সূক্ত 29

29.1

৭ আজীগর্তিঃ শুনঃশেপ স কৃত্রিমো বৈশ্বামিত্রো দেবরাতঃ। ইন্দ্রঃ। পংক্তি।

যচ্চিদ্ধি সত্য সোমপা অনাশস্তা ইব স্মসি ।
আ তূ ন ইন্দ্র শংসয় গোষ্বশ্বেষু শুভ্রিষু সহস্রেষু তুবীমঘ ॥১॥

29.2

শিপ্রিন্ বাজানাং পতে শচীবস্তব দংসনা ।
আ তূ ন ইন্দ্র শংসয় গোষ্বশ্বেষু শুভ্রিষু সহস্রেষু তুবীমঘ ॥২॥

29.3

নি ষ্বাপয়া মিথূদৃশা সস্তামবুধ্যমানে ।
আ তূ ন ইন্দ্র শংসয় গোষ্বশ্বেষু শুভ্রিষু সহস্রেষু তুবীমঘ ॥৩॥

29.4

সসন্তু ত্যা অরাতয়ো বোধন্তু শূর রাতয়ঃ ।
আ তূ ন ইন্দ্র শংসয় গোষ্বশ্বেষু শুভ্রিষু সহস্রেষু তুবীমঘ ॥৪॥

29.5

সমিন্দ্র গর্দভং মৃণ নুবন্তং পাপয়ামুয়া ।
আ তূ ন ইন্দ্র শংসয় গোষ্বশ্বেষু শুভ্রিষু সহস্রেষু তুবীমঘ ॥৫॥

29.6

পতাতি কুণ্ডৃণাচ্যা দূরং বাতো বনাদধি ।
আ তূ ন ইন্দ্র শংসয় গোষ্বশ্বেষু শুভ্রিষু সহস্রেষু তুবীমঘ ॥৬॥

29.7

সর্বং পরিক্রোশং জহি জম্ভয়া কৃকদাশ্বম্ ।
আ তূ ন ইন্দ্র শংসয় গোষ্বশ্বেষু শুভ্রিষু সহস্রেষু তুবীমঘ ॥৭॥