Sukta 31

31.1

18 hiranyastupa angirasah, agnih, jagati, 8, 16, 18 trishtup

त्वम॑ग्ने प्रथ॒मो अङ्गि॑रा॒ ऋषि॑र्दे॒वो दे॒वाना॑मभवः शि॒वः सखा॑
।तव॑ व्र॒ते क॒वयो॑ विद्म॒नाप॒सोऽजा॑यन्त म॒रुतो॒ भ्राज॑दृष्टयः ॥१॥

Tvamagne prathamo angira rishirdevo devanamabhavah shivah sakha
, Tava vrate kavayo vidmanapasojayanta maruto bhrajadrishtayah

31.2

त्वम॑ग्ने प्रथ॒मो अङ्गि॑रस्तमः क॒विर्दे॒वानां॒ परि॑ भूषसि व्र॒तम् ।
वि॒भुर्विश्व॑स्मै॒ भुव॑नाय॒ मेधि॑रो द्विमा॒ता श॒युः क॑ति॒धा चि॑दा॒यवे॑ ॥२॥

Tvamagne prathamo angirastamah kavirdevanam pari bhushasi vratam
Vibhurvishvasmai bhuvanaya medhiro dvimata shayuh katidha chidayave

31.3

त्वम॑ग्ने प्रथ॒मो मा॑त॒रिश्व॑न आ॒विर्भ॑व सुक्रतू॒या वि॒वस्व॑ते ।
अरे॑जेतां॒ रोद॑सी होतृ॒वूर्ये ऽस॑घ्नोर्भा॒रमय॑जो म॒हो व॑सो ॥३॥

Tvamagne prathamo matarishvana avirbhava sukratuya vivasvate
Arejetam rodasi hotrivurye saghnorbharamayajo maho vaso

31.4

त्वम॑ग्ने॒ मन॑वे॒ द्याम॑वाशयः पुरू॒रव॑से सु॒कृते॑ सु॒कृत्त॑रः ।
श्वा॒त्रेण॒ यत् पि॒त्रोर्मुच्य॑से॒ पर्या त्वा॒ पूर्व॑मनय॒न्नाप॑रं॒ पुन॑ः ॥४॥

Tvamagne manave dyamavashayah pururavase sukrite sukrittarah
Shvatrena yat pitrormuchyase parya tva purvamanayannaparam punah

31.5

त्वम॑ग्ने वृष॒भः पु॑ष्टि॒वर्ध॑न॒ उद्य॑तस्रुचे भवसि श्र॒वाय्य॑ः ।
य आहु॑तिं॒ परि॒ वेदा॒ वष॑ट्कृति॒मेका॑यु॒रग्रे॒ विश॑ आ॒विवा॑ससि ॥५॥

Tvamagne vrishabhah pushtivardhana udyatasruche bhavasi shravayyah
Ya ahutim pari veda vashatkritimekayuragre visha avivasasi

31.6

त्वम॑ग्ने वृजि॒नव॑र्तनिं॒ नरं॒ सक्म॑न् पिपर्षि वि॒दथे॑ विचर्षणे ।
यः शूर॑साता॒ परि॑तक्म्ये॒ धने॑ द॒भ्रेभि॑श्चि॒त् समृ॑ता॒ हंसि॒ भूय॑सः ॥६॥

Tvamagne vrijinavartanim naram sakman piparshi vidathe vicharshane
Yah shurasata paritakmye dhane dabhrebhishchit samrita hansi bhuyasah

31.7

त्वं तम॑ग्ने अमृत॒त्व उ॑त्त॒मे मर्तं॑ दधासि॒ श्रव॑से दि॒वेदि॑वे ।
यस्ता॑तृषा॒ण उ॒भया॑य॒ जन्म॑ने॒ मय॑ः कृ॒णोषि॒ प्रय॒ आ च॑ सू॒रये॑ ॥७॥

Tvam tamagne amritatva uttame martam dadhasi shravase divedive
Yastatrishana ubhayaya janmane mayah krinoshi praya a cha suraye

31.8

त्वं नो॑ अग्ने स॒नये॒ धना॑नां य॒शसं॑ का॒रुं कृ॑णुहि॒ स्तवा॑नः ।
ऋ॒ध्याम॒ कर्मा॒पसा॒ नवे॑न दे॒वैर्द्या॑वापृथिवी॒ प्राव॑तं नः ॥८॥

Tvam no agne sanaye dhananam yashasam karum krinuhi stavanah
Ridhyama karmapasa navena devairdyavaprithivi pravatam nah

31.9

त्वं नो॑ अग्ने पि॒त्रोरु॒पस्थ॒ आ दे॒वो दे॒वेष्व॑नवद्य॒ जागृ॑विः ।
त॒नू॒कृद् बो॑धि॒ प्रम॑तिश्च का॒रवे॒ त्वं क॑ल्याण॒ वसु॒ विश्व॒मोपि॑षे ॥९॥

Tvam no agne pitrorupastha a devo deveshvanavadya jagrivih
Tanukrid bodhi pramatishcha karave tvam kalyana vasu vishvamopishe

