऽम॑द॒न्ननु॑ ॥९॥

Brihat svashchandramamavad yadukthya 1 makrinvata bhiyasa rohanam divah
Yanmanushapradhana indramutayah svarnrishacho marutomadannanu

52.10

द्यौश्चि॑द॒स्याम॑वाँ॒ अहे॑ः स्व॒नादयो॑यवीद् भि॒यसा॒ वज्र॑ इन्द्र ते ।
वृ॒त्रस्य॒ यद् ब॑द्बधा॒नस्य॑ रोदसी॒ मदे॑ सु॒तस्य॒ शव॒साभि॑न॒च्छिर॑ः ॥१०॥

Dyaushchidasyamavam aheh svanadayoyavid bhiyasa vajra indra te
Vritrasya yad badbadhanasya rodasi made sutasya shavasabhinachchhirah

52.11

यदिन्न्वि॑न्द्र पृथि॒वी दश॑भुजि॒रहा॑नि॒ विश्वा॑ त॒तन॑न्त कृ॒ष्टय॑ः ।
अत्राह॑ ते मघव॒न् विश्रु॑तं॒ सहो॒ द्यामनु॒ शव॑सा ब॒र्हणा॑ भुवत् ॥११॥

Yadinnvindra prithivi dashabhujirahani vishva tatananta krishtayah
Atraha te maghavan vishrutam saho dyamanu shavasa barhana bhuvat

52.12

त्वम॒स्य पा॒रे रज॑सो॒ व्यो॑मन॒ः स्वभू॑त्योजा॒ अव॑से धृषन्मनः ।
च॒कृ॒षे भूमिं॑ प्रति॒मान॒मोज॑सो॒ ऽपः स्व॑ः परि॒भूरे॒ष्या दिव॑म् ॥१२॥

Tvamasya pare rajaso vyomanah svabhutyoja avase dhrishanmanah
Chakrishe bhumim pratimanamojaso pah svah paribhureshya divam

52.13

त्वं भु॑वः प्रति॒मानं॑ पृथि॒व्या ऋ॒ष्ववी॑रस्य बृह॒तः पति॑र्भूः ।
विश्व॒माप्रा॑ अ॒न्तरि॑क्षं महि॒त्वा स॒त्यम॒द्धा नकि॑र॒न्यस्त्वावा॑न् ॥१३॥

Tvam bhuvah pratimanam prithivya rishvavirasya brihatah patirbhuh
Vishvamapra antariksham mahitva satyamaddha nakiranyastvavan

52.14

न यस्य॒ द्यावा॑पृथि॒वी अनु॒ व्यचो॒ न सिन्ध॑वो॒ रज॑सो॒ अन्त॑मान॒शुः ।
नोत स्ववृ॑ष्टिं॒ मदे॑ अस्य॒ युध्य॑त॒ एको॑ अ॒न्यच्च॑कृषे॒ विश्व॑मानु॒षक् ॥१४॥

Na yasya dyavaprithivi anu vyacho na sindhavo rajaso antamanashuh
Nota svavrishtim made asya yudhyata eko anyachchakrishe vishvamanushak

52.15

आर्च॒न्नत्र॑ म॒रुत॒ः सस्मि॑न्ना॒जौ विश्वे॑ दे॒वासो॑ अमद॒न्ननु॑ त्वा ।
वृ॒त्रस्य॒ यद् भृ॑ष्टि॒मता॑ व॒धेन॒ नि त्वमि॑न्द्र॒ प्रत्या॒नं ज॒घन्थ॑ ॥१५॥

Archannatra marutah sasminnajau vishve devaso amadannanu tva
Vritrasya yad bhrishtimata vadhena ni tvamindra pratyanam jaghantha