Sukta 35

35.1

11 hiranyastupa angirasah, 1 (padanam kramena) agnih, mitravarunau, ratrih, savita cha, 2-11 savita, trishtup, 1, 9 jagati

ह्वया॑म्य॒ग्निं प्र॑थ॒मं स्व॒स्तये॒ ह्वया॑मि मि॒त्रावरु॑णावि॒हाव॑से । ह्वया॑मि॒ रात्रीं॒ जग॑तो नि॒वेश॑नीं॒ ह्वया॑मि दे॒वं स॑वि॒तार॑मू॒तये॑ ॥१॥

Hvayamyagnim prathamam svastaye hvayami mitravarunavihavase, hvayami ratrim jagato niveshanim hvayami devam savitaramutaye

35.2

आ कृ॒ष्णेन॒ रज॑सा॒ वर्त॑मानो निवे॒शय॑न्न॒मृतं॒ मर्त्यं॑ च ।
हि॒र॒ण्यये॑न सवि॒ता रथे॒नाऽऽ दे॒वो या॑ति॒ भुव॑नानि॒ पश्य॑न् ॥२॥

A krishnena rajasa vartamano niveshayannamritam martyam cha
Hiranyayena savita rathena devo yati bhuvanani pashyan

35.3

याति॑ दे॒वः प्र॒वता॒ यात्यु॒द्वता॒ याति॑ शु॒भ्राभ्यां॑ यज॒तो हरि॑भ्याम् ।
आ दे॒वो या॑ति सवि॒ता प॑रा॒वतो ऽप॒ विश्वा॑ दुरि॒ता बाध॑मानः ॥३॥

Yati devah pravata yatyudvata yati shubhrabhyam yajato haribhyam
A devo yati savita paravato pa vishva durita badhamanah

35.4

अ॒भीवृ॑तं॒ कृश॑नैर्वि॒श्वरू॑पं॒ हिर॑ण्यशम्यं यज॒तो बृ॒हन्त॑म् ।
आस्था॒द् रथं॑ सवि॒ता चि॒त्रभा॑नुः कृ॒ष्णा रजां॑सि॒ तवि॑षीं॒ दधा॑नः ॥४॥

Abhivritam krishanairvishvarupam hiranyashamyam yajato brihantam
Asthad ratham savita chitrabhanuh krishna rajansi tavishim dadhanah

35.5

वि जना॑ञ्छ्या॒वाः शि॑ति॒पादो॑ अख्य॒न् रथं॒ हिर॑ण्यप्रउगं॒ वह॑न्तः ।
शश्व॒द् विश॑ः सवि॒तुर्दैव्य॑स्यो॒पस्थे॒ विश्वा॒ भुव॑नानि तस्थुः ॥५॥

Vi jananchhyavah shitipado akhyan ratham hiranyapraugam vahantah
Shashvad vishah saviturdaivyasyopasthe vishva bhuvanani tasthuh

35.6

ति॒स्रो द्याव॑ः सवि॒तुर्द्वा उ॒पस्थाँ॒ एका॑ य॒मस्य॒ भुव॑ने विरा॒षाट् ।
आ॒णिं न रथ्य॑म॒मृताधि॑ तस्थुरि॒ह ब्र॑वीतु॒ य उ॒ तच्चिके॑तत् ॥६॥

Tisro dyavah saviturdva upastham eka yamasya bhuvane virashat
Anim na rathyamamritadhi tasthuriha bravitu ya u tachchiketat

35.7

वि सु॑प॒र्णो अ॒न्तरि॑क्षाण्यख्यद्ग गभी॒रवे॑पा॒ असु॑रः सुनी॒थः ।
क्वे॒३दानीं॒ सूर्य॒ः कश्चि॑केत कत॒मां द्यां र॒श्मिर॒स्या त॑तान ॥७॥

Vi suparno antarikshanyakhyadga gabhiravepa asurah sunithah
Kve3danim suryah kashchiketa katamam dyam rashmirasya tatana

35.8

अ॒ष्टौ व्य॑ख्यत् क॒कुभ॑ः पृथि॒व्यास् त्री धन्व॒ योज॑ना स॒प्त सिन्धू॑न् ।
हि॒र॒ण्या॒क्षः स॑वि॒ता दे॒व आगा॒द् दध॒द्रत्ना॑ दा॒शुषे॒ वार्या॑णि ॥८॥

Ashtau vyakhyat kakubhah prithivyas tri dhanva yojana sapta sindhun
Hiranyakshah savita deva agad dadhadratna dashushe varyani

35.9

हिर॑ण्यपाणिः सवि॒ता विच॑र्षणिरु॒भे द्यावा॑पृथि॒वी अ॒न्तरी॑यते ।
अपामी॑वां॒ बाध॑ते॒ वेति॒ सूर्य॑म॒भि कृ॒ष्णेन॒ रज॑सा॒ द्यामृ॑णोति ॥९॥

Hiranyapanih savita vicharshanirubhe dyavaprithivi antariyate
Apamivam badhate veti suryamabhi krishnena rajasa dyamrinoti

35.10

हिर॑ण्यहस्तो॒ असु॑रः सुनी॒थः सु॑मृळी॒कः स्ववाँ॑ यात्व॒र्वाङ् ।
अ॒प॒सेध॑न् र॒क्षसो॑ यातु॒धाना॒नस्था॑द् दे॒वः प्र॑तिदो॒षं गृ॑णा॒नः ॥१०॥

Hiranyahasto asurah sunithah sumrilikah svavam yatvarvang
Apasedhan rakshaso yatudhananasthad devah pratidosham grinanah

35.11

ये ते॒ पन्था॑ः सवितः पू॒र्व्यासो॑ ऽरे॒णव॒ः सुकृ॑ता अ॒न्तरि॑क्षे ।
तेभि॑र्नो अ॒द्य प॒थिभि॑ः सु॒गेभी॒ रक्षा॑ च नो॒ अधि॑ च ब्रूहि देव ॥११॥

Ye te panthah savitah purvyaso renavah sukrita antarikshe
Tebhirno adya pathibhih sugebhi raksha cha no adhi cha bruhi deva