সূক্ত 33

33.1

১৫ হিরণ্যস্তূপ আঙ্গিরসঃ। ইন্দ্রঃ। ত্রিষ্টুপ্।

এতায়ামোপ গব্যন্ত ইন্দ্রমস্মাকং সু প্রমতিং বাবৃধাতি ।
অনামৃণঃ কুবিদাদস্য রায়ো গবাং কেতং পরমাবর্জতে নঃ ॥১॥

33.2

উপেদহং ধনদামপ্রতীতং জুষ্টাং ন শ্যেনো বসতিং পতামি ।
ইন্দ্রং নমস্যন্নুপমেভিরর্কৈর্যঃ স্তোতৃভ্যো হব্যো অস্তি যামন্ ॥২॥

33.3

নি সর্বসেন ইষুধীঁরসক্ত সমর্যো গা অজতি যস্য বষ্টি ।
চোষ্কূয়মাণ ইন্দ্র ভূরি বামং মা পণির্ভূরস্মদধি প্রবৃদ্ধ ॥৩॥

33.4

বধীর্হি দস্যুং ধনিনং ঘনেনঁ একশ্চরন্নুপশাকেভিরিন্দ্র ।
ধনোরধি বিষুণক্তে ব্যায়ন্নয়জ্বানঃ সনকাঃ প্রেতিমীয়ুঃ ॥৪॥

33.5

পরা চিচ্ছীর্ষা ববৃজুস্ত ইন্দ্রাঽয়জ্বানো যজ্বভিঃ স্পর্ধমানাঃ ।
প্র যদ্ দিবো হরিবঃ স্থাতরুগ্র নিরব্রতাঁ অধমো রোদস্যোঃ ॥৫॥

33.6

অয়ুয়ুত্সন্ননবদ্যস্য সেনাময়াতয়ন্ত ক্ষিতয়ো নবগ্বাঃ ।
বৃষায়ুধো ন বধ্রয়ো নিরষ্টাঃ প্রবদ্ভিরিন্দ্রাচ্চিতয়ন্ত আয়ন্ ॥৬॥

33.7

ত্বমেতান্ রুদতো জক্ষতশ্চায়োধয়ো রজস ইন্দ্র পারে ।
অবাদহো দিব আ দস্যুমুচ্চা প্র সুন্বতঃ স্তুবতঃ শংসমাবঃ ॥৭॥

33.8

চক্রাণাসঃ পরীণহং পৃথিব্যা হিরণ্যেন মণিনা শুম্ভমানাঃ ।
ন হিন্বানাসস্তিতিরুস্ত ইন্দ্রং পরি স্পশো অদধাৎ সূর্যেণ ॥৮॥

33.9

পরি যদিন্দ্র রোদসী উভে অবুভোজীর্মহিনা বিশ্বতঃ সীম্ ।
অমন্যমানাঁ অভি মন্যমানৈর্নির্ব্রহ্মভিরধমো দস্যুমিন্দ্র ॥৯॥

33.10

ন যে দিবঃ পৃথিব্যা অন্তমাপুর্ন মায়াভির্ধনদাং পর্যভূবন্ ।
যুজং বজ্রং বৃষভশ্চক্র ইন্দ্রো নির্জ্যোতিষা তমসো গা অদুক্ষৎ ॥১০॥

33.11

অনু স্বধামক্ষরন্নাপো অস্যাবর্ধত মধ্য আ নাব্যানাম্ ।
সধ্রীচীনেন মনসা তমিন্দ্র ওজিষ্ঠেন হন্মনাহন্নভি দ্যূন্ ॥১১॥

33.12

ন্যাবিধ্যদিলীবিশস্য দৃহ্লা বি শৃঙ্গিণমভিনচ্ছুষ্ণমিন্দ্রঃ ।
যাবত্তরো মঘবন্ যাবদোজো বজ্রেণ শত্রুমবধীঃ পৃতন্যুম্ ॥১২॥

33.13

অভি সিধ্মো অজিগাদস্য শত্রূন্ বি তিগ্মেন বৃষভেণা পুরোঽভেৎ ।
সং বজ্রেণাসৃজদ্ বৃত্রমিন্দ্রঃ প্র স্বাং মতিমতিরচ্ছাশদানঃ ॥১৩॥

33.14

আবঃ কুত্সমিন্দ্র যস্মিঞ্চাকন্ প্রাবো যুধ্যন্তং বৃষভং দশদ্যুম্ ।
শফচ্যুতো রেণুর্নক্ষত দ্যামুচ্ছ্বৈত্রেয়ো নৃষাহ্যায় তস্থৌ ॥১৪॥

33.15

আবঃ শমং বৃষভং তুগ্সু ক্ষেত্রজেষে মঘবঞ্ছ্বিত্র্যং গাম্ ।
জ্যোক্ চক্চি চিদত্র তস্থিবাংসো অক্রঞ্ছত্রূয়তামধরা বেদনাকঃ ॥১৫॥