সূক্ত 31

31.1

১৮ হিরণ্যস্তূপ আঙ্গিরসঃ। অগ্নিঃ। জগতী, ৮, ১৬, ১৮ ত্রিষ্টুপ্।

ত্বমগ্নে প্রথমো অঙ্গিরা ঋষির্দেবো দেবানামভবঃ শিবঃ সখা
।তব ব্রতে কবয়ো বিদ্মনাপসোঽজায়ন্ত মরুতো ভ্রাজদৃষ্টয়ঃ ॥১॥

ত্বমগ্নে প্রথমো অঙ্গিরস্তমঃ কবির্দেবানাং পরি ভূষসি ব্রতম্ ।
বিভুর্বিশ্বস্মৈ ভুবনায় মেধিরো দ্বিমাতা শয়ুঃ কতিধা চিদায়বে ॥২॥

ত্বমগ্নে প্রথমো মাতরিশ্বন আবির্ভব সুক্রতূয়া বিবস্বতে ।
অরেজেতাং রোদসী হোতৃবূর্যে ঽসঘ্নোর্ভারময়জো মহো বসো ॥৩॥

ত্বমগ্নে মনবে দ্যামবাশয়ঃ পুরূরবসে সুকৃতে সুকৃত্তরঃ ।
শ্বাত্রেণ যৎ পিত্রোর্মুচ্যসে পর্যা ত্বা পূর্বমনয়ন্নাপরং পুনঃ ॥৪॥

ত্বমগ্নে বৃষভঃ পুষ্টিবর্ধন উদ্যতস্রুচে ভবসি শ্রবায্যঃ ।
য আহুতিং পরি বেদা বষট্কৃতিমেকায়ুরগ্রে বিশ আবিবাসসি ॥৫॥

ত্বমগ্নে বৃজিনবর্তনিং নরং সক্মন্ পিপর্ষি বিদথে বিচর্ষণে ।
যঃ শূরসাতা পরিতক্ম্যে ধনে দভ্রেভিশ্চিৎ সমৃতা হংসি ভূয়সঃ ॥৬॥

ত্বং তমগ্নে অমৃতত্ব উত্তমে মর্তং দধাসি শ্রবসে দিবেদিবে ।
যস্তাতৃষাণ উভয়ায় জন্মনে ময়ঃ কৃণোষি প্রয় আ চ সূরয়ে ॥৭॥

ত্বং নো অগ্নে সনয়ে ধনানাং যশসং কারুং কৃণুহি স্তবানঃ ।
ঋধ্যাম কর্মাপসা নবেন দেবৈর্দ্যাবাপৃথিবী প্রাবতং নঃ ॥৮॥

ত্বং নো অগ্নে পিত্রোরুপস্থ আ দেবো দেবেষ্বনবদ্য জাগৃবিঃ ।
তনূকৃদ্ বোধি প্রমতিশ্চ কারবে ত্বং কল্যাণ বসু বিশ্বমোপিষে ॥৯॥

ত্বমগ্নে প্রমতিস্ত্বং পিতাসি নস্ত্বং বয়স্কৃৎ তব জাময়ো বয়ম্ ।
সং ত্বা রায়ঃ শতিনঃ সং সহস্রিণঃ সুবীরং যন্তি ব্রতপামদাভ্য ॥১০॥

ত্বামগ্নে প্রথমমায়ুমায়বে দেবা অকৃণ্বন্ নহুষস্য বিশ্পতিম্ ।
ইলামকৃণ্বন্ মনুষস্য শাসনীং পিতুর্যৎ পুত্রো মমকস্য জায়তে ॥১১॥

ত্বং নো অগ্নে তব দেব পায়ুভির্মঘোনো রক্ষ তন্বশ্চ বন্দ্য ।
ত্রাতা তোকস্য তনয়ে গবামস্যনিমেষং রক্ষমাণস্তব ব্রতে ॥১২॥

ত্বমগ্নে যজ্যবে পায়ুরন্তরো ঽনিষঙ্গায় চতুরক্ষ ইধ্যসে ।
যো রাতহব্যো ঽবৃকায় ধায়সে কীরেশ্চিন্ মন্ত্রং মনসা বনোষি তম্ ॥১৩॥

ত্বমগ্ন উরুশংসায় বাঘতে স্পার্হং যদ্ রেক্ণঃ পরমং বনোষি তৎ ।
আধ্রস্য চিৎ প্রমতিরুচ্যসে পিতা প্র পাকং শাস্সি প্র দিশো বিদুষ্টরঃ ॥১৪॥

ত্বমগ্নে প্রয়তদক্ষিণং নরং বর্মেব স্যূতং পরি পাসি বিশ্বতঃ ।
স্বাদুক্ষদ্মা যো বসতৌ স্যোনকৃজ্ জীবয়াজং যজতে সোপমা দিবঃ ॥১৫॥

ইমামগ্নে শরণিং মীমৃষো ন ইমমধ্বানং যমগাম দূরাৎ ।
আপিঃ পিতা প্রমতিঃ সোম্যানাং ভৃমিরস্যৃষিকৃন্ মর্ত্যানাম্ ॥১৬॥

মনুষ্বদগ্নে অঙ্গিরস্বদঙ্গিরো যয়াতিবৎ সদনে পূর্ববচ্ছুচে ।
অচ্ছ যাহ্যা বহা দৈব্যং জনমা সাদয় বর্হিষি যক্ষি চ প্রিয়ম্ ॥১৭॥

এতেনাগ্নে ব্রহ্মণা বাবৃধস্ব শক্তী বা যত্তে চকৃমা বিদা বা ।
উত প্র ণেষ্যভি বস্যো অস্মান্ ত্সং নঃ সৃজ সুমত্যা বাজবত্যা ॥১৮॥