সূক্ত 35

35.1

১১ হিরণ্যস্তূপ আঙ্গিরসঃ। ১ (পাদানাং ক্রমেণ) অগ্নিঃ, মিত্রাবরুণৌ, রাত্রিঃ, সবিতা চ। ২-১১ সবিতা। ত্রিষ্টুপ্, ১, ৯ জগতী।

হ্বয়াম্যগ্নিং প্রথমং স্বস্তয়ে হ্বয়ামি মিত্রাবরুণাবিহাবসে । হ্বয়ামি রাত্রীং জগতো নিবেশনীং হ্বয়ামি দেবং সবিতারমূতয়ে ॥১॥

35.2

আ কৃষ্ণেন রজসা বর্তমানো নিবেশয়ন্নমৃতং মর্ত্যং চ ।
হিরণ্যয়েন সবিতা রথেনাঽঽ দেবো যাতি ভুবনানি পশ্যন্ ॥২॥

35.3

যাতি দেবঃ প্রবতা যাত্যুদ্বতা যাতি শুভ্রাভ্যাং যজতো হরিভ্যাম্ ।
আ দেবো যাতি সবিতা পরাবতো ঽপ বিশ্বা দুরিতা বাধমানঃ ॥৩॥

35.4

অভীবৃতং কৃশনৈর্বিশ্বরূপং হিরণ্যশম্যং যজতো বৃহন্তম্ ।
আস্থাদ্ রথং সবিতা চিত্রভানুঃ কৃষ্ণা রজাংসি তবিষীং দধানঃ ॥৪॥

35.5

বি জনাঞ্ছ্যাবাঃ শিতিপাদো অখ্যন্ রথং হিরণ্যপ্রউগং বহন্তঃ ।
শশ্বদ্ বিশঃ সবিতুর্দৈব্যস্যোপস্থে বিশ্বা ভুবনানি তস্থুঃ ॥৫॥

35.6

তিস্রো দ্যাবঃ সবিতুর্দ্বা উপস্থাঁ একা যমস্য ভুবনে বিরাষাট্ ।
আণিং ন রথ্যমমৃতাধি তস্থুরিহ ব্রবীতু য উ তচ্চিকেতৎ ॥৬॥

35.7

বি সুপর্ণো অন্তরিক্ষাণ্যখ্যদ্গ গভীরবেপা অসুরঃ সুনীথঃ ।
ক্বে৩দানীং সূর্যঃ কশ্চিকেত কতমাং দ্যাং রশ্মিরস্যা ততান ॥৭॥

35.8

অষ্টৌ ব্যখ্যৎ ককুভঃ পৃথিব্যাস্ ত্রী ধন্ব যোজনা সপ্ত সিন্ধূন্ ।
হিরণ্যাক্ষঃ সবিতা দেব আগাদ্ দধদ্রত্না দাশুষে বার্যাণি ॥৮॥

35.9

হিরণ্যপাণিঃ সবিতা বিচর্ষণিরুভে দ্যাবাপৃথিবী অন্তরীয়তে ।
অপামীবাং বাধতে বেতি সূর্যমভি কৃষ্ণেন রজসা দ্যামৃণোতি ॥৯॥

35.10

হিরণ্যহস্তো অসুরঃ সুনীথঃ সুমৃলীকঃ স্ববাঁ যাত্বর্বাঙ্ ।
অপসেধন্ রক্ষসো যাতুধানানস্থাদ্ দেবঃ প্রতিদোষং গৃণানঃ ॥১০॥

35.11

যে তে পন্থাঃ সবিতঃ পূর্ব্যাসো ঽরেণবঃ সুকৃতা অন্তরিক্ষে ।
তেভির্নো অদ্য পথিভিঃ সুগেভী রক্ষা চ নো অধি চ ব্রূহি দেব ॥১১॥