Sukta 185

185.1

11 agastyo maitravarunih, dyavaprithivyau, trishtup

क॒त॒रा पूर्वा॑ कत॒राप॑रा॒योः क॒था जा॒ते क॑वय॒ः को वि वे॑द ।
विश्वं॒ त्मना॑ बिभृतो॒ यद्ध॒ नाम॒ वि व॑र्तेते॒ अह॑नी च॒क्रिये॑व ॥१॥

Katara purva kataraparayoh katha jate kavayah ko vi veda
Vishvam tmana bibhrito yaddha nama vi vartete ahani chakriyeva

भूरिं॒ द्वे अच॑रन्ती॒ चर॑न्तं प॒द्वन्तं॒ गर्भ॑म॒पदी॑ दधाते ।
नित्यं॒ न सू॒नुं पि॒त्रोरु॒पस्थे॒ द्यावा॒ रक्ष॑तं पृथिवी नो॒ अभ्वा॑त् ॥२॥

Bhurim dve acharanti charantam padvantam garbhamapadi dadhate
Nityam na sunum pitrorupasthe dyava rakshatam prithivi no abhvat

अ॒ने॒हो दा॒त्रमदि॑तेरन॒र्वं हु॒वे स्व॑र्वदव॒धं नम॑स्वत् ।
तद् रो॑दसी जनयतं जरि॒त्रे द्यावा॒ रक्ष॑तं पृथिवी नो॒ अभ्वा॑त् ॥३॥

Aneho datramaditeranarvam huve svarvadavadham namasvat
Tad rodasi janayatam jaritre dyava rakshatam prithivi no abhvat

अत॑प्यमाने॒ अव॒साव॑न्ती॒ अनु॑ ष्याम॒ रोद॑सी दे॒वपु॑त्रे ।
उ॒भे दे॒वाना॑मु॒भये॑भि॒रह्नां॒ द्यावा॒ रक्ष॑तं पृथिवी नो॒ अभ्वा॑त् ॥४॥

Atapyamane avasavanti anu shyama rodasi devaputre
Ubhe devanamubhayebhirahnam dyava rakshatam prithivi no abhvat

सं॒गच्छ॑माने युव॒ती सम॑न्ते॒ स्वसा॑रा जा॒मी पि॒त्रोरु॒पस्थे॑ ।
अ॒भि॒जिघ्र॑न्ती॒ भुव॑नस्य॒ नाभिं॒ द्यावा॒ रक्ष॑तं पृथिवी नो॒ अभ्वा॑त् ॥५॥

Sangachchhamane yuvati samante svasara jami pitrorupasthe
Abhijighranti bhuvanasya nabhim dyava rakshatam prithivi no abhvat

उ॒र्वी सद्म॑नी बृह॒ती ऋ॒तेन॑ हु॒वे दे॒वाना॒मव॑सा॒ जनि॑त्री ।
द॒धाते॒ ये अ॒मृतं॑ सु॒प्रती॑के॒ द्यावा॒ रक्ष॑तं पृथिवी नो॒ अभ्वा॑त् ॥६॥

Urvi sadmani brihati ritena huve devanamavasa janitri
Dadhate ye amritam supratike dyava rakshatam prithivi no abhvat

उ॒र्वी पृ॒थ्वी ब॑हु॒ले दू॒रेअ॑न्ते॒ उप॑ ब्रुवे॒ नम॑सा य॒ज्ञे अ॒स्मिन् ।
द॒धाते॒ ये सु॒भगे॑ सु॒प्रतू॑र्ती॒ द्यावा॒ रक्ष॑तं पृथिवी नो॒ अभ्वा॑त् ॥७॥

Urvi prithvi bahule dureante upa bruve namasa yagye asmin
Dadhate ye subhage supraturti dyava rakshatam prithivi no abhvat

दे॒वान् वा॒ यच्च॑कृ॒मा कच्चि॒दाग॒ः सखा॑यं वा॒ सद॒मिज्जास्प॑तिं वा ।
इ॒यं धीर्भू॑या अव॒यान॑मेषां॒ द्यावा॒ रक्ष॑तं पृथिवी नो॒ अभ्वा॑त् ॥८॥

Devan va yachchakrima kachchidagah sakhayam va sadamijjaspatim va
Iyam dhirbhuya avayanamesham dyava rakshatam prithivi no abhvat

उ॒भा शंसा॒ नर्या॒ माम॑विष्टामु॒भे मामू॒ती अव॑सा सचेताम् ।
भूरि॑ चिद॒र्यः सु॒दास्त॑राये॒षा मद॑न्त इषयेम देवाः ॥९॥

Ubha shansa narya mamavishtamubhe mamuti avasa sachetam
Bhuri chidaryah sudastarayesha madanta ishayema devah

ऋ॒तं दि॒वे तद॑वोचं पृथि॒व्या अ॑भिश्रा॒वाय॑ प्रथ॒मं सु॑मे॒धाः ।
पा॒ताम॑व॒द्याद् दु॑रि॒ताद॒भीके॑ पि॒ता मा॒ता च॑ रक्षता॒मवो॑भिः ॥१०॥

Ritam dive tadavocham prithivya abhishravaya prathamam sumedhah
Patamavadyad duritadabhike pita mata cha rakshatamavobhih

इ॒दं द्या॑वापृथिवी स॒त्यम॑स्तु॒ पित॒र्मात॒र्यदि॒होप॑ब्रु॒वे वा॑म् ।
भू॒तं दे॒वाना॑मव॒मे अवो॑भिर्वि॒द्यामे॒षं वृ॒जनं॑ जी॒रदा॑नुम् ॥११॥

Idam dyavaprithivi satyamastu pitarmataryadihopabruve vam
Bhutam devanamavame avobhirvidyamesham vrijanam jiradanum