সূক্ত 34

34.1

১২ হরিণ্যস্তূপ আঙিরসঃ। অশ্বিনৌ। জগতী, ৯-,১২ ত্রিষ্টুপ্।

ত্রিশ্চিন্ নো অদ্যা ভবতং নবেদসা বিভুর্বাং যাম উত রাতিরশ্বিনা ।
যুবোর্হি যন্ত্রং হিম্যেব বাসসো ঽভ্যায়ংসেন্যা ভবতং মনীষিভিঃ ॥১॥

34.2

ত্রয়ঃ পবয়ো মধুবাহনে রথে সোমস্য বেনামনু বিশ্ব ইদ্ বিদুঃ ।
ত্রয়ঃ স্কম্ভাসঃ স্কভিতাস আরভে ত্রির্নক্তং যাথস্ত্রির্বশ্বিনা দিবা ॥২॥

34.3

সমানে অহন্ ত্রিরবদ্যগোহনা ত্রিরদ্য যজ্ঞং মধুনা মিমিক্ষতম্ ।
ত্রির্বাজবতীরিষো অশ্বিনা যুবং দোষা অস্মভ্যমুষসশ্চ পিন্বতম্ ॥৩॥

34.4

ত্রির্বর্তির্যাতং ত্রিরনুব্রতে জনে ত্রিঃ সুপ্রাব্যে ত্রেধেব শিক্ষতম্ ।
ত্রির্নান্দ্যং বহতমশ্বিনা যুবং ত্রিঃ পৃক্ষো অস্মে অক্ষরেব পিন্বতম্ ॥৪॥

34.5

ত্রির্নো রয়িং বহতমশ্বিনা যুবং ত্রির্দেবতাতা ত্রিরুতাবতং ধিয়ঃ ।
ত্রিঃ সৌভগত্বং ত্রিরুত শ্রবাংসি নস্ ত্রিষ্ঠং বাং সূরে দুহিতা রুহদ্ রথম্ ॥৫॥

34.6

ত্রির্নো অশ্বিনা দিব্যানি ভেষজা ত্রিঃ পার্থিবানি ত্রিরু দত্তমদ্ভ্যঃ ।
ওমানং শংয়োর্মমকায় সূনব ত্রিধাতু শর্ম বহতং শুভস্পতী ॥৬॥

34.7

ত্রির্নো অশ্বিনা যজতা দিবেদিবে পরি ত্রিধাতু পৃথিবীমশায়তম্ ।
তিস্রো নাসত্যা রথ্যা পরাবত আত্মেব বাতঃ স্বসরাণি গচ্ছতম্ ॥৭॥

34.8

ত্রিরশ্বিনা সিন্ধুভিঃ সপ্তমাতৃভিস্ত্রয় আহাবাস্ত্রেধা হবিষ্কৃতম্ ।
তিস্রঃ পৃথিবীরুপরি প্রবা দিবো নাকং রক্ষেথে দ্যুভিরক্তুভির্হিতম্ ॥৮॥

34.9

ক্ব১ ত্রী চক্রা ত্রিবৃতো রথস্য ক্ব১ ত্রয়ো বন্ধুরো যে সনীলাঃ ।
কদা যোগো বাজিনো রাসভস্য যেন যজ্ঞং নাসত্যোপয়াথঃ ॥৯॥

34.10

আ নাসত্যা গচ্ছতং হূয়তে হবির্মধ্বঃ পিবতং মধুপেভিরাসভিঃ ।
যুবোর্হি পূর্বং সবিতোষসো রথমৃতায় চিত্রং ঘৃতবন্তমিষ্যতি ॥১০॥

34.11

আ নাসত্যা ত্রিভিরেকাদশৈরিহ দেবেভির্যাতং মধুপেয়মশ্বিনা ।
প্রায়ুস্তারিষ্টং নী রপাংসি মৃক্ষতং সেধতং দ্বেষো ভবতং সচাভুবা ॥১১॥

34.12

আ নো অশ্বিনা ত্রিবৃতা রথেনাঽর্বাঞ্চং রয়িং বহতং সুবীরম্ ।
শৃণ্বন্তা বামবসে জোহবীমি বৃধে চ নো ভবতং বাজসাতৌ ॥১২॥