31.10

त्वम॑ग्ने॒ प्रम॑ति॒स्त्वं पि॒तासि॑ न॒स्त्वं व॑य॒स्कृत् तव॑ जा॒मयो॑ व॒यम् ।
सं त्वा॒ राय॑ः श॒तिन॒ः सं स॑ह॒स्रिण॑ः सु॒वीरं॑ यन्ति व्रत॒पाम॑दाभ्य ॥१०॥

Tvamagne pramatistvam pitasi nastvam vayaskrit tava jamayo vayam
Sam tva rayah shatinah sam sahasrinah suviram yanti vratapamadabhya

31.11

त्वाम॑ग्ने प्रथ॒ममा॒युमा॒यवे॑ दे॒वा अ॑कृण्व॒न् नहु॑षस्य वि॒श्पति॑म् ।
इळा॑मकृण्व॒न् मनु॑षस्य॒ शास॑नीं पि॒तुर्यत् पु॒त्रो मम॑कस्य॒ जाय॑ते ॥११॥

Tvamagne prathamamayumayave deva akrinvan nahushasya vishpatim
Ilamakrinvan manushasya shasanim pituryat putro mamakasya jayate

31.12

त्वं नो॑ अग्ने॒ तव॑ देव पा॒युभि॑र्म॒घोनो॑ रक्ष त॒न्व॑श्च वन्द्य ।
त्रा॒ता तो॒कस्य॒ तन॑ये॒ गवा॑म॒स्यनि॑मेषं॒ रक्ष॑माण॒स्तव॑ व्र॒ते ॥१२॥

Tvam no agne tava deva payubhirmaghono raksha tanvashcha vandya
Trata tokasya tanaye gavamasyanimesham rakshamanastava vrate

31.13

त्वम॑ग्ने॒ यज्य॑वे पा॒युरन्त॑रो ऽनिष॒ङ्गाय॑ चतुर॒क्ष इ॑ध्यसे ।
यो रा॒तह॑व्यो ऽवृ॒काय॒ धाय॑से की॒रेश्चि॒न् मन्त्रं॒ मन॑सा व॒नोषि॒ तम् ॥१३॥

Tvamagne yajyave payurantaro nishangaya chaturaksha idhyase
Yo ratahavyo vrikaya dhayase kireshchin mantram manasa vanoshi tam

31.14

त्वम॑ग्न उरु॒शंसा॑य वा॒घते॑ स्पा॒र्हं यद् रेक्ण॑ः पर॒मं व॒नोषि॒ तत् ।
आ॒ध्रस्य॑ चि॒त् प्रम॑तिरुच्यसे पि॒ता प्र पाकं॒ शास्सि॒ प्र दिशो॑ वि॒दुष्ट॑रः ॥१४॥

Tvamagna urushansaya vaghate sparham yad reknah paramam vanoshi tat
Adhrasya chit pramatiruchyase pita pra pakam shassi pra disho vidushtarah

31.15

त्वम॑ग्ने॒ प्रय॑तदक्षिणं॒ नरं॒ वर्मे॑व स्यू॒तं परि॑ पासि वि॒श्वत॑ः ।
स्वा॒दु॒क्षद्मा॒ यो व॑स॒तौ स्यो॑न॒कृज् जी॑वया॒जं यज॑ते॒ सोप॒मा दि॒वः ॥१५॥

Tvamagne prayatadakshinam naram varmeva syutam pari pasi vishvatah
Svadukshadma yo vasatau syonakrij jivayajam yajate sopama divah

31.16

इ॒माम॑ग्ने श॒रणिं॑ मीमृषो न इ॒ममध्वा॑नं॒ यमगा॑म दू॒रात् ।
आ॒पिः पि॒ता प्रम॑तिः सो॒म्यानां॒ भृमि॑रस्यृषि॒कृन् मर्त्या॑नाम् ॥१६॥

Imamagne sharanim mimrisho na imamadhvanam yamagama durat
Apih pita pramatih somyanam bhrimirasyrishikrin martyanam

31.17

म॒नु॒ष्वद॑ग्ने अङ्गिर॒स्वद॑ङ्गिरो ययाति॒वत् सद॑ने पूर्व॒वच्छु॑चे ।
अच्छ॑ या॒ह्या व॑हा॒ दैव्यं॒ जन॒मा सा॑दय ब॒र्हिषि॒ यक्षि॑ च प्रि॒यम् ॥१७॥

Manushvadagne angirasvadangiro yayativat sadane purvavachchhuche
Achchha yahya vaha daivyam janama sadaya barhishi yakshi cha priyam

31.18

ए॒तेना॑ग्ने॒ ब्रह्म॑णा वावृधस्व॒ शक्ती॑ वा॒ यत्ते॑ चकृ॒मा वि॒दा वा॑ ।
उ॒त प्र णे॑ष्य॒भि वस्यो॑ अ॒स्मान् त्सं न॑ः सृज सुम॒त्या वाज॑वत्या ॥१८॥

Etenagne brahmana vavridhasva shakti va yatte chakrima vida va
Uta pra neshyabhi vasyo asman tsam nah srija sumatya vajavatya