সূক্ত 36

36.1

২০ কণ্বো ঘৌরঃ। অগ্নিঃ, ১৩-১৪ যূপো বা। প্রগাথঃ – বিষমা বৃহত্যঃ, সমাঃ সতোবৃহংত্যঃ (১৩ উপরিষ্টাদ্ বৃহতী। ঐ০ ব্রা০ ২-২ চরণচ্ছেদঃ)

প্র বো যহ্বং পুরূণাং বিশাং দেবয়তীনাম্ ।
অগ্নিং সূক্তেভির্বচোভিরীমহে যং সীমিদন্য ঈলতে ॥১॥

জনাসো অগ্নিং দধিরে সহোবৃধং হবিষ্মন্তো বিধেম তে ।
স ত্বং নো অদ্য সুমনা ইহাবিতা ভবা বাজেষু সন্ত্য ॥২॥

প্র ত্বা দূতং বৃণীমহে হোতারং বিশ্ববেদসম্ ।
মহস্তে সতো বি চরন্ত্যর্চয়ো দিবি স্পৃশন্তি ভানবঃ ॥৩॥

দেবাসস্ত্বা বরুণো মিত্রো অর্যমা সং দূতং প্রত্নমিন্ধতে ।
বিশ্বং সো অগ্নে জয়তি ত্বয়া ধনং যস্তে দদাশ মর্ত্যঃ ॥৪॥

মন্দ্রো হোতা গৃহপতিরগ্নে দূতো বিশামসি ।
ত্বে বিশ্বা সংগতানি ব্রতা ধ্রুবা যানি দেবা অকৃণ্বত ॥৫॥

ত্বে ইদগ্নে সুভগে যবিষ্ঠ্য বিশ্বমা হূয়তে হবিঃ ।
স ত্বং নো অদ্য সুমনা উতাপরং যক্ষি দেবান্ত্সুবীর্যা ॥৬॥

তং ঘেমিত্থা নমস্বিন উপ স্বরাজমাসতে ।
হোত্রাভিরগ্নিং মনুষঃ সমিন্ধতে তিতির্বাংসো অতি স্রিধঃ ॥৭॥

ঘ্নন্তো বৃত্রমতরন্ রোদসী অপ উরু ক্ষয়ায় চক্রিরে ।
ভুবৎ কণ্বে বৃষা দ্যুম্ন্যাহুতঃ ক্রন্দদশ্বো গবিষ্টিষু ॥৮॥

সং সীদস্ব মহাঁ অসি শোচস্ব দেববীতমঃ ।
বি ধূমমগ্নে অরুষং মিয়েধ্য সৃজ প্রশস্ত দর্শতম্ ॥৯॥

যং ত্বা দেবাসো মনবে দধুরিহ যজিষ্ঠং হব্যবাহন ।
যং কণ্বো মেধ্যাতিথির্ধনস্পৃতং যং বৃষা যমুপস্তুতঃ ॥১০॥

যমগ্নিং মেধ্যাতিথিঃ কণ্ব ঈধ ঋতাদধি ।
তস্য প্রেষো দীদিয়ুস্তমিমা ঋচস্ তমগ্নিং বর্ধয়ামসি ॥১১॥

রায়স্পূর্ধি স্বধাবোঽস্তি হি তে ঽগ্নে দেবেষ্বাপ্যম্ ।
ত্বং বাজস্য শ্রুত্যস্য রাজসি স নো মৃল মহাঁ অসি ॥১২॥

ঊর্ধ্ব ঊ ষু ণ ঊতয়ে তিষ্ঠা দেবো ন সবিতা ।
ঊর্ধ্বো বাজস্য সনিতা যদঞ্জিভির্বাঘদ্ভির্বিহ্বয়ামহে ॥১৩॥

ঊর্ধ্বো নঃ পাহ্যংহসো নি কেতুনা বিশ্বং সমত্রিণং দহ ।
কৃধী ন ঊর্ধ্বাঞ্চরথায় জীবসে বিদা দেবেষু নো দুবঃ ॥১৪॥

পাহি নো অগ্নে রক্ষসঃ পাহি ধূর্তেররাব্ণঃ ।
পাহি রীষত উত বা জিঘাংসতো বৃহদ্ভানো যবিষ্ঠ্য ॥১৫॥

ঘনেব বিষ্বগ্বি জহ্যরাব্ণস্ তপুর্জম্ভ যো অস্মধ্রুক্ ।
যো মর্ত্যঃ শিশীতে অত্যক্তুভির্মা নঃ স রিপুরীশত ॥১৬॥

অগ্নির্বব্নে সুবীর্যমগ্নিঃ কণ্বায় সৌভগম্ ।
অগ্নিঃ প্রাবন্ মিত্রোত মেধ্যাতিথিমগ্নিঃ সাতা উপস্তুতম্ ॥১৭॥

অগ্নিনা তুর্বশং যদুং পরাবত উগ্রাদেবং হবামহে ।
অগ্নির্নয়ন্নববাস্ত্বং বৃহদ্রথং তুর্বীতিং দস্যবে সহঃ ॥১৮॥

নি ত্বামগ্নে মনুর্দধে জ্যোতির্জনায় শশ্বতে ।
দীদেথ কণ্ব ঋতজাত উক্ষিতো যং নমস্যন্তি কৃষ্টয়ঃ ॥১৯॥

ত্বেষাসো অগ্নেরমবন্তো অর্চয়ো ভীমাসো ন প্রতীতয়ে ।
রক্ষস্বিনঃ সদমিদ্ যাতুমাবতো বিশ্বং সমত্রিণং দহ ॥২০॥