Sukta 51

51.1

15 savya angirasah, indrah, jagati, 14-15 trishtup

अ॒भि त्यं मे॒षं पु॑रुहू॒तमृ॒ग्मिय॒मिन्द्रं॑ गी॒र्भिर्म॑दता॒ वस्वो॑ अर्ण॒वम् ।
यस्य॒ द्यावो॒ न वि॒चर॑न्ति॒ मानु॑षा भु॒जे मंहि॑ष्ठम॒भि विप्र॑मर्चत ॥१॥

Abhi tyam mesham puruhutamrigmiyamindram girbhirmadata vasvo arnavam
Yasya dyavo na vicharanti manusha bhuje manhishthamabhi vipramarchata

51.2

अ॒भीम॑वन्वन्त्स्वभि॒ष्टिमू॒तयो॑ ऽन्तरिक्ष॒प्रां तवि॑षीभि॒रावृ॑तम् ।
इन्द्रं॒ दक्षा॑स ऋ॒भवो॑ मद॒च्युतं॑ श॒तक्र॑तुं॒ जव॑नी सू॒नृतारु॑हत् ॥२॥

Abhimavanvantsvabhishtimutayo ntarikshapram tavishibhiravritam
Indram dakshasa ribhavo madachyutam shatakratum javani sunritaruhat

51.3

त्वं गो॒त्रमङ्गि॑रोभ्योऽवृणो॒रपो॒तात्र॑ये श॒तदु॑रेषु गातु॒वित् ।
स॒सेन॑ चिद् विम॒दाया॑वहो॒ वस्वा॒जावद्रिं॑ वावसा॒नस्य॑ न॒र्तय॑न् ॥३॥

Tvam gotramangirobhyovrinorapotatraye shatadureshu gatuvit
Sasena chid vimadayavaho vasvajavadrim vavasanasya nartayan

51.4

त्वम॒पाम॑पि॒धाना॑वृणो॒रपाधा॑रय॒ः पर्व॑ते॒ दानु॑म॒द्वसु॑ ।
वृ॒त्रं यदि॑न्द्र॒ शव॒साव॑धी॒रहि॒मादित् सूर्यं॑ दि॒व्यारो॑हयो दृ॒शे ॥४॥

Tvamapamapidhanavrinorapadharayah parvate danumadvasu
Vritram yadindra shavasavadhirahimadit suryam divyarohayo drishe

51.5

त्वं मा॒याभि॒रप॑ मा॒यिनो॑ऽधमः स्व॒धाभि॒र्ये अधि॒ शुप्ता॒वजु॑ह्वत ।
त्वं पिप्रो॑र्नृमण॒ः प्रारु॑ज॒ः पुर॒ः प्र ऋ॒जिश्वा॑नं दस्यु॒हत्ये॑ष्वाविथ ॥५॥

Tvam mayabhirapa mayinodhamah svadhabhirye adhi shuptavajuhvata
Tvam piprornrimanah prarujah purah pra rijishvanam dasyuhatyeshvavitha

51.6

त्वं कुत्सं॑ शुष्ण॒हत्ये॑ष्वावि॒थार॑न्धयोऽतिथि॒ग्वाय॒ शम्ब॑रम् ।
म॒हान्तं॑ चिदर्बु॒दं नि क्र॑मीः प॒दा स॒नादे॒व द॑स्यु॒हत्या॑य जज्ञिषे ॥६॥

Tvam kutsam shushnahatyeshvavitharandhayotithigvaya shambaram
Mahantam chidarbudam ni kramih pada sanadeva dasyuhatyaya jagyishe

51.7

त्वे विश्वा॒ तवि॑षी स॒ध्र्य॑ग्घि॒ता तव॒ राध॑ः सोमपी॒थाय॑ हर्षते ।
तव॒ वज्र॑श्चिकिते बा॒ह्वोर्हि॒तो वृ॒श्चा शत्रो॒रव॒ विश्वा॑नि॒ वृष्ण्या॑ ॥७॥

Tve vishva tavishi sadhryagghita tava radhah somapithaya harshate
Tava vajrashchikite bahvorhito vrishcha shatrorava vishvani vrishnya

51.8

वि जा॑नी॒ह्यार्या॒न्ये च॒ दस्य॑वो ब॒र्हिष्म॑ते रन्धया॒ शास॑दव्र॒तान् ।
शाकी॑ भव॒ यज॑मानस्य चोदि॒ता विश्वेत् ता ते॑ सध॒मादे॑षु चाकन ॥८॥

