সূক্ত 185

185.1

১১ অগস্ত্যো মৈত্রাবরুণিঃ । দ্যাবাপৃথিব্যৌ। ত্রিষ্টুপ্।

কতরা পূর্বা কতরাপরায়োঃ কথা জাতে কবয়ঃ কো বি বেদ ।
বিশ্বং ত্মনা বিভৃতো যদ্ধ নাম বি বর্তেতে অহনী চক্রিয়েব ॥১॥

ভূরিং দ্বে অচরন্তী চরন্তং পদ্বন্তং গর্ভমপদী দধাতে ।
নিত্যং ন সূনুং পিত্রোরুপস্থে দ্যাবা রক্ষতং পৃথিবী নো অভ্বাৎ ॥২॥

অনেহো দাত্রমদিতেরনর্বং হুবে স্বর্বদবধং নমস্বৎ ।
তদ্ রোদসী জনয়তং জরিত্রে দ্যাবা রক্ষতং পৃথিবী নো অভ্বাৎ ॥৩॥

অতপ্যমানে অবসাবন্তী অনু ষ্যাম রোদসী দেবপুত্রে ।
উভে দেবানামুভয়েভিরহ্নাং দ্যাবা রক্ষতং পৃথিবী নো অভ্বাৎ ॥৪॥

সংগচ্ছমানে যুবতী সমন্তে স্বসারা জামী পিত্রোরুপস্থে ।
অভিজিঘ্রন্তী ভুবনস্য নাভিং দ্যাবা রক্ষতং পৃথিবী নো অভ্বাৎ ॥৫॥

উর্বী সদ্মনী বৃহতী ঋতেন হুবে দেবানামবসা জনিত্রী ।
দধাতে যে অমৃতং সুপ্রতীকে দ্যাবা রক্ষতং পৃথিবী নো অভ্বাৎ ॥৬॥

উর্বী পৃথ্বী বহুলে দূরেঅন্তে উপ ব্রুবে নমসা যজ্ঞে অস্মিন্ ।
দধাতে যে সুভগে সুপ্রতূর্তী দ্যাবা রক্ষতং পৃথিবী নো অভ্বাৎ ॥৭॥

দেবান্ বা যচ্চকৃমা কচ্চিদাগঃ সখায়ং বা সদমিজ্জাস্পতিং বা ।
ইয়ং ধীর্ভূয়া অবয়ানমেষাং দ্যাবা রক্ষতং পৃথিবী নো অভ্বাৎ ॥৮॥

উভা শংসা নর্যা মামবিষ্টামুভে মামূতী অবসা সচেতাম্ ।
ভূরি চিদর্যঃ সুদাস্তরায়েষা মদন্ত ইষয়েম দেবাঃ ॥৯॥

ঋতং দিবে তদবোচং পৃথিব্যা অভিশ্রাবায় প্রথমং সুমেধাঃ ।
পাতামবদ্যাদ্ দুরিতাদভীকে পিতা মাতা চ রক্ষতামবোভিঃ ॥১০॥

ইদং দ্যাবাপৃথিবী সত্যমস্তু পিতর্মাতর্যদিহোপব্রুবে বাম্ ।
ভূতং দেবানামবমে অবোভির্বিদ্যামেষং বৃজনং জীরদানুম্ ॥১১॥