সূক্ত 37

37.1

১৫ কণ্বো ঘৌরঃ। মরুতঃ। গায়ত্রী।

ক্রীলং বঃ শর্ধো মারুতমনর্বাণং রথেশুভম্ । কণ্বা অভি প্র গায়ত ॥১॥

যে পৃষতীভির্ঋষ্টিভিঃ সাকং বাশীভিরঞ্জিভিঃ । অজায়ন্ত স্বভানবঃ ॥২॥

ইহেব শৃণ্ব এষাং কশা হস্তেষু যদ্ বদান্ । নি যামঞ্চিত্রমৃঞ্জতে ॥৩॥

প্র বঃ শর্ধায় ঘৃষ্বয়ে ত্বেষদ্যুম্নায় শুষ্মিণে । দেবত্তং ব্রহ্ম গায়ত ॥৪॥

প্র শংসা গোষ্বঘ্ন্যং ক্রীলং যচ্ছর্ধো মারুতম্ । জম্ভে রসস্য বাবৃধে ॥৫॥

কো বো বর্ষিষ্ঠ আ নরো দিবশ্চ গ্মশ্চ ধূতয়ঃ । যত্সীমন্তং ন ধূনুথ ॥৬॥

নি বো যামায় মানুষো দধ্র উগ্রায় মন্যবে । জিহীত পর্বতো গিরিঃ ॥৭॥

যেষামজ্মেষু পৃথিবী জুজুর্বাঁ ইব বিশ্পতিঃ । ভিয়া যামেষু রেজতে ॥৮॥

স্থিরং হি জানমেষাং বয়ো মাতুর্নিরেতবে । যৎ সীমনু দ্বিতা শবঃ ॥৯॥

উদু ত্যে সূনবো গিরঃ কাষ্ঠা অজ্মেষ্বত্নত । বাশ্রা অভিজ্ঞু যাতবে ॥১০॥

ত্যং চিদ্ ঘা দীর্ঘং পৃথুং মিহো নপাতমমৃধ্রম্ । প্র চ্যাবয়ন্তি যামভিঃ ॥১১॥

মরুতো যদ্ধ বো বলং জনাঁ অচুচ্যবীতন । গিরীঁরচুচ্যবীতন ॥১২॥

যদ্ধ যান্তি মরুতঃ সং হ ব্রুবতেঽধ্বন্না । শৃণোতি কশ্চিদেষাম্ ॥১৩॥

প্র যাত শীভমাশুভিঃ সন্তি কণ্বেষু বো দুবঃ । তত্রো ষু মাদয়াধ্বৈ ॥১৪॥

অস্তি হি ষ্মা মদায় বঃ স্মসি ষ্মা বয়মেষাম্ । বিশ্বং চিদায়ুর্জীবসে ॥১৫॥