Sukta 29

29.1

7 ajigartih shunahshepa sa kritrimo vaishvamitro devaratah, indrah, pankti

यच्चि॒द्धि स॑त्य सोमपा अनाश॒स्ता इ॑व॒ स्मसि॑ ।
आ तू न॑ इन्द्र शंसय॒ गोष्वश्वे॑षु शु॒भ्रिषु॑ स॒हस्रे॑षु तुवीमघ ॥१॥

Yachchiddhi satya somapa anashasta iva smasi
A tu na indra shansaya goshvashveshu shubhrishu sahasreshu tuvimagha

29.2

शिप्रि॑न् वाजानां पते॒ शची॑व॒स्तव॑ दं॒सना॑ ।
आ तू न॑ इन्द्र शंसय॒ गोष्वश्वे॑षु शु॒भ्रिषु॑ स॒हस्रे॑षु तुवीमघ ॥२॥

Shiprin vajanam pate shachivastava dansana
A tu na indra shansaya goshvashveshu shubhrishu sahasreshu tuvimagha

29.3

नि ष्वा॑पया मिथू॒दृशा॑ स॒स्तामबु॑ध्यमाने ।
आ तू न॑ इन्द्र शंसय॒ गोष्वश्वे॑षु शु॒भ्रिषु॑ स॒हस्रे॑षु तुवीमघ ॥३॥

Ni shvapaya mithudrisha sastamabudhyamane
A tu na indra shansaya goshvashveshu shubhrishu sahasreshu tuvimagha

29.4

स॒सन्तु॒ त्या अरा॑तयो॒ बोध॑न्तु शूर रा॒तय॑ः ।
आ तू न॑ इन्द्र शंसय॒ गोष्वश्वे॑षु शु॒भ्रिषु॑ स॒हस्रे॑षु तुवीमघ ॥४॥

Sasantu tya aratayo bodhantu shura ratayah
A tu na indra shansaya goshvashveshu shubhrishu sahasreshu tuvimagha

29.5

समि॑न्द्र गर्द॒भं मृ॑ण नु॒वन्तं॑ पा॒पया॑मु॒या ।
आ तू न॑ इन्द्र शंसय॒ गोष्वश्वे॑षु शु॒भ्रिषु॑ स॒हस्रे॑षु तुवीमघ ॥५॥

Samindra gardabham mrina nuvantam papayamuya
A tu na indra shansaya goshvashveshu shubhrishu sahasreshu tuvimagha

29.6

पता॑ति कुण्डृ॒णाच्या॑ दू॒रं वातो॒ वना॒दधि॑ ।
आ तू न॑ इन्द्र शंसय॒ गोष्वश्वे॑षु शु॒भ्रिषु॑ स॒हस्रे॑षु तुवीमघ ॥६॥

Patati kundrinachya duram vato vanadadhi
A tu na indra shansaya goshvashveshu shubhrishu sahasreshu tuvimagha

29.7

सर्वं॑ परिक्रो॒शं ज॑हि ज॒म्भया॑ कृकदा॒श्व॑म् ।
आ तू न॑ इन्द्र शंसय॒ गोष्वश्वे॑षु शु॒भ्रिषु॑ स॒हस्रे॑षु तुवीमघ ॥७॥

Sarvam parikrosham jahi jambhaya krikadashvam
A tu na indra shansaya goshvashveshu shubhrishu sahasreshu tuvimagha