Vi janihyaryanye cha dasyavo barhishmate randhaya shasadavratan
Shaki bhava yajamanasya chodita vishvet ta te sadhamadeshu chakana

51.9

अनु॑व्रताय र॒न्धय॒न्नप॑व्रताना॒भूभि॒रिन्द्र॑ः श्न॒थय॒न्नना॑भुवः ।
वृ॒द्धस्य॑ चि॒द् वर्ध॑तो॒ द्यामिन॑क्षत॒ः स्तवा॑नो व॒म्रो वि ज॑घान सं॒दिह॑ः ॥९॥

Anuvrataya randhayannapavratanabhubhirindrah shnathayannanabhuvah
Vriddhasya chid vardhato dyaminakshatah stavano vamro vi jaghana sandihah

51.10

तक्ष॒द् यत्त॑ उ॒शना॒ सह॑सा॒ सहो॒ वि रोद॑सी म॒ज्मना॑ बाधते॒ शव॑ः ।
आ त्वा॒ वात॑स्य नृमणो मनो॒युज॒ आ पूर्य॑माणमवहन्न॒भि श्रव॑ः ॥१०॥

Takshad yatta ushana sahasa saho vi rodasi majmana badhate shavah
A tva vatasya nrimano manoyuja a puryamanamavahannabhi shravah

51.11

मन्दि॑ष्ट॒ यदु॒शने॑ का॒व्ये सचाँ॒ इन्द्रो॑ व॒ङ्कू व॑ङ्कु॒तराधि॑ तिष्ठति ।
उ॒ग्रो य॒यिं निर॒पः स्रोत॑सासृज॒द्वि शुष्ण॑स्य दृंहि॒ता ऐ॑रय॒त्पुर॑ः ॥११॥

Mandishta yadushane kavye sacham indro vanku vankutaradhi tishthati
Ugro yayim nirapah srotasasrijadvi shushnasya drinhita airayatpurah

51.12

आ स्मा॒ रथं॑ वृष॒पाणे॑षु तिष्ठसि शार्या॒तस्य॒ प्रभृ॑ता॒ येषु॒ मन्द॑से ।
इन्द्र॒ यथा॑ सु॒तसो॑मेषु चा॒कनो॑ऽन॒र्वाणं॒ श्लोक॒मा रो॑हसे दि॒वि ॥१२॥

A sma ratham vrishapaneshu tishthasi sharyatasya prabhrita yeshu mandase
Indra yatha sutasomeshu chakanonarvanam shlokama rohase divi

51.13

अद॑दा॒ अर्भां॑ मह॒ते व॑च॒स्यवे॑ क॒क्षीव॑ते वृच॒यामि॑न्द्र सुन्व॒ते ।
मेना॑भवो वृषण॒श्वस्य॑ सुक्रतो॒ विश्वेत् ता ते॒ सव॑नेषु प्र॒वाच्या॑ ॥१३॥

Adada arbham mahate vachasyave kakshivate vrichayamindra sunvate
Menabhavo vrishanashvasya sukrato vishvet ta te savaneshu pravachya

51.14

इन्द्रो॑ अश्रायि सु॒ध्यो॑ निरे॒के प॒ज्रेषु॒ स्तोमो॒ दुर्यो॒ न यूप॑ः ।
अ॒श्व॒युर्ग॒व्यू र॑थ॒युर्व॑सू॒युरिन्द्र॒ इद्रा॒यः क्ष॑यति प्रय॒न्ता ॥१४॥

Indro ashrayi sudhyo nireke pajreshu stomo duryo na yupah
Ashvayurgavyu rathayurvasuyurindra idrayah kshayati prayanta

51.15

इ॒दं नमो॑ वृष॒भाय॑ स्व॒राजे॑ स॒त्यशु॑ष्माय त॒वसे॑ऽवाचि ।
अ॒स्मिन्नि॑न्द्र वृ॒जने॒ सर्व॑वीरा॒ः स्मत्सू॒रिभि॒स्तव॒ शर्म॑न्त्स्याम ॥१५॥

Idam namo vrishabhaya svaraje satyashushmaya tavasevachi
Asminnindra vrijane sarvavirah smatsuribhistava sharmantsyama