Sukta 34

34.1

12 harinyastupa angirasah, ashvinau, jagati, 9-, 12 trishtup

त्रिश्चि॑न् नो अ॒द्या भ॑वतं नवेदसा वि॒भुर्वां॒ याम॑ उ॒त रा॒तिर॑श्विना ।
यु॒वोर्हि य॒न्त्रं हि॒म्येव॒ वास॑सो ऽभ्यायं॒सेन्या॑ भवतं मनी॒षिभि॑ः ॥१॥

Trishchin no adya bhavatam navedasa vibhurvam yama uta ratirashvina
Yuvorhi yantram himyeva vasaso bhyayansenya bhavatam manishibhih

34.2

त्रय॑ः प॒वयो॑ मधु॒वाह॑ने॒ रथे॒ सोम॑स्य वे॒नामनु॒ विश्व॒ इद् वि॑दुः ।
त्रय॑ः स्क॒म्भास॑ः स्कभि॒तास॑ आ॒रभे॒ त्रिर्नक्तं॑ या॒थस्त्रिर्व॑श्विना॒ दिवा॑ ॥२॥

Trayah pavayo madhuvahane rathe somasya venamanu vishva id viduh
Trayah skambhasah skabhitasa arabhe trirnaktam yathastrirvashvina diva

34.3

स॒मा॒ने अह॒न् त्रिर॑वद्यगोहना॒ त्रिर॒द्य य॒ज्ञं मधु॑ना मिमिक्षतम् ।
त्रिर्वाज॑वती॒रिषो॑ अश्विना यु॒वं दो॒षा अ॒स्मभ्य॑मु॒षस॑श्च पिन्वतम् ॥३॥

Samane ahan triravadyagohana triradya yagyam madhuna mimikshatam
Trirvajavatirisho ashvina yuvam dosha asmabhyamushasashcha pinvatam

34.4

त्रिर्व॒र्तिर्या॑तं॒ त्रिरनु॑व्रते ज॒ने त्रिः सु॑प्रा॒व्ये॑ त्रे॒धेव॑ शिक्षतम् ।
त्रिर्ना॒न्द्यं॑ वहतमश्विना यु॒वं त्रिः पृक्षो॑ अ॒स्मे अ॒क्षरे॑व पिन्वतम् ॥४॥

Trirvartiryatam triranuvrate jane trih supravye tredheva shikshatam
Trirnandyam vahatamashvina yuvam trih priksho asme akshareva pinvatam

34.5

त्रिर्नो॑ र॒यिं व॑हतमश्विना यु॒वं त्रिर्दे॒वता॑ता॒ त्रिरु॒ताव॑तं॒ धिय॑ः ।
त्रिः सौ॑भग॒त्वं त्रिरु॒त श्रवां॑सि नस् त्रि॒ष्ठं वां॒ सूरे॑ दुहि॒ता रु॑ह॒द् रथ॑म् ॥५॥

Trirno rayim vahatamashvina yuvam trirdevatata trirutavatam dhiyah
Trih saubhagatvam triruta shravansi nas trishtham vam sure duhita ruhad ratham

34.6

त्रिर्नो॑ अश्विना दि॒व्यानि॑ भेष॒जा त्रिः पार्थि॑वानि॒ त्रिरु॑ दत्तम॒द्भ्यः ।
ओ॒मानं॑ शं॒योर्मम॑काय सू॒नव॑ त्रि॒धातु॒ शर्म॑ वहतं शुभस्पती ॥६॥

Trirno ashvina divyani bheshaja trih parthivani triru dattamadbhyah
Omanam shanyormamakaya sunava tridhatu sharma vahatam shubhaspati

34.7

त्रिर्नो॑ अश्विना यज॒ता दि॒वेदि॑वे॒ परि॑ त्रि॒धातु॑ पृथि॒वीम॑शायतम् ।
ति॒स्रो ना॑सत्या रथ्या परा॒वत॑ आ॒त्मेव॒ वात॒ः स्वस॑राणि गच्छतम् ॥७॥

Trirno ashvina yajata divedive pari tridhatu prithivimashayatam
Tisro nasatya rathya paravata atmeva vatah svasarani gachchhatam

34.8

त्रिर॑श्विना॒ सिन्धु॑भिः स॒प्तमा॑तृभि॒स्त्रय॑ आहा॒वास्त्रे॒धा ह॒विष्कृ॒तम् ।
ति॒स्रः पृ॑थि॒वीरु॒परि॑ प्र॒वा दि॒वो नाकं॑ रक्षेथे॒ द्युभि॑र॒क्तुभि॑र्हि॒तम् ॥८॥

Trirashvina sindhubhih saptamatribhistraya ahavastredha havishkritam
Tisrah prithivirupari prava divo nakam rakshethe dyubhiraktubhirhitam

34.9

क्व१ त्री च॒क्रा त्रि॒वृतो॒ रथ॑स्य॒ क्व१ त्रयो॑ व॒न्धुरो॒ ये सनी॑ळाः ।
क॒दा योगो॑ वा॒जिनो॒ रास॑भस्य॒ येन॑ य॒ज्ञं ना॑सत्योपया॒थः ॥९॥

Kva1 tri chakra trivrito rathasya kva1 trayo vandhuro ye sanilah
Kada yogo vajino rasabhasya yena yagyam nasatyopayathah

34.10

आ ना॑सत्या॒ गच्छ॑तं हू॒यते॑ ह॒विर्मध्व॑ः पिबतं मधु॒पेभि॑रा॒सभि॑ः ।
यु॒वोर्हि पूर्वं॑ सवि॒तोषसो॒ रथ॑मृ॒ताय॑ चि॒त्रं घृ॒तव॑न्त॒मिष्य॑ति ॥१०॥

A nasatya gachchhatam huyate havirmadhvah pibatam madhupebhirasabhih
Yuvorhi purvam savitoshaso rathamritaya chitram ghritavantamishyati

34.11

आ ना॑सत्या त्रि॒भिरे॑काद॒शैरि॒ह दे॒वेभि॑र्यातं मधु॒पेय॑मश्विना ।
प्रायु॒स्तारि॑ष्टं॒ नी रपां॑सि मृक्षतं॒ सेध॑तं॒ द्वेषो॒ भव॑तं सचा॒भुवा॑ ॥११॥

A nasatya tribhirekadashairiha devebhiryatam madhupeyamashvina
Prayustarishtam ni rapansi mrikshatam sedhatam dvesho bhavatam sachabhuva

34.12

आ नो॑ अश्विना त्रि॒वृता॒ रथे॑ना॒ऽर्वाञ्चं॑ र॒यिं व॑हतं सु॒वीर॑म् ।
शृ॒ण्वन्ता॑ वा॒मव॑से जोहवीमि वृ॒धे च॑ नो भवतं॒ वाज॑सातौ ॥१२॥

A no ashvina trivrita rathenarvancham rayim vahatam suviram
Shrinvanta vamavase johavimi vridhe cha no bhavatam vajasatau