Sukta 24

24.1

15 ajigartih shunah shepah sa kritrimo vaishvamitro devaratah, 1 kah (prajapatih), 2 agnih, 3-5 savita, 5 bhago va, 6-15 varunah, 1, 2, 6-15 trishtup, 3-5 gayatri

कस्य॑ नू॒नं क॑त॒मस्या॒मृता॑नां॒ मना॑महे॒ चारु॑ दे॒वस्य॒ नाम॑ ।
को नो॑ म॒ह्या अदि॑तये॒ पुन॑र्दात् पि॒तरं॑ च दृ॒शेयं॑ मा॒तरं॑ च ॥१॥

Kasya nunam katamasyamritanam manamahe charu devasya nama
Ko no mahya aditaye punardat pitaram cha drisheyam mataram cha

24.2

अ॒ग्नेर्व॒यं प्र॑थ॒मस्या॒मृता॑नां॒ मना॑महे॒ चारु॑ दे॒वस्य॒ नाम॑ ।
स नो॑ म॒ह्या अदि॑तये॒ पुन॑र्दात् पि॒तरं॑ च दृ॒शेयं॑ मा॒तरं॑ च ॥२॥

Agnervayam prathamasyamritanam manamahe charu devasya nama
Sa no mahya aditaye punardat pitaram cha drisheyam mataram cha

24.3

अ॒भि त्वा॑ देव सवित॒रीशा॑नं॒ वार्या॑णाम् । सदा॑वन्भा॒गमी॑महे ॥३॥

Abhi tva deva savitarishanam varyanam, sadavanbhagamimahe

24.4

यश्चि॒द्धि त॑ इ॒त्था भग॑ः शशमा॒नः पु॒रा नि॒दः । अ॒द्वे॒षो हस्त॑योर्द॒धे ॥४॥

Yashchiddhi ta ittha bhagah shashamanah pura nidah, advesho hastayordadhe

24.5

भग॑भक्तस्य ते व॒यमुद॑शेम॒ तवाव॑सा । मू॒र्धानं॑ रा॒य आ॒रभे॑ ॥५॥

Bhagabhaktasya te vayamudashema tavavasa, murdhanam raya arabhe

24.6

न॒हि ते॑ क्ष॒त्रं न सहो॒ न म॒न्युं वय॑श्च॒नामी प॒तय॑न्त आ॒पुः ।
नेमा आपो॑ अनिमि॒षं चर॑न्ती॒र्न ये वात॑स्य प्रमि॒नन्त्यभ्व॑म् ॥६॥

Nahi te kshatram na saho na manyum vayashchanami patayanta apuh
Nema apo animisham charantirna ye vatasya praminantyabhvam

24.7

अ॒बु॒ध्ने राजा॒ वरु॑णो॒ वन॑स्यो॒र्ध्वं स्तूपं॑ ददते पू॒तद॑क्षः ।
नी॒चीना॑ः स्थुरु॒परि॑ बु॒ध्न ए॑षाम॒स्मे अ॒न्तर्निहि॑ताः के॒तव॑ः स्युः ॥७॥

Abudhne raja varuno vanasyordhvam stupam dadate putadakshah
Nichinah sthurupari budhna eshamasme antarnihitah ketavah syuh

24.8

उ॒रुं हि राजा॒ वरु॑णश्च॒कार॒ सूर्या॑य॒ पन्था॒मन्वे॑त॒वा उ॑ ।
अ॒पदे॒ पादा॒ प्रति॑धातवेऽकरु॒ताप॑व॒क्ता हृ॑दया॒विध॑श्चित् ॥८॥

Urum hi raja varunashchakara suryaya panthamanvetava u
Apade pada pratidhatavekarutapavakta hridayavidhashchit

24.9

श॒तं ते॑ राजन् भि॒षज॑ः स॒हस्र॑मु॒र्वी ग॑भी॒रा सु॑म॒तिष्टे॑ अस्तु ।
बाध॑स्व दू॒रे निऋ॑तिं परा॒चैः कृ॒तं चि॒देन॒ः प्र मु॑मुग्ध्य॒स्मत् ॥९॥

Shatam te rajan bhishajah sahasramurvi gabhira sumatishte astu
Badhasva dure niritim parachaih kritam chidenah pra mumugdhyasmat

24.10

अ॒मी य ऋक्षा॒ निहि॑तास उ॒च्चा नक्तं॒ ददृ॑श्रे॒ कुह॑ चि॒द् दिवे॑युः ।
अद॑ब्धानि॒ वरु॑णस्य व्र॒तानि॑ वि॒चाक॑शच्च॒न्द्रमा॒ नक्त॑मेति ॥१०॥

Ami ya riksha nihitasa uchcha naktam dadrishre kuha chid diveyuh
Adabdhani varunasya vratani vichakashachchandrama naktameti

24.11

तत्त्वा॑ यामि॒ ब्रह्म॑णा॒ वन्द॑मान॒स् तदा शा॑स्ते॒ यज॑मानो ह॒विर्भि॑ः ।
अहे॑ळमानो वरुणे॒ह बो॒ध्युरु॑शंस॒ मा न॒ आयु॒ः प्र मो॑षीः ॥११॥

Tattva yami brahmana vandamanas tada shaste yajamano havirbhih
Ahelamano varuneha bodhyurushansa ma na ayuh pra moshih

24.12

तदिन्नक्तं॒ तद् दिवा॒ मह्य॑माहु॒स् तद॒यं केतो॑ हृ॒द आ वि च॑ष्टे ।
शुन॒ःशेपो॒ यमह्व॑द् गृभी॒तः सो अ॒स्मान् राजा॒ वरु॑णो मुमोक्तु ॥१२॥

Tadinnaktam tad diva mahyamahus tadayam keto hrida a vi chashte
Shunahshepo yamahvad gribhitah so asman raja varuno mumoktu

24.13

शुन॒ःशेपो॒ ह्यह्व॑द् गृभी॒तस् त्रि॒ष्वा॑दि॒त्यं द्रु॑प॒देषु॑ ब॒द्धः ।
अवै॑नं॒ राजा॒ वरु॑णः ससृज्याद् वि॒द्वाँ अद॑ब्धो॒ वि मु॑मोक्तु॒ पाशा॑न् ॥१३॥

Shunahshepo hyahvad gribhitas trishvadityam drupadeshu baddhah
Avainam raja varunah sasrijyad vidvam adabdho vi mumoktu pashan

24.14

अव॑ ते॒ हेळो॑ वरुण॒ नमो॑भि॒रव॑ य॒ज्ञेभि॑रीमहे ह॒विर्भि॑ः ।
क्षय॑न्न॒स्मभ्य॑मसुर प्रचेता॒ राज॒न्नेनां॑सि शिश्रथः कृ॒तानि॑ ॥१४॥

Ava te helo varuna namobhirava yagyebhirimahe havirbhih
Kshayannasmabhyamasura pracheta rajannenansi shishrathah kritani

24.15

उदु॑त्त॒मं व॑रुण॒ पाश॑म॒स्मदवा॑ध॒मं वि म॑ध्य॒मं श्र॑थाय ।
अथा॑ व॒यमा॑दित्य व्र॒ते तवाना॑गसो॒ अदि॑तये स्याम ॥१५॥

Uduttamam varuna pashamasmadavadhamam vi madhyamam shrathaya
Atha vayamaditya vrate tavanagaso aditaye syama