সূক্ত 30

30.1

২২ আজীগর্তিঃ শুনঃশেপ স কৃত্রিমো বৈশ্বামিত্রো দেবরাতঃ। ১-১৬ ইন্দ্রঃ, ১৭-১৯ অশ্বিনৌ, ২০-২২ উষাঃ।১-১০, ১২-১৫, ১৭-২২ গায়ত্রী, ১১ পাদনিচৃদ্গায়ত্রী, ১৬ ত্রিষ্টুপ্।

আ ব ইন্দ্রং ক্রিবিং যথা বাজয়ন্তঃ শতক্রতুম্ । মংহিষ্ঠং সিঞ্চ ইন্দুভিঃ ॥১॥

30.2

শতং বা যঃ শুচীনাং সহস্রং বা সমাশিরাম্ । এদু নিম্নং ন রীয়তে ॥২॥

30.3

সং যন্মদায় শুষ্মিণ এনা হ্যস্যোদরে । সমুদ্রো ন ব্যচো দধে ॥৩॥

30.4

অয়মু তে সমতসি কপোত ইব গর্ভধিম্ । বচস্তচ্চিন্ন ওহসে ॥৪॥

30.5

স্তোত্রং রাধানাং পতে গির্বাহো বীর যস্য তে । বিভূতিরস্তু সূনৃতা ॥৫॥

30.6

ঊর্ধ্বস্তিষ্ঠা ন ঊতয়েঽস্মিন্বাজে শতক্রতো । সমন্যেষু ব্রবাবহৈ ॥৬॥

30.7

যোগেয়োগে তবস্তরং বাজেবাজে হবামহে । সখায় ইন্দ্রমূতয়ে ॥৭॥

30.8

আ ঘা গমদ্যদি শ্রবৎ সহস্রিণীভিরূতিভিঃ । বাজেভিরুপ নো হবম্ ॥৮॥

30.9

অনু প্রত্নস্যৌকসো হুবে তুবিপ্রতিং নরম্ । যং তে পূর্বং পিতা হুবে ॥৯॥

30.10

তং ত্বা বয়ং বিশ্ববারা ঽঽ শাস্মহে পুরুহূত । সখে বসো জরিতৃভ্যঃ ॥১০॥

30.11

অস্মাকং শিপ্রিণীনাং সোমপাঃ সোমপাব্নাম্ । সখে বজ্রিন্ত্সখীনাম্ ॥১১॥

30.12

তথা তদস্তু সোমপাঃ সখে বজ্রিন্তথা কৃণু । যথা ত উশ্মসীষ্টয়ে ॥১২॥

30.13

রেবতীর্নঃ সধমাদ ইন্দ্রে সন্তু তুবিবাজাঃ । ক্ষুমন্তো যাভির্মদেম ॥১৩॥

30.14

আ ঘ ত্বাবান্ ত্মনাপ্তঃ স্তোতৃভ্যো ধৃষ্ণবিয়ানঃ । ঋণোরক্ষং ন চক্র্যোঃ ॥১৪॥

30.15

আ যদ্ দুবঃ শতক্রতবা কামং জরিতৄণাম্ । ঋণোরক্ষং ন শচীভিঃ ॥১৫॥

30.16

শশ্বদিন্দ্রঃ পোপ্রুথদ্ভির্জিগায় নানদদ্ভিঃ শাশ্বসদ্ভির্ধনানি ।
স নো হিরণ্যরথং দংসনাবান্ত্স নঃ সনিতা সনয়ে স নোঽদাৎ ॥১৬॥

30.17

আশ্বিনাবশ্বাবত্যেষা যাতং শবীরয়া । গোমদ্ দস্রা হিরণ্যবৎ ॥১৭॥

30.18

সমানয়োজনো হি বাং রথো দস্রাবমর্ত্যঃ । সমুদ্রে অশ্বিনেয়তে ॥১৮॥

30.19

ন্য১ঘ্ন্যস্য মূর্ধনি চক্রং রথস্য যেমথুঃ । পরি দ্যামন্যদীয়তে ॥১৯॥

30.20

কস্ত উষঃ কধপ্রিয়ে ভুজে মর্তো অমর্ত্যে । কং নক্ষসে বিভাবরি ॥২০॥

30.21

বয়ং হি তে অমন্মহ্যাঽঽন্তাদা পরাকাৎ । অশ্বে ন চিত্রে অরুষি ॥২১॥

30.22

ত্বং ত্যেভিরা গহি বাজেভির্দুহিতর্দিবঃ । অস্মে রয়িং নি ধারয় ॥২২॥