সূক্ত 24

24.1

১৫ আজীগর্তিঃ শুনঃ শেপঃ স কৃত্রিমো বৈশ্বামিত্রো দেবরাতঃ।১ কঃ (প্রজাপতিঃ), ২ অগ্নিঃ, ৩-৫ সবিতা, ৫ ভগো বা, ৬-১৫ বরুণঃ।১, ২, ৬-১৫ ত্রিষ্টুপ্, ৩-৫ গায়ত্রী।

কস্য নূনং কতমস্যামৃতানাং মনামহে চারু দেবস্য নাম ।
কো নো মহ্যা অদিতয়ে পুনর্দাৎ পিতরং চ দৃশেয়ং মাতরং চ ॥১॥

24.2

অগ্নের্বয়ং প্রথমস্যামৃতানাং মনামহে চারু দেবস্য নাম ।
স নো মহ্যা অদিতয়ে পুনর্দাৎ পিতরং চ দৃশেয়ং মাতরং চ ॥২॥

24.3

অভি ত্বা দেব সবিতরীশানং বার্যাণাম্ । সদাবন্ভাগমীমহে ॥৩॥

24.4

যশ্চিদ্ধি ত ইত্থা ভগঃ শশমানঃ পুরা নিদঃ । অদ্বেষো হস্তয়োর্দধে ॥৪॥

24.5

ভগভক্তস্য তে বয়মুদশেম তবাবসা । মূর্ধানং রায় আরভে ॥৫॥

24.6

নহি তে ক্ষত্রং ন সহো ন মন্যুং বয়শ্চনামী পতয়ন্ত আপুঃ ।
নেমা আপো অনিমিষং চরন্তীর্ন যে বাতস্য প্রমিনন্ত্যভ্বম্ ॥৬॥

24.7

অবুধ্নে রাজা বরুণো বনস্যোর্ধ্বং স্তূপং দদতে পূতদক্ষঃ ।
নীচীনাঃ স্থুরুপরি বুধ্ন এষামস্মে অন্তর্নিহিতাঃ কেতবঃ স্যুঃ ॥৭॥

24.8

উরুং হি রাজা বরুণশ্চকার সূর্যায় পন্থামন্বেতবা উ ।
অপদে পাদা প্রতিধাতবেঽকরুতাপবক্তা হৃদয়াবিধশ্চিৎ ॥৮॥

24.9

শতং তে রাজন্ ভিষজঃ সহস্রমুর্বী গভীরা সুমতিষ্টে অস্তু ।
বাধস্ব দূরে নিঋতিং পরাচৈঃ কৃতং চিদেনঃ প্র মুমুগ্ধ্যস্মৎ ॥৯॥

24.10

অমী য ঋক্ষা নিহিতাস উচ্চা নক্তং দদৃশ্রে কুহ চিদ্ দিবেয়ুঃ ।
অদব্ধানি বরুণস্য ব্রতানি বিচাকশচ্চন্দ্রমা নক্তমেতি ॥১০॥

24.11

তত্ত্বা যামি ব্রহ্মণা বন্দমানস্ তদা শাস্তে যজমানো হবির্ভিঃ ।
অহেলমানো বরুণেহ বোধ্যুরুশংস মা ন আয়ুঃ প্র মোষীঃ ॥১১॥

24.12

তদিন্নক্তং তদ্ দিবা মহ্যমাহুস্ তদয়ং কেতো হৃদ আ বি চষ্টে ।
শুনঃশেপো যমহ্বদ্ গৃভীতঃ সো অস্মান্ রাজা বরুণো মুমোক্তু ॥১২॥

24.13

শুনঃশেপো হ্যহ্বদ্ গৃভীতস্ ত্রিষ্বাদিত্যং দ্রুপদেষু বদ্ধঃ ।
অবৈনং রাজা বরুণঃ সসৃজ্যাদ্ বিদ্বাঁ অদব্ধো বি মুমোক্তু পাশান্ ॥১৩॥

24.14

অব তে হেলো বরুণ নমোভিরব যজ্ঞেভিরীমহে হবির্ভিঃ ।
ক্ষয়ন্নস্মভ্যমসুর প্রচেতা রাজন্নেনাংসি শিশ্রথঃ কৃতানি ॥১৪॥

24.15

উদুত্তমং বরুণ পাশমস্মদবাধমং বি মধ্যমং শ্রথায় ।
অথা বয়মাদিত্য ব্রতে তবানাগসো অদিতয়ে স্যাম ॥১৫॥